بيىل اقتوبە ايماعىندا 26 مەكتەپتىڭ قۇرىلىسى قىزۋ ءارى توقتاۋسىز جۇرگىزىلۋدە. اتالعان ءبىلىم بەرۋ نىساندارى تولىق ىسكە قوسىلعان كەزدە 10 مىڭنان استام وقۋشىنىڭ جاڭا ءبىلىم بەرۋ ستاندارتتارىنا ساي زاماناۋي قۇرال-جابدىقتارمەن جابدىقتالعان ساۋلەتتى ورىندا ءبىلىم الۋىنا مۇمكىندىك تۋماق. سونىمەن بىرگە وڭىردە مەكتەپ عيماراتتارىنا جاسالاتىن كۇردەلى جوندەۋ جۇمىستارى تىڭ سەرپىن الدى. جەتپىسكە تارتا ءبىلىم نىساندارى جاڭا وقۋ جىلىنا دەيىن قايتادان جاڭعىرتىلدى. جۇمسالعان قاراجات مولشەرى – 2 ميلليارد تەڭگەگە جۋىق.
جالپى ءبىلىم بەرۋ مەكەمەلەرىن جاڭا وقۋ جىلىنا ازىرلەۋ تەك بىرىڭعاي جاڭا مەكتەپ عيماراتتارىن پايدالانۋعا بەرۋمەن نەمەسە وعان كۇردەلى جوندەۋلەر جۇرگىزۋمەن شەكتەلمەيدى. بۇل كەشەندى ءارى ۇزدىكسىز ۇدەرىس. وسى ورايدا 2018-2019 وقۋ جىلىندا مەكتەپ وقۋشىلارى پايدالانۋعا قاجەتتى وقۋلىقتاردى جەتكىزۋ ءىسى دە بەلگىلەنگەن كەستەگە ساي رەتىن تاپتى. ءارى مەكتەپتەردىڭ ماتەريالدىق-تەحنيكالىق بازاسىن ودان ءارى جاڭعىرتۋ باعىتىندا قولدا بار مۇمكىندىكتەر مەن الەۋەتتەر قاراستىرىلدى. بۇعان قوسا وبلىستاعى ءبىلىم بەرۋ مەكەمەلەرىن سپورتتىق قۇرال-جابدىقتارمەن قامتۋ جونىندە قاجەتتى شەشىمدەر قولايىن تاپقان. بۇل جونىندە وبلىستىق ءبىلىم باسقارماسىنىڭ باسشىسى ءلاززات ورازباەۆا ايتىپ بەردى.
«وبلىس اۋماعى ۇلكەن. سالىستىرمالى تۇردە ايتقاندا, ءوڭىر اۋماعىنا ەۋروپانىڭ 2-3 شاعىن مەملەكەتى سىيىپ كەتەدى. مۇنداي جاعدايدا شالعاي اۋىلدارداعى ءبىلىم بەرۋ نىساندارى مەن مەكتەپكە دەيىنگى تاربيە مەكەمەلەرىنىڭ جاي-كۇيىن جان-جاقتى ويلاستىرماي وتىرا المايمىز. قازىر كۇن سالقىنداي باستادى. وسىنداي قاربالاس شاقتا الىستاعى اۋىل مەكتەپتەرىن جىلىتۋ ءۇشىن سۇيىق جانە قاتتى وتىنمەن تولىق قامتۋ ماسەلەسى دە ۇدايى نازاردا. بۇل جاۋاپتى ءىس قازانعا دەيىن اياقتالادى», دەدى ول.
تەمىر قۇسايىن,
«ەگەمەن قازاقستان»
اقتوبە
