باعدارلاما قۇراستىرۋشىلارى جوبانىڭ ماقساتى قازاقستانداعى رەيدەرلىك شابۋىلداردان قورعانۋدىڭ جۇيەلەرىن جەتىلدىرۋ بولىپ تابىلاتىندىعىن ايتادى. سەبەبى مۇنداي تۇيتكىل بار جانە ونىڭ وتە وزەكتى ەكەندىگىن جاسىرا المايمىز. اتالمىش شوۋدىڭ العاشقى شىعارىلىمىن تاماشالاعانداي, جۇرتشىلىق ونىڭ الداعى تۇسىرىلىمدەرىن دە YouTube-تاعى Taza Niet ارناسىنان كورەتىن بولادى.
جوبانىڭ العا قويعان مىندەتى قاراپايىم: كەدەرگىگە تاپ بولعان كاسىپكەر كورەرمەندەر مەن قۇرامىندا زاڭگەرلەر, جۋرناليستەر, بلوگەرلەر, باس پروكۋراتۋرا, سىبايلاس جەمقورلىققا قارسى ءىس-قيمىل ۇلتتىق بيۋروسى, جوعارعى سوت جانە تاعى باسقا دا قۇزىرلى مەكەمە وكىلدەرىنەن تۇراتىن ساراپشىلارعا ءوز ماسەلەسىن ەش بۇكپەستەن ايتا الادى. تالقىلاۋدان سوڭ ساراپشىلار تۇيتكىلدى شەشۋدىڭ مۇمكىن جولدارىن نۇسقايدى. كورەرمەندەردىڭ كوز الدىندا كەز كەلگەن كاسىپكەردىڭ الدىنان شىعۋى مۇمكىن كەلەڭسىز جايتتار ايقىن ءارى ناقتى كورسەتىلەدى.
توك-شوۋدىڭ ءار باعدارلاماسىندا ءتۇرلى سالانىڭ بەلدى جانە بەدەلدى تۇلعالارىنان تۇراتىن 10 قوناق قاتىسادى. ۇيىمداستىرۋشىلار كاسىپكەرلەردىڭ وتكىر ماسەلەلەرىنە قوعام نازارىن اۋدارادى. باعدارلامانىڭ ءبىرىنشى شىعارىلىمىنا قاتىسقان ساراپشىلار نەبىر قيىندىقتارعا توتەپ بەرەمىن دەپ كاسىبى مەن بوستاندىعىنان, سوڭىندا ءتىپتى دەنساۋلىعىنان ايىرىلىپ, دۇنيە سالعان كاسىپكەر سايات ءتۇسىپوۆتىڭ باسىنان وتكەن وقيعالارىن جان-جاقتى تالقىعا سالىپ, شىندىقتى اشۋعا تىرىستى. سەبەبى بيزنەسمەننىڭ ءومىرىنىڭ سوڭى قات-قابات قيىندىقتارعا ۇلاسىپ, كۇننەن-كۇنگە ۋشىعا تۇسكەن. باسىندا ىسىك پايدا بولعانىنا قاراسماستان, ول تەرگەۋ يزولياتورىنا جاتقىزىلىپ, 2016 جىلى جان ءتاسىلىم ەتەدى.
باعدارلاماعا ونىڭ جەسىرى نازيرا ءتۇسىپوۆا دا كەلدى. كاسىپكەردىڭ سوڭعى كۇندەرىن بايانداعان كەلىنشەكتىڭ اڭگىمەسىنەن كەيىن باعدارلاما جۇرگىزۋشىسى رۋسلان قۇماربەك ۇلىنىڭ ورتاعا ساۋال تاستاۋىمەن اۋديتوريادا قىزۋ پىكىرتالاس ورنادى.
باستاما كاسىپكەرلەردىڭ ماسەلەلەرىن بايانداپ قانا قويمايدى, ول سونداي-اق تۇيتكىلدەردىڭ شەشىلۋ جولدارىن كورسەتۋگە باعىتتالعان.
كوپشىلىككە كەز كەلگەن كاسىپكەردىڭ الدىنان شىعۋى مۇمكىن توسقاۋىلدار انىق كورسەتىلىپ, تولىققاندى جاۋاپتار بەرىلەدى. سونىمەن قاتار بارلىق شىنايى وقيعالار مەن ساراپشىلاردىڭ پىكىرلەرى كورەرمەندەردىڭ جەكە قۇقىقتىق ساۋاتتىلىعىن قالىپتاستىرۋعا كومەكتەسەدى.
ايتا كەتسەك, «تازا نيەت» توك-شوۋى پرەزيدەنتتىڭ «رۋحاني جاڭعىرۋ» باعدارلاماسىنىڭ «ىسكەر ازامات – ەل تىرەگى» باعىتى اياسىندا قولعا الىنىپ وتىر. «ىسكەر ازامات – ەل تىرەگى» قوعامنىڭ بيزنەسكە دەگەن سەنىمىن جانە كاسىپكەرلەردىڭ تانىمىن ارتتىرۋ سياقتى ەكى باعىت بويىنشا جۇزەگە اسىرىلىپ كەلەدى.
ارنۇر اسقار,
«ەگەمەن قازاقستان»
