جاڭا يندۋستريالاندىرۋ باعدارلاماسى اياسىندا زاۋىتتا جاڭعىرتۋ جوباسى 2011 جىلى باستالعان بولاتىن. ينۆەستيتسيا كولەمى - 580 ملرد. تەڭگە بولاتىن جوبانىڭ قۋاتتىلىعى – جىلىنا 6 ملن توننا مۇناي وڭدەۋگە جەتەدى. جاڭعىرتۋ جانە قايتا قۇرۋ جوباسى ەكى كەزەڭدە جۇزەگە اسىرىلدى. ءبىرىنشى كەزەڭدە, كومپانيا كەدەن وداعىندا قابىلدانعان, ك4 جانە ك5 ەكولوگيالىق كلاسىنىڭ (انالوگى ەۋرو-4 جانە ەۋرو-5) بەنزين جانە ديزەل وتىنىنىڭ ءوندىرىسىن قۇردى. 15 تامىزدا جوعارى ساپالى ءونىم شىعارا باستادى. جىلىنا قۋاتتىلىعى 2 ملن توننا شيكىزات وندىرەتىن RFCC كاتاليتيكالىق كرەكينگ قوندىرعىسىن ورناتۋ جوسپارلانىپ, UOP امەريكاندىق كومپانيا تەحنولوگياسىمەن جاسالىندى. ال 28 قىركۇيەك كۇنى RFCC كەشەنى ىسكە قوسىلدى. ول زاۋىت اينالىمىن ۇلعايتىپ, ك-4 جانە ك-5 كلاستى ساپالى بەنزين مەن ديزەل وندىرۋگە مۇمكىندىك بەرەدى.
سونداي-اق, نۇرسۇلتان نازارباەۆقا اتىراۋ جانە پاۆلودار مۇناي وڭدەۋ زاۋىتتارىنىڭ جۇمىسى جونىندە باياندالىپ, قازاقستاننىڭ مۇناي نارىعىنداعى قازىرگى جاعداي تۋرالى مالىمەت بەرىلدى. باياندامانى تىڭداعان سوڭ ەلباسى ەكولوگيالىق تۇرعىدان تازا جانارماي تۇرلەرىن پايدالانۋدىڭ جانە ونىڭ تۇرعىندار ءۇشىن قول جەتىمدى بولۋىن قامتاماسىز ەتۋدىڭ ماڭىزدى ەكەنىن اتاپ ءوتتى.
– ءبىز گازبەن جۇرەتىن اۆتوبۋستار شىعارىپ جاتىرمىز. سولاردىڭ ءوندىرىس كولەمىن ۇلعايتۋ قاجەت. بۇل ۇلتتىق ەكونوميكانى ىنتالاندىرىپ, ەكولوگياعا كەلەتىن زياندى ازايتادى. سونىمەن قاتار, كولىكتى گازعا اۋىستىرۋ ونىڭ يەلەرى ءۇشىن دە ۇتىمدى, – دەدى مەملەكەت باسشىسى.
عالىمجان ەلشىباي,
«ەگەمەن قازاقستان»
شىمكەنت
