اكتسيا اياسىندا جاستار ورتالىعىنىڭ ەرىكتىلەر توبى مەن «جاسىل ەل» ەڭبەك جاساعىنىڭ جاستارى ماڭعىستاۋ اۋداندىق سوت ۇجىمىندا بولىپ, جۇمىس بارىسىمەن تانىستى.
اكتسيا اياسىندا اۋداندىق سوتتىڭ سۋدياسى س.بەردىبەكوۆ زاڭدارداعى وزگەرىستەرگە توقتالىپ, ءۇش ساتىلى سوت جۇيەسىنە كوشۋ, سۋديالىق لاۋازىمعا كانديداتتارعا قويىلاتىن بىلىكتىلىك تالاپتارىن كۇشەيتۋ, جوعارعى سوت جانىنان سوت تورەلىگى اكادەمياسىن قۇرۋ, سۋديالاردىڭ جاڭا ادەپ كودەكسىن ازىرلەۋ, سوت ءجيۋريىنىڭ جۇمىسىن جاڭعىرتۋ, تەرگەۋ سۋديالارىنىڭ وكىلەتتىگىن ارتتىرۋ, القابيلەر سوتى قارايتىن ىستەر قاتارىن كەڭەيتۋ سەكىلدى ماسەلەلەردى جاستارعا كەڭىنەن ءتۇسىندىرىپ بەردى.
جاستار سۋدياعا وزدەرىن مازالاعان سۇراقتارىن قويىپ, تۇشىمدى جاۋاپتارىن الدى. اكتسياعا قاتىسقان جاستار قىلمىس پەن قۇقىق بۇزۋشىلىقتىڭ نە ەكەنىن ۇعىنىپ, زاڭنىڭ ۇستەمدىگىن كەڭىنەن ءتۇسىندى.
شارادا اۋداندىق سوت توراعاسى جۇماباي ءجانادىلوۆ: «ۋاقىت تالابىنا تولىق سايكەس كەلەتىن جاڭا ازاماتتىق پروتسەستىك كودەكس پەن «جوعارى سوت كەڭەسى تۋرالى» جاڭا زاڭ قولدانىسقا ەندى. «سوت جۇيەسى جانە سۋديالاردىڭ مارتەبەسى تۋرالى» كونستيتۋتسيالىق زاڭعا, قىلمىستىق-پروتسەستىك كودەكس پەن اكىمشىلىك قۇقىق بۇزۋشىلىقتار تۋرالى كودەكسكە ءتيىستى وزگەرىستەر ەنگىزىلدى. وسىلايشا بۇگىن بارلىق دەڭگەيدەگى سوتتار جاڭا قىلمىستىق جانە قىلمىستىق پروتسەستىك زاڭناما بويىنشا جۇمىس ىستەۋدە. ءۇش بۋىندى سوت جۇيەسى ەۋروپانىڭ كوپتەگەن دامىعان ەلدەرىندە قالىپتاسقان ءۇردىس. مۇنداعى باستى ماقسات – ازاماتتاردى اۋرە-سارساڭعا سالماي, سوت ادىلدىگىنە قول جەتىمدىلىكتى ارتتىرۋ بولىپ تابىلادى. ول دەگەنىمىز – ءۇش ساتىلى سوت جۇيەسى ءىس بويىنشا سوت شەشىمىنىڭ جەدەل قابىلدانۋىنا نەگىز قالايدى», دەدى.
قالامپىر تولەگەنقىزى,
جاستار ورتالىعىنىڭ مامانى
ماڭعىستاۋ وبلىسى,
ماڭعىستاۋ اۋدانى
