– بۇل سىن اشەيىن جارىس ەمەس, ونىڭ ءمانى – جاۋىنگەرلەرىمىزدىڭ سايىسكەرلىك رۋحىن كوتەرۋ, اسكەري ارىپتەستىك سەنىمىن ارتتىرۋ, - دەدى شارانىڭ اشىلۋ سالتاناتىندا قازاقستان رەسپۋبليكاسىنىڭ قورعانىس ءمينيسترى نۇرلان ەرمەكباەۆ. – وسى باسەكەگە قىزىعۋشى اسكەري قىزمەتكەرلەردىڭ قاتارى ءبىزدىڭ ەلىمىزدە دە, شەتەلدىك ارىپتەستەرىمىزدىڭ اراسىندا دا جىل سايىن ارتىپ كەلەدى. مەرگەندەر سايىسى دەگەنىمىز – نىساناعا ءدوپ تيگىزۋ ماشىعىن, قارۋدى مەڭگەرۋ شەبەرلىگىن كورسەتۋ, ءتۇرلى ستراتەگيالىق جانە بارلاۋ تاپسىرمالارىن ورىنداي ءبىلۋ. بۇل سايىسقا قاتىسۋشى ەلدەردىڭ ۇزدىك مەرگەندەرى كەلىپ وتىر. ياعني, ءبىز ناعىز سۇرمەرگەندەردىڭ ونەرىنە كۋا بولامىز.
ال قاراعاندى وبلىسىنىڭ اكىمى ەرلان قوشانوۆ ءوز سوزىندە بۇل شارا تەرروريزممەن بىرلەسە كۇرەسۋگە جاسالعان ماڭىزدى قادام ەكەنىن اتاپ ءوتتى.
– «التىن ۇكi» اسكەري ونەردىڭ ءداستۇرلى مەرەكەسىنە اينالعانىنا قۋانىشتىمىن, – دەدى ەرلان جاقان ۇلى. – ەلباسى ايتقانداي, «تەرروريزم شەكارا تالعامايدى جانە ەلدەردى باي-كەدەي دەپ بولمەيدى». وسىنداي سايىستار ورتاق جاۋلارىمىزبەن كۇرەسۋگە سەپتىگىن تيگىزەدى دەپ سەنەمىن. مەرگەندەر – كەز كەلگەن ارميانىڭ ەليتاسى. ناعىز مەرگەنگە ءتان تابيعات پەن مىنەز اركىمگە بۇيىرماعان. تاريحتا ءاليا مولداعۇلوۆا, تولەۋعالي ابدىبەكوۆ سياقتى قاھارمان مەرگەندەر جايلى اڭىزعا بەرگىسىز اڭگىمەلەر از ەمەس. سول باتىرلار سىزدەرگە كاسىبي دە, ومىرلىك تە ۇلگى بولسىن.
ۇيىمداستىرۋشىلار جارىستى شىنايىلىققا مەيلىنشە جاقىن ەتۋگە تىرىسقان. قاتىسۋشىلار كلاسسيكالىق اتۋدان, قوزعالىستاعى نىسانانى اتۋدان جانە ءتۇرلى قيىن جاعدايدا كۇردەلى تاكتيكالىق تۇيىندەردى شەشۋدەن, جاسىرىنۋ مەن تۇرعان جەرىن باعدارلاۋدان سىنعا ءتۇستى. بۇلاردىڭ بارىندەگى نەگىزگى تالاپ – دالدىك پەن جىلدامدىق. ايتا كەتۋ كەرەك, بيىل جاۋىنگەرلەرگە ءوز قارۋلارىمەن, ارنايى كيىم-كەشەكتەرىمەن كەلۋگە رۇقسات ەتىلگەن. بۇل ولاردىڭ وزدەرىن نەعۇرلىم جايلى سەزىنۋى ءۇشىن دە قاجەت.
قاتىسۋشىلار وتە جوعارى دەڭگەيدە ونەر كورسەتتى. كوماندالىق ەسەپتە قازاقستان رەسپۋبليكاسى قورعانىس مينيسترلىگىنىڭ ارنايى ماقساتتاعى بولىمشەسىنىڭ جاۋىنگەرلەرى جەڭىمپاز اتاندى. ەكىنشى ورىنعا بەلارۋس, ءۇشىنشى ورىنعا قىتاي ەلدەرىنىڭ قۇرامالارى يە بولدى.
ال جەكە سىندا قازاقستان مەرگەندەرى الدارىنا جان سالمادى. ءبىرىنشى ورىندى قازاقستان رەسپۋبليكاسى قورعانىس مينيسترلىگىنە قاراستى 32356 اسكەري ءبولىمنىڭ مەرگەنى يەلەنسە, ەكىنشى ورىندى 22750 اسكەري ءبولىمنىڭ جاۋىنگەرى, ال ءۇشىنشى ورىندى قازاقستان رەسپۋبليكاسى مەملەكەتتىك كۇزەت قىزمەتىنىڭ وكىلى ەنشىلەدى.
ءبىر جۇماعا سوزىلعان سايىستار بارىسىندا مەرگەندەر ءۇشىن قيىندىقتار از بولعان جوق. اسىرەسە اۋا رايىنىڭ سالدارىنان بولعان كەدەرگىلەر كوپ. مەرگەندەر جەل مەن جاڭبىرعا قاراماستان, بارلىق تاپسىرمالاردى ورىنداپ شىقتى. ولاردىڭ ءوز اراسىندا ء«بىرىنشى اتقان ەمەس, ءبىرىنشى تيگىزگەن جەڭەدى» دەگەن قاعيدا بار. سوندىقتان, ولارعا دالدىك پەن ۇقىپتىلىقتى ەسكە سالۋدىڭ ءوزى ارتىق. ون ەكى ەلدىڭ ىشىندە ءوز مەرگەندەرىمىزدىڭ ۇستەم بولعانى ابىروي!
قايرات ءابىلدا,
«ەگەمەن قازاقستان»
قاراعاندى
