«وسى باعىتتا اتىراۋ وبلىسىندا وتكەن جىلى وڭىرلىك شتاب قۇرىلدى. مەملەكەتتىك ورگانداردىڭ اقپاراتتىق جۇيەلەرىندە ازاماتتار ستاتۋسىن اكتۋالداندىرۋ جانە ولاردى فورماليزاتسيالاۋ بويىنشا كوپتەگەن جۇمىستار اتقارىلدى», - دەيدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ۇلىقبەك تىناليەۆ.
باسقارما وكىلىنىڭ ايتۋىنشا, جىل باسىندا 54 668 ادامنىڭ ستاتۋسى بولماعان, 12 قىركۇيەكتەگى مالىمەت بويىنشا 22 922 ادامنىڭ ستاتۋسى سايكەستەندىرىلدى. ماماندار ارنايى تىزىممەن ۇيلەردى ارالاپ, «مىندەتتى جارنالارىن تولەمەي جۇمىس ىستەيتىن جۇمىسشىلار» جانە ء«وزىن-ءوزى جۇمىسپەن قامتىعاندار» رەتىندە بەلگىلى بولعان ادامدارعا ستاتۋستارىن انىقتاۋ جانە تۇسىنىكتەمە الۋ ءۇشىن جۇمىسپەن قامتۋ ورتالىقتارىنا, مەملەكەتتىك ەڭبەك ينسپەكتسياسىنا, اۋىل اكىمدەرىنە جۇگىنۋ قاجەتتىلىگى تۋرالى حابارلاما بەردى. ەندى «ستۋدەنتتەر», «شىعىپ كەتكەندەر» جانە «قايتىس بولعاندار», «تىركەلمەگەن جۇمىسسىزدار مەن ءوزىن-ءوزى قامتيتىندار» ساناتتارى بويىنشا اكتۋالداندىرىلماعان 31 746 ادام قالىپ وتىر.
«الداعى ۋاقىتتا فورمالدى ەمەس جۇمىسپەن قامتىلعان ادامداردى فورماليزاتسيالاۋ ماقساتىندا «بىرىڭعاي جيىنتىق تولەمدى» ەندىرۋ زاڭ جوباسى قولدانىسقا ەنەدى. بۇل زاڭ جوباسى ادامداردى مەديتسينالىق جانە الەۋمەتتىك ساقتاندىرۋ, زەينەتاقىمەن قامسىزداندىرۋ جۇيەلەرىنە تارتۋ, ءوزىن-ءوزى جۇمىسپەن قامتىعان ادامدار ساناتىنا قوسۋ شارالارىن الۋ ماقساتىندا جۇرگىزىلەدى», - دەيدى ۇلىقبەك تىناليەۆ. باعدارلاما اياسىندا 2 053 اتىراۋلىق جۇمىسپەن قامتىلعان.
باقىتگۇل باباش,
«ەگەمەن قازاقستان»
اتىراۋ
