وبلىستىق «سولتۇستىك قازاقستان» گازەتىنىڭ باستاماسىمەن بىلتىر ء«تىلىم جاتىر تامىرىنان قىرقىلىپ, جانارىمدا جاسىم سودان تۇر تۇنىپ.تۋعان جۇرتىم قالماسىن دەپ ىركىلىپ, جان جۇرەگىم ءجۇر عوي مەنىڭ جىرتىلىپ» دەگەن ورامدى ويلار, سەرگەك سەزىمدەر, كەستەلى تىلدەر مولىنان كەزدەسەتىن ولەڭدەر, پۋبليتسيستيكالىق ماقالالار توپتاستىرىلعان جيناق جارىق كوردى. ول ءبىلىم العان م.جۇماباەۆ اتىنداعى گۋمانيتارلىق كوللەدجدە ء«تىل – قازىنا» جوباسى اياسىندا ءدارىسحانا اشىلدى. ءومىرى مەن شىعارماشىلىعى سىنىپتان تىس وقۋ ساباعىنا ەنگىزىلدى. ەندى, مىنە ەكى مۇشەل جاسىندا قىرمىزى گۇلدەي مەزگىلسىز سولعان جەرلەسىمىزدىڭ قۇرمەتىنە ۇيىمداستىرىلعان جاس اقىندار ءمۇشايراسى ءوز مارەسىنە جەتىپ, قورىتىندىسى جاريا ەتىلدى.
– جۇرتشىلىققا الدىمەن ايتىسكەر اقىن, كەيىن وتتى جىرلارىمەن تانىلعان نازگۇل قىسقا عانا عۇمىرىندا جاسىنداي جارقىلداپ ءوتتى. مىنەزى ءورشىل, ارمانى اسقاق ەدى. سۇم اجال ارامىزدان بەيمەزگىل الىپ كەتكەنىنە شيرەك عاسىردان استام ۋاقىت وتسە دە, كەشەگىدەي كوز الدىمىزدا جۇرگەن سياقتى, دەي كەلىپ, قازاقستان جازۋشىلار وداعى جەرگىلىكتى بولىمشەسىنىڭ توراعاسى, «قىزىلجار-اقپارات» جشس-ءنىڭ ديرەكتورى جاراسباي سۇلەيمەنوۆ ادەبي كەشكە جينالعاندارعا تىرناقالدى مادەني شارانىڭ جىل سايىن وتكىزىلەتىن داستۇرگە اينالاتىنىن, ماعجان جۇماباەۆ, سماعۇل سادۋاقاسوۆ, سافۋان شايمەردەنوۆ, تاعى باسقا ۇلت تۇلعالارىنا قاتىستى جوبالاردىڭ جۇزەگە اسىرىلىپ جاتقانىن جەتكىزدى. قازاقستان جازۋشىلار وداعىنىڭ مۇشەسى, ارقالى اقىن زەينوللا اكىمجانوۆ, العاشقى ۇستازدارىنىڭ ءبىرى بەكتۇرعان رامازانوۆ, ءسىڭلىسى ايمان تەلمانقىزى, ءدارىسحانا جەتەكشىسى لينا ىسقاقوۆا اقىننىڭ ەشكىمگە ۇقسامايتىن بولمىس-ءبىتىمى, ۇلتجاندى قاسيەتتەرى جايلى ەستەلىكتەرمەن ءبولىستى.
ارنايى كوميسسيا جىر بايگەسىنە ۇكىلەپ قوسىلعان قىرىققا جۋىق ۇمىتكەردىڭ ىشىنەن ەڭ تاڭداۋلىلارىن ىرىكتەدى. ءبىرىنشى ورىنعا ءا.دوسمۇحامبەتوۆ اتىنداعى وبلىستىق دارىندى بالالارعا مامانداندىرىلعان گيمنازيا-ينتەرناتتىڭ وقۋشىسى ديلفۋزا ابدۋكايۋموۆا لايىق دەپ تابىلدى. ەكىنشى ورىندى پاۆلودارلىق التىنبەك ماقساتحان, ءۇشىنشى ورىندى مامليۋتتىك گۇلجامال سۇلەيمەنوۆا يەلەندى. جەڭىمپازدار مەن جۇلدەگەرلەرگە, ونەر ولكەسىنە قادام باسقان باسقا دا تالاپكەرلەرگە دە اقشالاي, زاتتاي سىيلىقتار تابىس ەتىلدى. جىر ءمۇشايراسىن ۇيىمداستىرۋعا بەلسەنە قاتىسقان ۇستازدار ءبىلىم جانە عىلىم مينيسترلىگىنىڭ العىس حاتىمەن ماراپاتتالدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
