كورسەتىلىمگە سىرتقى ىستەر ءمينيسترىنىڭ ورىنباسارى رومان ۆاسيلەنكو مەن ءفيلمنىڭ باستى كەيىپكەرى, اتوم جوباسىنىڭ قۇرمەتتى ەلشىسى كارىپبەك كۇيىكوۆ قاتىسىپ, ءسوز سويلەدى.
ادامزاتتىڭ باسىنا تونگەن اتوم اجداھاسىنىڭ زاردابىن دۇنيە جۇزىنە جەتكىزۋدە رەجيسسەر كوپ تەر توككەنى كورىنىپ تۇردى. فيلم سەمەي يادرولىق پوليگونى ماڭىنداعى حالىقتىڭ قاسىرەتى جالپى ادامزاتتىق زۇلمات ەكەنىن الەمگە پاش ەتۋگە تىرىسقان. كارىپبەك كۇيىكوۆ سياقتى اتومدىق الاپاتتىڭ زارداپ شەگۋشىلەرىنىڭ قازاق دالاسىندا مىڭداپ سانالاتىنىن كورسەتۋمەن قاتار, رەجيسسەر ولاردىڭ ايانىشتى تاعدىرىنا ادامزاتتىڭ نازارىن اۋدارادى. «نە ءۇشىن, كىم ءۇشىن كەيبىر ەلدىڭ بيلەۋشىلەرى اتوم اجداھاسىن شىعارىپ, ونى قولدانعىسى كەلەدى؟ ءاربىر قولدانعان اتوم بومباسىنان كەيىن جارىمجان ادامدار تۋعانىن قالاي ما؟ ونىڭ قاسىرەتى بارلىق ادامزاتقا بىردەي ەمەس پە؟» دەگەن سۇراقتاردى ءوزدى-وزىنە قويعان ا.سينگەر اقش-تاعى «نەۆادا» يادرولىق پوليگون ايماعىنىڭ, جاپونيانىڭ حيروسيمو, ناگاساكي قالاسى تۇرعىندارىن دا سويلەتىپ, ولاردىڭ قانداي قاسىرەتكە ۇشىراعانىن تۇسىرگەن. كارىپبەك تە فيلمدە باسىنان وتكەن جايلاردى اشىق ايتىپ, ءار بومبا سىنالعان سايىن وزدەرىنىڭ ۇيلەرى ءجۇرىپ كەتكەندەي بولاتىنىن, بارلىق شىنى ىدىستار سىڭعىرلاپ, جيھازدار تەڭسەلىپ, توبە سەلكىلدەپ, ءۇي دىرىلدەپ كەتەتىنىن ايتتى. الدىندا ەكى بالاسى ءولى تۋعان اناسى جاڭا شاراناسىنىڭ ەكى قولى جوق ەكەنىن كورگەندە ەسى شىعىپ كەتكەنىن, دارىگەرلەر بالانى ماڭگىلىككە ۇيىقتاتىپ تاستاۋ تۋرالى كەڭەس بەرگەنىن, تەك اكەسى جانى بار شاقالاقتى ولىمگە قيماي, ۇيىنە الىپ كەلگەنىن ايتقان كەزدە ەستىپ وتىرعاندار اۋىر كۇرسىنىپ وتىردى. بەت اۋىزى بىتەۋ ىسىكتى بالالار, اياق-قولى عانا ەمەس كوز-قۇلاقتارى جوق جاندار اتوم قاسىرەتىن بارشا الەمگە ايداي ەتىپ اشكەرەلەپ تۇر.
بۇل فيلم بۇۇ-دا كورسەتىلۋىمەن قاتار, الەمنىڭ تالاي ءىرى ورتالىقتارىندا ۇسىنىلىپ, قازاقستاندىق اتوم جوباسىن قولداۋشىلار سانىن كوبەيتكەن ەكەن. ءفيلمدى تۇسىرگەن بريتاندىق كينوستۋديانىڭ اتاۋى «Spring Films». ارينە باسقا دا بىرنەشە ستۋديا وسى تاقىرىپتا فيلمدەر تۇسىرگەن, بىراق مىنا ستۋديانىڭ ءونىمى ايرىقشا ەكەن. ول باسىنان اياعىنا دەيىن كورەرمەندەردى جالىقتىرمايتىن, تارتىمدى تۋىندى ەكەنى كورىنىپ تۇردى.
جاقسىباي سامرات,
«ەگەمەن قازاقستان».
