استانا قالالىق دەپارتامەنتىنىڭ جەتەكشىسى جازيرا جىلقىشيەۆانىڭ ايتۋىنشا, قازىرگى كەزدە مەملەكەتتىك قىزمەتشىلەردىڭ ەڭبەكاقىسى تەك ەكى پارامەترگە - جۇمىس ءوتىلى مەن اتقاراتىن لاۋازىم ساناتىنا عانا نەگىزدەلگەن. الايدا, اتقارىلاتىن جۇمىستىڭ قيىندىعى مەن قىزمەتكەردىڭ تيىمدىلىگى ەسكەرىلمەيدى. ال سىياقىلار مەن ۇستەمەاقىلار بارىنە بىردەي كولەمدە تولەنەدى.
- بۇل جۇيە 14 جىل بۇرىن ەنگىزىلگەن بولاتىن. سونىڭ سالدارىنان ورتالىق جانە ايماقتىق, مەملەكەتتىك جانە جەكە سەكتور قىزمەتشىلەرى اراسىندا ەڭبەكاقى تولەمىندە تەڭسىزدىكتەر تۋىندادى. جالاقى تولەۋدىڭ جاڭا جۇيەسى اتالعان كەمشىلىكتەردى جويۋدى كوزدەيدى, - دەدى ج.جىلقىشيەۆا استانادا وتكەن ءباسپاسوز ءماسليxاتىندا.
ونىڭ ايتۋىنشا, پيلوتتىق جوبا ورتالىق جانە جەرگىلىكتى مەملەكەتتىك ورگان قىزمەتشىلەرىنىڭ جالاقىلارىن تەڭەستىرۋگە مۇمكىندىك بەرىپ وتىر. «مىسالى, بۇرىن استانا قالاسى اكىمدىگىنىڭ باس مامانى مينيسترلىكتە وتىرعان باس ساراپشىدان ورتاشا ەسەپپەن اي سايىن 70 پروتسەنتكە از جالاقى الاتىن. ول - شامامەن 115 مىڭ تەڭگە. قازىرگى كەزدە ونداي ايىرماشىلىق 10 پروتسەنتتى قۇرايدى. اكىمدىكتىڭ باس ساراپشىسى 210 مىڭ تەڭگە الادى. سونىڭ ارقاسىندا استانا قالاسىنىڭ جەرگىلىكتى اتقارۋشى ورگاندارىندا كادرلاردىڭ كەتۋى ەكى ەسەگە ازايدى. بيىلعى 8 ايدا تەك 16 ادام جۇمىستان كەتتى. بوس ورىنعا كونكۋرستار 7 ەسە ءوستى. بۇرىن ءبىر بوس جۇمىس ورنىنا ەكى-اق ۇمىتكەردەن تىركەلسە, ەندى ولاردىڭ سانى جيىرما ادامعا جەتتى», - دەپ اتاپ كورسەتتى ج.جىلقىشيەۆا.
جاڭا جۇيەنىڭ تاعى ءبىر ەرەكشەلىگى - جۇمىس تاجىريبەسىن ەسەپتەۋدىڭ تىڭ ءتارتىبى. بۇرىن جالپى مەملەكەتتىك قىزمەت ءوتىلى ەسكەرىلەتىن بولسا, ەندىگى جەردە ۇقساس لاۋازىمدار بويىنشا فۋنكتسيونالدىق باعىتتارداعى تاجىريبەسى ەسكەرىلەدى. ماسەلەن, كەڭسە باس مامانى باسقا مەملەككەتتىك ورگانعا اۋىسسا, جاڭا جۇمىس ورنىندا ونىڭ لاۋازىمدىق تاجىريبەسى ەسكەرىلەتىن بولادى. بۇدان بولەك, بولاشاقتا جوعارىلاتۋ كەزىندە جالاقىنى بەلگىلەگەندە تومەن تۇرعان لاۋازىمداعى جۇمىس ءوتىلى دە ەسكەرىلەدى. ونداي تاسىلدەردى ەىدۇ وزىق ەلدەرى (فرانتسيا, گەرمانيا, اقش) قولدانادى.
