مادەني شارانىڭ اشىلۋىندا ءسوز سويلەگەن جوعارىداعى بۇكىلرەسەيلىك مەكەمە-مۋزەي ديرەكتورى ەلانا تيتوۆا حانىم, اتالمىش وقيعا «دوستاستىق مۇراسى, كەلەشەك ءۇشىن داستۇرلەر» اتتى حالىقارالىق باعدارلاما اياسىندا ءوتىپ وتىرعانىن جەتكىزدى. ياعني, باعدارلامانىڭ العاشقى كەزەڭى 2016 جىلى ازەربايجان مەملەكەتتىك مۋزەيى بازاسىندا باكۋ قالاسىندا وتسە, ەكىنشى كەزەڭى وتكەن جىلى بىشكەكتە, ءۇشىنشىسى مىنە بۇگىن ەلوردا تورىندە قانات جايۋدا.
كورمە سورەسىنە قويىلعان ەكسپوناتتاردىڭ باسىم كوپشىلىگى, ناقتىراق ايتقاندا 300-گە جۋىعى ماسكەۋدەن جەتكىزىلىپتى. بۇل جادىگەرلەر ۇيىمداستىرۋشى تاراپتىڭ ءبىرى ساندىك-قولدانبالى جانە حالىقتىق ونەردىڭ بۇكىلرەسەيلىك مۋزەيى قورىنان جانە ستروگانوۆ اتىنداعى ماسكەۋ مەملەكەتتىك كوركەم-وندىرىستىك اكادەمياسى مەن رەسەي سۋرەتشىلەر وداعى قاتارلى مەكەمەلەردەن ارنايى ىرىكتەلىپ الىنعان ەكەن.
كوللەكتسيالار قاتارىنا كىلەم جانە كىلەمشەلەر, كوركەم گوبەلەندەر, تەرى بۇيىمدارى, اۆتورلىق كيىم, كەراميكا, زەرگەرلىك زاتتار, كوركەم مەتالل, تاستان جاسالعان مۇرالار, ويۋلى اعاش, اشەكەيلى پودنوس سىندى قولدانبالى ونەر جادىگەرلەرى توپتاستىرىلعان. وسىلاردىڭ اراسىنان كەيبىرەۋلەرىن اتاپ وتەر بولساق, ءحى-ءحىى عاسىر مۇراسى «ات» سالپىنشاعى («كونەك»), رەسەيدىڭ سولتۇستىك دۆينا اۋدانىنان اكەلىنگەن حح عاسىر تۋىندىسى قاقپاقتى قوبديشا, ۆولوگود گۋبەرنياسىنا ءتان جادىگەر ءحىح عاسىر مۇراسى مىس وجاۋ, ءحىح عاسىردا ارحانگەلسك گۋبەرنياسىندا جاسالعان جۇمساق سۇلگى, سونداي-اق تۆەر گۋبەرنياسى مۇراعاتىنان اكەلىنگەن ايەلدەردىڭ ءارتۇرلى باس كيىمدەرى ت.ب. بار.
سونىمەن قاتار رەسەي قۇرامىنداعى ۇلتتار مۇراسى: داعىستاندىق شەبەردىڭ قولىنان شىققان مىس شەكىمەلەر, تىۆالاردىڭ اق تاستان قاشاپ جاساعان اگالماتوليتتەرى, ساحا اعايىندارىمىزدىڭ قولدانبالى ونەرى – اعاشتان ناقىشتاپ ويىپ جاساعان قىمىز قۇياتىن ىدىس, VI-V عاسىرلارعا ءتان سۇيەكتەن جاسالعان قاسىق, V عاسىردىڭ قولا ايناسى جانە باسقا بۇيىمدار سورە سانىنە كورىك بەرىپ تۇردى.
كورمەنىڭ ەكىنشى ءبولىمىن رەسەيلىك زاماناۋي سۋرەتشىلەردىڭ اۆتورلىق ونەر تۋىندىلارى قۇراعان ەكەن. «بۇل تۋىندىلار وسى جوبا ءۇشىن ارنايى ىرىكتەلىپ الىنعان» دەيدى ۇيىمداستىرۋشىلار. ماسەلەن, ماسكەۋلىك اۆتور اللا شماكوۆانىڭ «پەرىشتەلەر شەرۋى» اتتى گوبەلەنى, گەننادي لەنتسوۆتىڭ «ويۋ سيقىرى» پاننو-تريپتيحى, سونداي-اق 1939 جىلى قازاق داستۇرىنە قاتىستى سا- لىنعان وتە كولەمدى سۋرەتتى ن.نيۆچينسكيدىڭ «بايگە» گوبەلەنى كورەرمەندەر كوزايىمىنا اينالۋدا.
بەكەن قايرات ۇلى,
«ەگەمەن قازاقستان»
