ءيا, شىعاناق ەسكەرۋسىز قالدى دەۋگە اۋىز بارمايدى. قارا ەڭبەكتىڭ قايتالانباس ۇلى تۇلعاسىن ەسكەرۋسىز قالدىرۋ مۇمكىن ەمەس-ءتى. كەڭەستىك يدەولوگيا شىعاناقتى ەڭبەكتى ناسيحاتتاۋدىڭ تۋى رەتىندە كوتەرۋگە تىرىستى. رەسپۋبليكا ۇكىمەتى ونى ماڭگىلىك ەستە قالدىرۋ تۋرالى ارنايى قاۋلى قابىلدادى. شىعاناقتىڭ ءداستۇرىن جالعاستىرۋ تۋرالى باستاما كوتەرىلدى. شىعاناقتىڭ اق تارىسىن جوعالتىپ الماۋ ءۇشىن بۇيرىق تا بەرىلدى, مەرزىمدىك باسىلىمداردا دا از ايتىلعان جوق. بىراق قاۋلى ورىندالعان جوق, باستاما اياقسىز قالدى, شىعاناقتىڭ اق تارىسى تارى ءوسىرۋدىڭ الەمدىك كاتالوگىنان ماڭگىلىك ورىن تەپكەنمەن, ءوزىنىڭ تۋعان جەرىندە جوعالۋعا اينالدى.
بۇل قالاي؟ مازاسىزدىق پەن شاراسىزدىق سول كۇيىندە «كورپەگە قاراي كوسىلۋدىڭ» سينونيمىندەي بولىپ قالا بەرە مە؟ شىعاناق سياقتى ۇلى تۇلعانى قازىرگى دەڭگەيدەن ءارى ۇلىقتاۋدىڭ قاجەتى جوق پا؟ شىعاناق, شىن مانىندە, باس ارىپپەن جازىلاتىن ەڭبەك دەگەن ۇلى ۇعىمنىڭ جيناقى بەينەسى ەدى. ول بەينە جاسالمادى. كلاسسيك جازۋشىمىز ع.ءمۇستافيننىڭ ارنايى تاپسىرمامەن جازعان رومانىندا شىعاناق يدەولوگيالىق بەينەدەن ارىگە اسا المادى.
ەڭبەكتى قۇرمەتتەسەك, شىعاناقتى قۇرمەتتەيىك دەيتىن پەرزەنت ءسوزىن قايتالاۋعا تۋرا كەلىپ تۇر. ويتكەنى اۆتوردىڭ بۇرىن دا ايتىپ جۇرگەنىندەي, شىعاناق تابيعاتىنان ەشقانداي قۇرمەت كۇتپەگەن جان, بۇل قۇرمەت بىزگە, بىزدەن كەيىنگى جاس ۇرپاققا قاجەت, جاس ۇرپاقتىڭ ەڭبەك قادىرىن جان-تانىمەن سەزىنۋى ءۇشىن قاجەت. كەزىندە بۇكىلوداقتىق حالىق شارۋاشىلىعى جەتىستىكتەرى كورمەسىنىڭ قازاقستانعا ارنالعان پاۆيلونىنىڭ تابالدىرىعىنان اتتاعان ادامدى ەڭ الدىمەن, سول تابالدىرىقتىڭ ەكى جاعىندا ۇلت اتىنان ونەر مەن ەڭبەكتىڭ سيمۆولىنداي بولىپ بوي كوتەرگەن جامبىل مەن شىعاناق تالاي جۇرەكتى ىستىق ىقىلاسقا بولەپ تۇرۋشى ەدى عوي. اشارشىلىق پەن سوعىس قىسپاعىندا, ادام قولىمەن جاسالعان ادام شىداي الماستاي زۇلماتتارمەن ارپالىسا ءجۇرىپ وسىنشالىق ەرلىك جاساعان ەڭبەك ادامىنىڭ ۇلىلىعىنا تاڭدانعان, الەمدىك جاڭالىقتاردىڭ ىزدەۋشىلەرىن ەشكىمنىڭ شاقىرۋىنسىز, تەك ءوز جۇرەكتەرىنىڭ قالاۋىمەن تەر سىڭگەن تالىس تەبىنگىنىڭ تىلىگىندەي ويىلعا قايتا-قايتا ات سابىلتقان, عىلىم ورىسىنەن اسىپ, الەمدىك عالىمداردى تاڭداندىرعان ەرلىك قانداي دا بولسىن قۇرمەتكە لايىقتى ەدى. بىراق وكىنىشكە قاراي, تاپ وسى اسا قاجەتتى قۇرمەتتىڭ ءتيىستى جولى بولماي-اق كەلەدى. نەگە؟ نەلىكتەن بۇلاي تاۋسىلا سويلەپ وتىرمىن, اتالعان ماقالادان بۇعان تولىق جاۋاپ الۋعا بولادى. اۋداندىق بيلىكتىڭ مۇمكىندىگىنە سىيا بەرمەيتىن, الدەقايدا بيىك, ودان الدەقايدا ءورىستى شەشىمدەرگە ەندى ءتيىستى ازاماتتار سەرگەك قارايتىن بولار دەپ ويلايمىز.
قورىتا ايتقاندا, ەڭبەكتى باعالاۋ شىعاناق سىندى ەلى ءۇشىن تەر توككەن, ەڭبەك ەتكەن ەرلەردى باعالاۋدان باستاۋ الادى ەمەس پە؟!
سىرىم باقتىگەرەي ۇلى,
جۋرناليست,
ويىل اۋدانىنىڭ قۇرمەتتى ازاماتى
اقتوبە وبلىسى
