جاستاردى الەۋمەتتەندىرۋ جانە جۇمىسپەن قامتۋ بويىنشا جول كارتاسىنىڭ جوباسىمەن تانىستىرعان مينيستر, ءبىزدىڭ ەلدە جۇمىسسىز جاستاردىڭ سانى جىل سايىن كەمىپ كەلەتىنىن تىلگە تيەك ەتتى. وعان مىسال, 14 پەن 29 جاس ارالىعىنداعى جۇمىسسىز جاستاردىڭ ۇلەسى 2001 جىلى 18,6 پروتسەنتتى قۇراسا, بيىلعى كورسەتكىش بويىنشا جۇمىسسىزدىڭ دەڭگەيى 7,7 پروتسەنتكە دەيىن كەمىگەن.
جۇمىسسىزدىق دەڭگەيىنىڭ تومەندەۋ كورسەتكىشىن ءبىلىم جانە عىلىم ءمينيسترى ەرلان ساعاديەۆ تە راستاپ, 2015 جىلمەن سالىستىرعاندا جاستار اراسىنداعى جۇمىسسىزدىق 4,2 پروتسەنتتەن 2017 جىلى 3,8 پروتسەنتكە دەيىن كەمىگەنىن جەتكىزدى. ونىڭ ايتۋىنشا, وسىنداي ناتيجەگە قول جەتكىزۋگە «جۇمىسپەن قامتۋدىڭ جول كارتاسى–2020», «جاسىل ەل», «ديپلوممەن اۋىلعا!», «جاستار پراكتيكاسى», «ماڭگىلىك ەل جاستارى – يندۋسترياعا! (سەرپىن)» سەكىلدى جانە تاعى باسقا الەۋمەتتىك باعدارلامالار مەن جوبالار مۇرىندىق بولىپ وتىر. مىسالى, 2014 جىلدان باستاپ ىسكە اسىرىلىپ كەلەتىن «سەرپىن» جوباسى اياسىندا 9 وبلىستاعى 26 جوعارى وقۋ ورىندارىندا 12 344 ستۋدەنت جانە 7 وڭىردە 37 كوللەدجدە 2276 ستۋدەنت ءبىلىم الۋدا. اسىرەسە, الەۋمەتتىك جاعىنان از قامتىلعان جانە دە كوپ بالالى وتباسىلارىنان شىققان بالالار اتالعان جوبا ارقىلى ءوز بىلىكتىلىكتەرىن ارتتىرۋعا مۇمكىندىك الىپ وتىر. بۇعان قوسا وتكەن جىلدان باستاپ بارشاعا ارنالعان تەگىن تەحنيكالىق-كاسىپتىك ءبىلىم بەرۋ جوباسى ىسكە اسىرىلۋدا. جوبا شەڭبەرىندە كوللەدجدەردە مەملەكەتتىك ءبىلىم بەرۋ تاپسىرىسى 54 پروتسەنتكە دەيىن كوبەيدى.
ەڭبەك جانە حالىقتى الەۋمەتتىك قورعاۋ ءمينيسترى مادينا ابىلقاسىموۆا ءوز بايانداماسىندا 2018 جىلعى ءىى توقساننىڭ قورىتىندىسى بويىنشا جاستار اراسىنداعى جۇمىسسىزدىق دەڭگەيى 3,8 پروتسەنتى قۇرايتىنىن جەتكىزدى. بۇل دەگەنىمىز بۇگىنگى كۇنى 82,4 مىڭ ادام جۇمىسسىز رەتىندە تىركەلىپ وتىر دەگەن ءسوز. ال جۇمىسپەن قامتىلعان جاستاردىڭ جالپى سانى 2,1 ملن ادام.
ونىڭ ىشىندە 1,5 ميلليونى جالدامالى جۇمىسكەرلەر بولسا, ال 456 مىڭى ءوزىن-ءوزى جۇمىسپەن قامتىعاندار قاتارىنا جاتادى. ەلىمىزدەگى جاستاردىڭ 36 پروتسەنتى جوعارى ءبىلىمى, 39 پروتسەنتى ارنايى ورتا ءبىلىم العان. ال قالعان 25 پروتسەنت نەگىزگى ءبىلىم العان جاستارعا تيەسىلى بولىپ وتىر. بۇگىنگى كۇنگى كورسەتكىش بويىنشا ەلىمىزدە جىل سايىن 21 مىڭنان استام ادام تەحنيكالىق جانە جۇمىسشى كاسىپتەرىنە وقىتىلادى.
ەركەجان ايتقازى,
«ەگەمەن قازاقستان»
