قالا باسشىسى باۋىرجان بايبەك اياقتالۋعا جاقىن جاتاقحانالار قۇرىلىسىمەن تانىستى. ستۋدەنتتەردى جاتاقحانامەن تولىق قامتاماسىز ەتۋ ءۇشىن سوڭعى ءۇش جىلدا 37 جاتاقحانا سالۋ جوسپارلانىپ وتىر. قالا اكىمدىگى ءباسپاسوز قىزمەتىنىڭ مالىمەتى بويىنشا, بيىل قولدانىسقا ءتورت جاتاقحانا بەرىلەدى. ال 12 جوعارى وقۋ ورنىندا 4,8 مىڭ ورىندىق جاتاقحانا قۇرىلىسى ءۇشىن ارنايى ۋچاسكەلەر انىقتالعان. سونداي-اق قالادا 19 جاتاقحانا سالۋ ءۇشىن جەر تەلىمدەرى بەرىلىپ وتىر.
ب.بايبەك جۇمىس ساپارى بارىسىندا بوستاندىق اۋدانىندا سالىنعان 400 ورىندىق التى قاباتتى جاڭا جاتاقحانامەن تانىستى. بۇگىندە مۇندا تۇرعىن جانە تۇرمىستىق بولمەلەردى جيھازبەن جابدىقتاۋ جۇمىستارى جۇرگىزىلۋدە. قازاقستان ينجەنەرلىك-تەحنولوگيالىق ۋنيۆەرسيتەتى قالا سىرتىنداعى ستۋدەنتتەرگە ارنالعان تۇرعىن ۇيگە قاجەتتىنىڭ بارلىعىن قامتاماسىز ەتەتىن بولادى.
س.اسفەندياروۆ اتىنداعى قازۇمۋ جانىنداعى 600 ورىندىق توعىز قاباتتى جاتاقحانا قۇرىلىسى دا اياقتالۋعا جاقىن. قازىرگى ۋاقىتتا الاڭى 11 مىڭ شارشى بولاتىن عيماراتتىڭ ىشكى ارلەۋ جانە كورىكتەندىرۋ جۇمىستارى جۇرگىزىلۋدە.
الماتىدا سونىمەن قاتار «الماتى جاستارى» باعدارلاماسى جالعاسىن تابۋدا. جاس وتباسىلارعا جەكە تۇرعىن ءۇي ساتىپ الۋعا مۇمكىندىك بەرۋ ماقساتىندا باستاپقى تولەمسىز 5% مولشەرىمەن 2 ملرد تەڭگە قاراستىرىلعان.
سوڭعى جىلدارى الماتىدا تۇرعىن ءۇي قۇرىلىسىنىڭ قارقىنى 4 ەسەگە ءوسىپ, كەزەكتە تۇرعان ءاربىر ءۇشىنشى تۇرعىن پاتەرگە يە بولعان. ال جۋىق ارادا 17 مىڭنان اسا پاتەر سالىناتىن بولادى.
ەلۆيرا سەرىكقىزى,
«ەگەمەن قازاقستان»
الماتى
