بۇگىندە وڭىردەگى ونەركاسىپتىك نىسانداردا 74 ليفت تىركەۋگە الىنسا, ولاردىڭ 14-ءى جاڭالانعان. قالعاندارى ەسكىرگەن, توزىعى جەتكەن, پايدالانۋ ۋاقىتى ءوتىپ كەتكەن. ارالارىندا قولدانىلۋ مەرزىمى شيرەك عاسىردان اسقان قوندىرعىلار دا بار. جۇرگىزىلگەن مونيتورينگتىڭ ناتيجەسى بويىنشا 8 كاسىپكەرلىكتەگى ليفتتەردىڭ تەحنيكالىق تالاپتارعا ساي ەمەستىگى انىقتالعان. بۇل ولقىلىقتار ەكى ايدىڭ ىشىندە تۇزەتىلمەسە كىشى كاسىپكەرلىكتەرگە – 30, ورتا كاسىپ يەلەرىنە – 50, ال ءىرى بيزنەس نىساندارىنا – 100 ايلىق ەسەپتىك كورسەتكىش كولەمىندە ايىپپۇل سالىنادى. “تيميريازەۆ ەلەۆاتورى” سەرىكتەستىگى قوندىرعىنى اۋىستىرۋدىڭ جوبالىق قۇجات دايىنداپ, راسىمدەۋ شارالارىن اياقتاپتى. ونەركاسىپتىك ليفتىلەردىڭ 14-ءى وبلىس ورتالىعىندا, 60-ى اۋدانداردا ورنالاسقان.
كوپقاباتتى تۇرعىن ۇيلەردەگى جەدەلساتىلاردىڭ جايى دا سىن كوتەرمەيدى. 338 ءليفتىنىڭ باسىم بولىگى وتكەن عاسىردىڭ 80-ءشى جىلدارى ورناتىلىپتى. قولدانىلۋ مەرزىمىنىڭ اياقتالۋىنا وراي وسىدان 10 جىل بۇرىن جاڭارتىلۋى ءتيىس بولعانىمەن, ءالى كۇنگە دەيىن پايدالانىلىپ كەلەدى. ابدەن ەسىرگەن مۇنداي قوندىرعىلاردىڭ سانى–178.
بۇگىنگە دەيىن ليفتىلەردى جاڭارتۋ “تۇرعىن ءۇي كوممۋنالدىق شارۋاشىلىقتى جاڭعىرتۋ” باعدارلاماسى اياسىندا جۇزەگە اسىرىلىپ, 2011 جىلى – 5, 2012 جىلى – 14, 2015 جىلى – 15 جەدەلساتى جاڭاسىنا اۋىستىرىلعان. وكىنىشكە وراي, سوڭعى 3 جىلدا بۇل سالادا ەشقانداي ىلگەرىلەۋدىڭ جوقتىعى اڭعارىلادى. ءبىر ءليفتتىڭ باعاسى – 8 ميلليون, ورناتۋى – 3-4 ميلليون. مۇنداي قاراجاتقا تۇرعىندار مەن پاتەر يەلەرى كووپەراتيۆتەرىنىڭ شاماسى جەتە بەرمەيدى», دەيدى ونەركاسىپتىك قاۋىپسىزدىك سالاسىنداعى مەملەكەتتىك قاداعالاۋ جونىندەگى دەپارتامەنتتىڭ ينسپەكتورى ماقسۇت ءمۇسايىپوۆ.
ءتيىستى ورىندار قولدانىلۋ مەرزىمى ءوتىپ كەتكەن قوندىرعىلار 2020 جىلعا دەيىن اۋىستىرىلماسا, قولدانۋعا قاتاڭ تىيىم سالىناتىنىن ەسكەرتەدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
