2014 جىلى قولدانىستاعى سالالىق باعدارلامالاردى وڭتايلاندىرۋ ماقساتىندا وڭىرلەردى دامىتۋدىڭ 2020 جىلعا دەيىنگى بىرىڭعاي باعدارلاماسى قابىلدانعان بولاتىن. بىرىڭعاي باعدارلاماعا «ايماقتاردى دامىتۋ», «مونو-قالالاردى دامىتۋ», «اقبۇلاق», «تۇرعىن ءۇي-كوممۋنالدىق شارۋاشىلىقتى جاڭعىرتۋ», «قولجەتىمدى باسپانا–2020», سونداي-اق شاعىن قالالاردى دامىتۋ باعدارلاماسىنىڭ جوباسى ەنگىزىلگەن ەدى.
باعدارلاما ەلىمىزدىڭ ۇتىمدى اۋماقتىق ۇيىمىن قالىپتاستىرۋ جولىمەن وڭىرلەردىڭ الەۋمەتتىك-ەكونوميكالىق الەۋەتىن دامىتۋ ءۇشىن جاعداي جاساۋ, حالىق كاپيتالىن ەكونوميكالىق ءوسىمى جوعارى ورتالىقتارعا شوعىرلاندىرۋدى كوزدەيدى. باعدارلاما اياسىندا حالىقتىڭ قاي ايماقتا تۇراتىنىنا قاراماستان, ينفراقۇرىلىمدى دامىتۋ ارقىلى تقرعىنداردىڭ ءومىر ءسۇرۋ ساپاسىن ارتتىرۋعا باسا ءمان بەرىلدى.
وڭىرلەردى دامىتۋ باعدارلاماسى ءتورت مىندەتتى شەشۋدى كوزدەيدى:
- ءار ماكرووڭىرگە ارنالعان ينۆەستيتسيالىق باسىمدىقتار,
- ەلىمىزدىڭ اۋماقتىق دامۋىن جەتىلدىرۋ,
- ينجەنەرلىك ينفراقۇرىلىمدى جانە تۇرعىن ءۇي-كوممۋنالدىق شارۋاشىلىقتى جاڭعىرتۋ,
- حالىقتى اۋىز سۋمەن جانە سۋ بۇرۋ قىزمەتتەرىمەن ءتيىمدى جانە ۇتىمدى قامتاماسىز ەتۋ.
ۇلتتىق ەكونوميكا ءمينيسترى ت. سۇلەيمەنوۆ باعدارلامانىڭ بارلىق ماقساتتى ينديكاتورلارى جۇزەگە اسىرىلىپ جاتقاندىعىن حابارلادى.
«2017 جىلدىڭ قورىتىندىسى بويىنشا ءتورت اگلومەراتسيا حالقىنىڭ جالپى سانى 2015 جىلمەن سالىستارعاندا 460,1 مىڭ ادامعا ءوستى جانە 6,2 ملن ادام بولجامىندا 6,6 ملن ادامدى قۇرادى. اگلومەراتسيالار حالقى سانىنىڭ قارقىندى ءوسىمى بيىل دا بايقالادى», — دەدى ت. سۇلەيمەنوۆ.
ەكىنشى ينديكاتور بويىنشا — جان باسىنا شاققاندا نەگىزگى كاپيتالعا سالىنعان ينۆەستيتسيالار كولەمى بويىنشا, قر ۇەم دەرەكتەرىنە سايكەس, جوسپارلى ماندەر ورىندالۋدا, ولار بولىنگەن قاراجات كولەمىنە بايلانىستى جىل سايىن تۇزەتىلۋدە. ءۇشىنشى ينديكاتور بويىنشا — جىلۋمەن-, ەلەكترمەن- جانە گازبەن جابدىقتاۋ جەلىلەرىنىڭ جاڭعىرتىلعان ۇلەسى 2015 جىلى رەسپۋبليكا بويىنشا ورتاشا 4%, 2016 جىلى – 2,1%, 2017 جىلى – 2,8% قۇرادى. 2017 جىلى جىلۋمەن, ەلەكترمەن, گازبەن, سۋمەن جابدىقتاۋ جانە سۋ بۇرۋدىڭ 11 581 كم جەلىلەرى جاڭعىرتىلدى جانە سالىندى.
ءتورتىنشى ينديكاتور — سۋمەن جابدىقتاۋدىڭ جانە سۋ بۇرۋدىڭ ورتالىقتاندىرىلعان جەلىلەرىنە قولجەتىمدىلىك. 2017 جىلى قالالاردا ورتالىقتاندىرىلعان سۋمەن جابدىقتاۋعا قولجەتىمدىلىك (90% جوسپارىندا) 93,8%-دى قۇرادى, ول 2015 جىلعى ماننەن 6,8%-عا جوعارى. بۇل رەتتە اۋىلداردا 57,4%, ول 2015 جىلعى ماننەن 3,5%-عا جوعارى. سونىمەن قاتار, اۋىل حالقىنىڭ ورتالىقتاندىرىلعان سۋمەن جابدىقتاۋمەن قامتاماسىز ەتىلۋى 2017 جىلدىڭ قورىتىندىسى بويىنشا 80,7%-دى قۇرايدى. قالالاردا ورتالىقتاندىرىلعان سۋ بۇرۋعا قولجەتىمدىلىك 88%-دى قۇرادى, ول 2015 جىلعى ماننەن 6%-عا جوعارى. اۋىلداردا – 11,5%, ول 2015 جىلعى ماننەن 0,5%-عا جوعارى.
«كۇردەلى جوندەۋدى تالاپ ەتەتىن كوندومينيۋم وبەكتىلەرىنىڭ ۇلەسىن ازايتۋ جۇمىستارى جۇرگىزىلۋدە. 2017 جىلدىڭ قورىتىندىسى بويىنشا وسى كورسەتكىش رەسپۋبليكا بويىنشا ورتاشا 2015 جىلمەن سالىستىرعاندا 2% تومەندەدى جانە 25% قۇرادى. جاو اقپاراتى نەگىزىندە سۋمەن جابدىقتاۋ جانە سۋ بۇرۋ جەلىلەرىن رەكونسترۋكتسيالاۋ جانە سالۋ ناتيجەسىندە قالالىق جەلىلەردەگى سۋمەن جابدىقتاۋدىڭ اپاتتىلىق كوەففيتسيەنتى 0,35-كە دەيىن, سۋ بۇرۋدا – 0,16-عا دەيىن تومەندەدى. قالالاردا سۋ توعاندارىندا نورماتيۆتىك تازارتىلعان اعىندى سۋلاردىڭ ۇلەسى رەسپۋبليكا بويىنشا ورتاشا 91,1% قۇرايدى, ول 2015 جىلعى كورسەتكىشتەن 10,1%-عا جوعارى», — دەدى ۇلتتىق ەكونوميكا ءمينيسترى.
ت. سۇلەيمەنوۆ قولدانىستاعى وڭىرلەردى دامىتۋدىڭ 2020 جىلعا دەيىنگى ۇكىمەتتىك باعدارلاماسىنىڭ مىندەتتەرىن, نىسانالى ينديكاتورلارىن, ناتيجەلەر كورسەتكىشتەرىن جانە ءىس-شارالارىن وزەكتىلەندىرۋمەن مەملەكەتتىك باعدارلاما مارتەبەسىندە بەكىتۋ بويىنشا جۇمىستار جۇرگىزىلگەنىن ايتتى.
ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا مەملەكەت باسشىسى وڭىرلەردى دامىتۋدىڭ 2020 جىلعا دەيىنگى باعدارلاماسىنا اۋىلدىق ەلدى مەكەندەردى ساپالى اۋىز سۋمەن قامتاماسىز ەتۋ ءۇشىن بارلىق قاراجات كوزدەرىنەن جىل سايىن كەمىندە 100 ملرد تەڭگە ءبولۋدى كوزدەيتىن وزگەرىستەر مەن تولىقتىرۋلار ەنگىزۋ بويىنشا تاپسىرما بەردى. قر 2025 جىلعا دەيىنگى ستراتەگيالىق دامۋ جوسپارىنىڭ ەرەجەلەرىنەن شىعا وتىرىپ, مەملەكەتتىك باعدارلامانىڭ ماقساتى – باسقارىلاتىن كەنتتەنۋ جانە حالىقتىڭ ءومىر ءسۇرۋ ساپاسىن جاقسارتۋ ارقىلى وڭىرلەردىڭ باسەكەگە قابىلەتتىلىگىن ارتتىرۋ دەپ انىقتالعان», — دەدى ۇلتتىق ەكونوميكا ءمينيسترى.
وزەكتەندىرىلگەن مەملەكەتتىك باعدارلاما اياسىندا باعىتتار تۇرعىسىنان فۋنكتسيونالدىق قالالىق اۋدانداردى دامىتۋ, تۇرعىن ءۇي-كوممۋنالدىق شارۋاشىلىق ينفراقۇرىلىمىن دامىتۋ مىندەتتەرىن شەشۋ ۇسىنىلادى.
«قالالاردا جانە اۋىلداردا حالىقتى ورتالىقتاندىرىلعان سۋمەن جابدىقتاۋمەن ودان ءارى قامتاماسىز ەتۋ جۇمىستارى ودان ءارى جالعاستىرىلاتىن بولادى. وسىلايشا, 2019 جىلدىڭ قورىتىندىسى بويىنشا قالالاردا ورتالىقتاندىرىلعان سۋمەن جابدىقتاۋ 97%-دى, ال اۋىلداردا – 62%-دى قۇرايتىن بولادى. مەملەكەت باسشىسىنىڭ تاپسىرماسى اياسىندا مەملەكەتتىك باعدارلاما جوباسىندا شىعىستار اۋىلدىق سۋمەن جابدىقتاۋ جۇيەلەرىن دامىتۋعا 100 ملرد تەڭگەگە دەيىن جەتكىزىلگەن. سونداي-اق حالىقتى سۋمەن قامتاماسىز ەتۋدىڭ ۇتىمدى جانە ءتيىمدى جولدارىنا وتۋمەن سۋمەن جابدىقتاۋ جۇيەلەرىن دامىتۋدىڭ تەتىگى كۇشەيتىلدى. تۇرعىن ءۇي كوممۋنالدىق شارۋاشىلىقتى جاڭعىرتۋ جۇمىستارى جالعاستىرىلاتىن بولادى», — دەپ تۇيىندەدى ت. سۇلەيمەنوۆ.
