وسى كۇندەرى قۇرامىندا تەلەۆيزيا جۋرناليستەرى, تۋروپەراتورلاردىڭ وكىلدەرى, شۆەيتساريالىق فوتوگراف-پەيزاجشى كاي گروسسمانن, بريتاندىق ساياحاتشى, ءارى فوتوگراف دجەك حاردين, قازاقستاندىق ترەۆەل-بلوگەر اندرەي كۋلاگين ءتارىزدى شەتەلدىك جانە قازاقستاندىق ترەۆەل-بلوگەرلەرى بار كوماندا الماتى وبلىسىنىڭ سۇلۋ تابيعاتىنا تامسانىپ قايتتى.
13 تامىزدان باستاپ جوبا قاتىسۋشىلارى تابيعي جانە تاريحي ەسكەرتكىشتەرمەن تاماشا ۇيلەسكەن جەرلەرىنە بارىپ قايتتى. مىسالى, قۇپياسى ءالى تولىق اشىلماعان بەسشاتىر قورىمىندا بولدى, ورگان مۋزىكاسىنا ۇقساس دىبىس شىعاراتىن قاسيەتىمەن ەرەكشەلەنەتىن ايعايقۇمعا باردى.
تۋريستەردىڭ ەڭ سۇيىكتى جەرلەرىنىڭ ءبىرى «التىنەمەل» ۇلتتىق ساياباعىندا كوپتەگەن تابيعي ەسكەرتكىشتەر بار. بۇل ساياباقتىڭ بار سۇلۋلىعىن كورۋ ءۇشىن كوپ ۋاقىت قاجەت.
ساياباقتىڭ شىعىس جاعىندا التىنەمەل جوتاسىنىڭ كۇنگەيىنە قاراي ورنالاسقان اقتاۋ جانە قاتۋتاۋ تاۋلارى بار. ولار ءبىر ۋاقىتتاردا وسى مەكەندە تولقىپ جاتقان مۇحيتتىڭ تۇبىندەگى شوگىندىلەردەن تۇزىلگەن. شۇبار ءتۇستى توپىراق جارتاستى ءارتۇرلى تۇسكە بويايدى. ء«بىز مۇندا ايدا جۇرگەندەيمىز», - دەپ اسەرلەرىمەن ءبولىستى ەكسپەديتسيا مۇشەلەرى.
ساياحاتشىلار اقسۋ اۋدانى اۋماعىنداعى بايانجۇرەك تاۋلارىنا بارىپ, ەجەلگى تەمىر داۋىرىندە جارتاسقا سالىنعان سۋرەتتەردى تاماشالادى. بۇل تاۋ باتىستان شىعىسقا قاراي سوزىلىپ جاتىر, ونىڭ ۇزىندعى شامامەن 20 كم, ال بيىكتىگى 2079 مەترگە دەيىن جەتەدى. جەتىسۋ الاتاۋىنان بايانجۇرەكتى قاسقاراۋ دالاسى ءبولىپ جاتىر. وڭتۇستىك باتىس جاعىنداعى شىڭدار مەن ۇلكەن تاستارعا جۇزدەگەن سۋرەت قاشالىپ سالىنعان. ولاردىڭ سيۋجەتتەرى مەن ءستيلى جەتىسۋداعى وسى تەكتەس ەسكەرتكىشتەردەن وزگەشە. جەتىسۋ الاتاۋىنىڭ سولتۇستىك سىلەمىندەگى بۇيەن وزەنى دالاسىندا, شاعىن ۇستىرتتە ەجەلگى قاسيەتتى ورىن – وبسەرۆاتوريا بار. بۇل - تاستان قالانعان, ديامەترى 97 مەتر بولاتىن ۇلكەن شەڭبەر. ونىڭ ورتاسىندا مۇز داۋىرىنەن قالعان قويتاس جاتىر, جانە ءتورت تاراپقا: سولتۇستىك-وڭتۇستىك, باتىس-شىعىسقا باعىتتالعان ۇلكەن تاستار قويىلعان.
تەك ارنايى دايىندالعان جول تاڭدامايتىن كولىك قانا جۇرە الاتىن 20 شاقىرىم تاۋ جولىمەن ءبىزدىڭ قاتىسۋشىلار بيىكتىگى جاعىنان ورتا ازيادا ەكىنشى ورىندى يەلەنەتىن بۇرحان-بۇلاق سارقىراماسىنا كەلدى. سونداي-اق ەكسپەديتسيا باعىتى جەتىسۋ الاتاۋىنىڭ تولقۇجاتىنا اينالعان قورا شاتقالى ارقىلى ءوتتى. ول نەگىزگى, سولتۇستىك جوتانىڭ باتىسىندا ورنالاسقان. ساپوجنيكوۆ مۇزدىعىنان قاراتال وزەنىنە دەيىنگى شاتقالدىڭ ۇزىندىعى – 70 كم.
جەتىسۋدىڭ فلوراسى مەن فاۋناسى, لاندشافتارىنىڭ سان الۋاندىعى مەن سۇلۋلىعى ەكسپەديتسيا مۇشەلەرىن ەرەكشە اسەرگە بولەدى. سونىمەن قاتار, قاتىسۋشىلاردىڭ ۇسىنىسىمەن باستاپقى باعىتقا تۇزەتۋلەر ەنگىزىلدى. وسى ۇسىنىستار نەگىزىندە تۋريستىك كومپانيالار جەتىسۋ الاتاۋى ماڭايىنا ەڭ وڭتايلى تۋرلاردى ۇيىمداستىراتىن بولادى.
«بۇل باعىت تابيعي جانە ارحەولوگيالىق ەسكەرتكىشتەرگە تولى. بارلىق ەسكەرتكىشتەردى قامتيتىن مۇنداي ۇزاق تۋر ساحتاشىلاردان بەلگىلى ءبىر فيزيكالىق دايىندىقتى تالاپ ەتەدى. سول سەبەپتى, ءبىز, مەرزىمى, كۇردەلىلىك دەڭگەيى جاعىنان ءارتۇرلى بىرنەشە باعىت جاسايتىن بولامىز», - دەدى ەكسپەديتسيا جەتەكشىسى ىڭكار مەناياقوۆا.
جوبانى مادەنيەت جانە سپورت مينيسترلىگىنە قاراستى تۋريزم يندۋسترياسى كوميتەتىنىڭ تاپسىرىسى بويىنشا,قازاقستان رەسپۋبليكاسىنىڭ ەلورداسى – استانا قالاسىنىڭ 20 جىلدىعىنا وراي جۇزەگە اسىرۋشى «Kazakh Tourism» ۇلتتىق كومپانياسى ەكەنى ەستەرىڭىزگە سالامىز.
ەكسپەديتسيا قورىتىندىسى بويىنشا «Kazakh TV» تەلەارناسىندا تۋريستىك نىساندارعا بارۋ جونىندە ارنايى باعدارلاما شىعارىلادى. ەكسپەديتسيانىڭ رەسمي مەديا-سەرىكتەسى - «حابار» اگەنتتىگى.
ەكسپەديتسيانىڭ كەلەسى باعىتتارى تومەندەگى وبلىستار بويىنشا جالعاسادى:
قىزىلوردا, اقتوبە, ماڭعىستاۋ وبلىستارى – تەڭىزدەن تەڭىزگە دەيىن;
تۇركىستان, جامبىل, الماتى وبلىستارى – جاڭا جىبەك جولى.
«جاڭا جىبەك جولى» باعىتىنا National Geographic رەسەي تەلەارناسىنىڭ توبى قاتىسادى.
