مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى تۇسىرگەن «ورالمان» كوركەم ءفيلمى ۇلتتىق كينەماتوگرافيا ونەرى مەن عىلىمدارى اكادەمياسىنىڭ بارلىق مۇشەسى قاتىسقان جابىق داۋىس بەرۋ قورىتىندىسى بويىنشا ۇزدىك فيلم دەپ تانىلدى. ودان بولەك, ءفيلمنىڭ رەجيسسەرى ءسابيت قۇرمانبەكوۆ ۇزدىك رەجيسسەر, ال باستى ءرولدى سومداعان اكتەر دۋلىعا اقمولدا ۇزدىك اكتەر اتاندى. سونداي-اق «ۇزدىك ستسەناري» اتالىمى بويىنشا ءفيلمنىڭ ستسەناري اۆتورلارى نۇرلان سانجار مەن ءسابيت قۇرمانبەكوۆ ماراپاتتالدى. «ۇزدىك سۋرەتشى» جۇلدەسى ءفيلمنىڭ قويۋشى سۋرەتشىسى رۋستام وديناەۆقا تابىستالسا, «ۇزدىك كومپوزيتور» جۇلدەسى «ورالمان» ءفيلمىنىڭ مۋزىكاسىن جازعان ايدوس ساعاتوۆقا بۇيىردى.
كينەماتوگرافيا سالاسىنداعى ۇلتتىق «تۇلپار» جۇلدەسىن وتاندىق كينەماتوگرافتى قولداۋ, مادەني ەرەكشەلىكتى جانە ۇلتتىق كينويندۋستريا نەگىزىن ساقتاۋ, جەرگىلىكتى جانە حالىقارالىق جۇرتشىلىق اراسىندا قازاقستاندىق ۇزدىك جۇمىستاردى ناسيحاتتاۋ ماقساتىندا قۇرىلعان بولاتىن. اتالمىش جۇلدە – كينەماتوگرافيانىڭ جانە وتاندىق كينونىڭ دامۋىنا ۇلەس قوسقان جەتىستىكتەرى ءۇشىن كينو سالاسى ماماندارىنا بەرىلەتىن كاسىبي ماراپات.
بيىل «تۇلپار» جۇلدەسىندە 2017 جىلدىڭ 1 قازانى مەن 2018 جىلدىڭ 30 قىركۇيەگى ارالىعىندا كورەرمەن نازارىنا ۇسىنىلعان, سونىمەن قاتار پروكاتقا شىعۋعا جوسپارلانعان قازاقستاندىق كوركەم, دەرەكتى جانە انيماتسيالىق فيلمدەر ىرىكتەۋدەن ءوتتى.
حح عاسىردىڭ 30-شى جىلدارى قىزىل اسكەر جەندەتتەرىنىڭ قىسىمىنان تۋعان جەرىن تاستاپ, اۋعانستانعا قونىس اۋدارۋعا ءماجبۇر بولعان قازاق وتباسىنىڭ ارادا وتكەن سانداعان جىلدىق ۇزىلىستەن كەيىنگى ەلگە ورالۋ تاريحى مەن تالايلى تاعدىرى باياندالاتىن فيلم ءوزىنىڭ مازمۇندىق ءمانى مەن كوركەمدىك دەڭگەيىنىڭ جوعارىلىعىن ءار ۋاقىتتا دالەلدەپ كەلەدى. اتاپ ايتار بولساق, كينوتۋىندى بۇعان دەيىن يراننىڭ استاناسى تەگەراندا وتكەن 35-ءشى حالىقارالىق فادجر كينوفەستيۆالى مەن XIII حالىقارالىق «ەۋرازيا» كينوفەستيۆالىنىڭ باس جۇلدەسىن جەڭىپ العان بولاتىن. فيلمدە باستى ءرولدى سومداعان اكتەر دۋلىعا اقمولدا قىركۇيەك ايىندا تاتارستاندا وتكەن XIII حالىقارالىق مۇسىلماندار كينوسى فەستيۆالىندە «ۇزدىك ەر ادام ءرولى» جۇلدەسىمەن ماراپاتتالدى. سونداي-اق كارتينا يتاليادا وتكەن حح حالىقارالىق «Religion Today» كينوفەستيۆالىندە «ۇزدىك فيلم» اتالىمىندا جەڭىسكە جەتىپ, تاۋەلسىز SIGNIS قازىلار القاسىنىڭ ارنايى جۇلدەسىن يەمدەندى. ودان بولەك, گەرمانيادا وتكەن 66-شى حالىقارالىق مانگەيم-حايدەلبەرگ كينوفەستيۆالىندە «ورالمان» ءفيلمى ۇزدىك جەتىستىكتەرى ءۇشىن ارنايى جۇلدەمەن ماراپاتتالسا, اقپان ايىندا نەپالدا وتكەن 22-ءشى حالىقارالىق كينوفەستيۆالدە «شەتەلدىڭ ۇزدىك ءفيلمى» جۇلدەسىن قانجىعاسىنا بايلاعان بولاتىن. ال وسى جىلدىڭ ءساۋىر ايىندا بىشكەكتە وتكەن «اق ءىلبىرىس» ۇلتتىق كينوجۇلدەسىنىڭ قوس بىردەي ماراپاتىنا قول جەتكىزدى: فيلم «ورتالىق ازيانىڭ ۇزدىك ءفيلمى» جۇلدەسىمەن, ال كارتينادا باستى ءرولدى سومداعان اكتەر دۋلىعا اقمولدا «ورتالىق ازيانىڭ ۇزدىك اكتەرى» جۇلدەسىمەن ماراپاتتالدى.
نازەركە جۇماباي,
«ەگەمەن قازاقستان»
