ءمينيستردىڭ ايتۋىنشا, ەلىمزدىڭ بىرنەشە وڭىرىندە — الماتى, استانا قالالارىندا, پاۆلودار, قاراعاندى وبلىستارىندا ساۋدا ورتالىقتارى مەن بازارلارعا تەكسەرۋلەر جۇرگىزىلىپ, ۇرلانعان زاتتاردىڭ ساتىلۋىنا قاتىستى پروبلەمانىڭ بار ەكەنى راستالدى.
«ۇرلانعان زاتتار ساتىلعان. كوبى ساۋدا ورىندارىندا قۇجاتتارى جوق تەلەفوندار مەن ونىڭ بولشەكتەرىن ساتقان. بۇگىن الماتى ق. اكىمى ءبىر بازاردىڭ جابىلعانىن ايتتى. وسىنداي بازارلارعا, ساۋدا ورتالىقتارى مەن دۇڭگىرشەكتەردىڭ يەلەرىنە قاتىستى بارلىق شارالار قابىلدانۋى ءتيىس», — دەدى ق. قاسىموۆ.
اتاپ ايتقاندا, ۇيالى تەلەفوندار بويىنشا قازىر سايكەستەندىرۋ شارالارى قابىلداناتىن بولادى. ناتيجەسىندە قازاقستاندا جسن مەن تولقۇجات دەرەكتەرىن ەنگىزبەي ۇرلانعان تەلەفوندى قوسۋ مۇمكىن بولماي قالادى.
ق. قاسىموۆتىڭ ايتۋىنشا, بۇگىنگى تاڭدا قازاقستاندا ۇرلانعان تەلەفونداردىڭ 85-87% قوسىلادى. بۇل تەلەفونداردى رەتتەۋگە قاتىستى ءتيىستى ءتارتىپتىڭ جوقتىعىنان. جۇرگىزىلگەن ساراپتاۋلار ولاردىڭ از بولىگى قحر, رەسەي, وزبەكستان مەن قىرعىزستانعا اكەتىلەتىنىن كورسەتتى.
ق. قاسىموۆ سونىمەن قاتار ۇرلانعان تەلەفونداردى ەل اۋماعىنان شىعارۋ پرەۆەنتسيالارى بويىنشا جوسپارلارى تۋرالى ايتتى.
«ەندى ۇرلانعان تەلەفوندار شەتەلدەردە ساتىلادى. ءبىز بۇل جۇمىستى بىلەمىز, جۇرگىزىپ وتىرمىز. قازىر الدىن-الۋ شارالارىن قابىلداپ جاتىرمىز. ءبىز قاي جەردە, قاي ەلدە ءبىزدىڭ ەلدە ۇرلانعان تەلەفون قوسىلىپ, جۇمىس ىستەپ تۇرعانىن كورسەتەتىن باعدارلامانى ىسكە قوساتىن بولامىز», — دەدى مينيستر.
ق. قاسىموۆ ايتىپ وتكەندەي, باعدارلاما پيلوتتىق رەجيمدە جۇمىس ىستەپ تۇر. ونىڭ ەرەكشەلىگى, باسقا مەملەكەتتەرمەن ءوزارا ارەكەتتەستىكتە جۇمىس ىستەيتىندىگىندە.
ەسكە سالايىق, بۇگىن پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا جەرگىلىكتى پوليتسيانىڭ وڭىرلەردەگى قوعامدىق قاۋىپسىزدىكتى قامتاماسىز ەتۋ بويىنشا جۇمىس تيىمدىلىگى ماسەلەسى قاراستىرىلدى.
بيىل 12 شىلدەدە ىشكى ىستەر ورگاندارىنىڭ قىزمەتتەرىن جەتىلدىرۋگە باعىتتالعان زاڭداردىڭ ءبىرى قابىلداندى. زاڭمەن ىشكى ىستەر دەپارتامەنتتەرى پوليتسيا دەپارتامەنتتەرى بولىپ قايتا قۇرىلدى, ال جەرگىلىكتى پوليتسيا قىزمەتى بۇرىنعى مىندەتتەرى مەن فۋنكتسيالارىن ساقتاي وتىرىپ, قۇرىلىمدىق بولىمشە قۇقىعىمەن ولاردىڭ قۇرامىنا ەنگىزىلدى.
ەندى اكىمدەرگە پوليتسيا دەپارتامەنتتەرىنىڭ باستىقتارىن قىزمەتىنە تاعايىنداۋ جانە بوساتۋ (ىشكى ىستەر ءمينيسترىنىڭ ۇسىنۋى بويىنشا) قۇقىعى جانە پوليتسيا ورگاندارىنىڭ الدىنا پوليتسيانىڭ جەدەل-ىزدەستىرۋ جانە پروتسەسسۋالدىق قىزمەتىنە ارالاسۋسىز, قۇقىقتىق ءتارتىپ پەن قۇقىق بۇزۋشىلىقتار پروفيلاكتيكاسىن قامتاماسىز ەتۋ بويىنشا مىندەتتەردى قويۋ وكىلەتتىلىكتەرى بەرىلگەن. سونداي-اق پوليتسيا دەپارتامەنتتەرىنىڭ باسشىلارى زاڭنامالىق تۇرعىدا اكىمدەر مەن حالىق الدىندا جىلىنا ءبىر رەتتەن كەم ەمەس ەسەپ بەرۋگە مىندەتتەلگەن.
