بارلىعى ش.ايمانوۆ اتىنداعى «قازاقفيلم» كينوستۋدياسىنىڭ جەتى ءفيلمى قاتىسقان. ۇزدىكتەر قاتارىنان تابىلعان «اسان» فيلمىنەن باسقا كونكۋرسقا ۆەنەرا قايىرجانوۆانىڭ «تىعىلماق», ءادىل مۇساتاەۆتىڭ «حات», الەن راحمەتاليەۆتىڭ «سوڭعى مۇعالىمى» كوركەم فيلمدەر باعدارلاماسىندا, ال دەرەكتى فيلمدەر باعدارلاماسىندا قايشا راحىموۆانىڭ «نايري», كاميلا ءابدىلدينوۆا مەن كاميلا بەردىمۇراتوۆانىڭ «ويتكەنى سۇيەمىن» جانە ەۆگەني لۋمپوۆتىڭ «تۇستەر ۇيلەسىمى» قاتىسقان. اتالعان فيلمدەردىڭ بارلىعى دەرلىك قر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن.
بەرىك جاحانوۆتىڭ «اسان» ءفيلمى اكەسىنىڭ جەرلەۋىنە قاتىسۋ ءۇشىن جولعا شىققان بوزبالا تۋرالى باياندايدى. ءفيلمنىڭ باس كەيىپكەرىن سومداعان اكتەر ازات ءجۇمادىل «بايقوڭىردىڭ» پريزىنە لايىق دەپ تانىلعان. بۇعان دەيىن اتالعان فيلم 71- ءشى حالىقارالىق كانن كينوفەستيۆالىنىڭ Short Film Corner اياسىندا كورسەتىلگەنىن ەستەرىڭىزگە سالا كەتەيىك.
«مەن «قازاقفيلم» كينوستۋدياسىنا العىس ايتا وتىرىپ, بۇكىل ءتۇسىرىلىم توبىن وسى جەڭىسىمىزبەن قۇتتىقتايمىن», - دەپ قۋانىشىن رەجيسسەر بەرىك جاحانوۆ جەتكىزدى.
فەستيۆال «قازاقفيلمنىڭ» تاعى ءبىر قىسقامەترلى ءفيلمى, دارەجان ومىرباەۆ تۇسىرگەن «شىلدەنىڭ» ارنايى كورسەتىلىمىمەن اشىلدى. كورسەتىلىم ءفيلمىنىڭ وتىز جىلدىق مەرەيتويىنا وراي ءوتتى. Baikonyr Short Film Festival باس سەرىكتەسى - قازاقستان رەسپۋبليكاسىنىڭ تۇڭعىش پرەزيدەنتى ەلباسى قورى, Kinopark Theatres جانە Kinoplexx Cinemas. III Baikonyr SFF قاتىسۋشىلارى ءۇش كاتەگوريا بويىنشا باق سىناستى. بارلىعى: 27 كوركەم كارتينا, 11 انيماتسيالىق فيلم, 9 دەرەكتى تۋىندى قاتىسقان.
