سەميناردىڭ نەگىزگى تاقىرىبى «الەمدىك وزگەرىستەر جاعدايىندا ءبىلىم بەرۋ ۇيىمدارىن باسقارۋ» دەپ اتالعانىمەن, كوتەرىلگەن جانە تالقىلانعان ماسەلەلەردىڭ اياسى اۋقىمدى. ويتكەنى جوعارى وقۋ ورىندارىندا ساپالى مۇعالىم كادرلارىن دايارلاۋ, بۇل ماماندىققا وقۋعا تۇسەتىن جاستاردى يكەمىنە قاراي ىرىكتەۋ, ولارعا تەرەڭ ءبىلىم بەرۋ, مۇعالىم مارتەبەسىن كوتەرۋ, ءبىلىم بەرۋ مازمۇنىن جاڭارتۋ, ورتا ءبىلىم بەرۋدى دامىتۋ, ادامنىڭ دامۋىنا جانە الەۋمەتتەنۋىنە قولايلى ادامگەرشىلىك جانە قاۋىپسىز ورتانى قۇرۋ, ەلىمىزدە ءبىلىم بەرۋ جۇيەسىنىڭ كاسىپتىك باعدارلانۋىن قايتا جۇكتەۋ, ءبىلىم بەرۋ ۇيىمدارىندا كامەلەتكە تولماعانداردىڭ وزىنە-ءوزى قول جۇمساۋى (سۋيتسيد) مىنەز-قۇلقىنىڭ الدىن الۋ, ءبىلىمدى كريتەريالدىق باعالاۋ, مونيتورنيگ جۇيەسىندە ساپانى باقىلاۋ قۇرالدارىن (TQM) پايدالانۋ, مەكتەپتە ءبىلىم بەرۋ ساپاسىن قامتاماسىز ەتۋدە اۋداندىق ادىستەمەلىك كابينەتتەردىڭ ءرولىن ارتتىرۋ سياقتى وزەكتى ماسەلەلەر جان-جاقتى تالقىلاندى.
سەميناردىڭ باس مودەراتورى, ۋنيۆەرسيتەت رەكتورى, پەداگوگيكا عىلىمدارىنىڭ دوكتورى, پروفەسسور تاكير بالىقباەۆ وقۋ ورنىنىڭ الداعى قازان ايىندا وتكىزىلەتىن 90 جىلدىق مەرەيتويى جانە ونى وتكىزۋگە دايىندىق بارىسى تۋرالى حابارلاي كەلىپ, جوعارى وقۋ ورىندارىندا مۇعالىم كادرلارىن دايارلاۋدىڭ نەگىزگى وزەكتى ماسەلەلەرىنە توقتالدى.
«نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش ءشامشيدينوۆا ءبىلىم بەرۋ مازمۇنىن جاڭارتۋدىڭ وزەكتى ماسەلەلەرىنە, بۇل سالادا ءوزى باسقارىپ وتىرعان ۇيىمنىڭ اتقارىپ وتىرعان جۇمىستارىنا توقتالدى. «ورلەۋ» مۇعالىمدەردىڭ بىلىكتىلىگىن جەتىلدىرۋ ۇلتتىق ورتالىعى باسقارماسى توراعاسىنىڭ ورىنباسارى يسا سامساەۆ مەكتەپتە ءبىلىم بەرۋدىڭ جاڭا مازمۇنىن ەنگىزۋگە بايلانىستى مۇعالىمدەر دايارلاۋدىڭ ماڭىزى تۋرالى, الماتى مەنەدجمەنت ۋنيۆەرسيتەتىنىڭ پرەزيدەنتى اسىلبەك قوجاحمەتوۆ ورتا ءبىلىم بەرۋدى دامىتۋدىڭ جولدارى, پ «Arsana» رەسپۋبليكالىق قوعامدىق بىرلەستىگىنىڭ ءتورايىمى رىستى جۇماباەۆا ادامنىڭ دامۋىنا قاۋىپسىز ورتا قۇرۋ, EDTECH حالىقارالىق ءبىلىم بەرۋ ورتالىعىنىڭ باس ديرەكتورى عاني بەيسەمباەۆ كاسىپتىك باعدار بەرۋ ماسەلەلەرى, اباي اتىنداعى قازۇپۋ بىلىكتىلىكتى ارتتىرۋ ورتالىعى ديرەكتورىنىڭ ورىنباسارى الەكساندر سەمچەنكو عالامدىق وزگەرمەلى كەزەڭدەگى ءبىلىم بەرۋ ماسەلەلەرى تۋرالى وتە مازمۇندى باياندامالار جاسادى. پەداگوگيكا عىلىمدارىنىڭ دوكتورى, پروفەسسور كۇلزادا قۇدايبەرگەنوۆانىڭ «كريتەريالدى باعالاۋ» تۋرالى, «ورلەۋ» ۇلتتىق ورتالىعى ديرەكتورىنىڭ ورىنباسارى اسەل تاڭاتوۆانىڭ ءبىلىم بەرۋ ۇيىمدارىندا كامەلەتكە تولماعانداردىڭ وزىنە-ءوزى قول جۇمساۋ ارەكەتتەرىنىڭ الدىن الۋ تاقىرىبىنداعى باياندامالارى كوپشىلىكتىڭ كوڭىلىنەن شىقتى.
تالقىلانعان ماسەلەلەر بويىنشا جوعارى وقۋ ورىندارىنىڭ وقىتۋ باعدارلامالارىنا «نازارباەۆ زياتكەرلىك مەكتەپتەرى» قولدانىپ وتىرعان تەحنولوگيالاردى باتىل ەنگىزۋ, ءبىلىم بەرۋ بويىنشا عىلىمي-پراكتيكالىق باعدارلانعان زەرتتەۋلەر جۇرگىزۋ, پەداگوگيكالىق پراكتيكانىڭ مەرزىمىن ۇزارتۋ جانە ونى ستۋدەنتتەردىڭ تۇرعىلىقتى جەرى بويىنشا ەكىنشى كۋرستان باستاپ وتكىزۋ, 9 سىنىپ وقۋشىلارى اراسىندا كاسىپتىك باعدار بەرۋدى ۇيىمداستىرۋعا EDTECH حالىقارالىق ءبىلىم بەرۋ ورتالىعىنىڭ ماماندارىن تارتۋ, ەلىمىزدىڭ ايماقتارىندا مۇعالىمدەردىڭ پەداگوگيكالىق تاجىريبە الماسۋ الاڭدارىن قۇرۋ, جوو پروفەسسور-وقىتۋشىلارىنىڭ بازالىق ءبىلىم بەرۋ ۇيىمدارىنداعى جۇمىسىن كۇشەيتۋ سياقتى وزەكتى ۇسىنىستار قابىلداندى.
جوعارى وقۋ ورنىنا مۇعالىمدىك ماماندىقتى جان-تانىمەن سۇيەتىن, ونى ومىرلىك ماقساتىنا اينالدىرعان شىنايى تالاپكەرلەردىڭ ماقساتتى توپتارىن ىرىكتەپ قابىلداۋ ايماقتاردى جوعارى مامانداندىرىلعان پەداگوگيكالىق كادرلارمەن قامتاماسىز ەتۋ ماقساتىندا ء«بىلىم بەرۋ اليانسى» كونسورتسيۋمى قۇرىلدى. وسىعان بايلانىستى «EDTECH. Kz» حالىقارالىق ءبىلىم بەرۋ ورتالىعى, اباي اتىنداعى قازاق ۇلتتىق پەداگوگيكالىق ۋنيۆەرسيتەتى جانە وبلىستاردىڭ, الماتى, استانا, شىمكەنت قالالارىنىڭ ءبىلىم باسقارمالارى اراسىندا مەموراندۋمعا قول قويىلدى.
سەمينارعا قاتىسقان وڭىرلىك ءبىلىم باسقارمالارىنىڭ باسشىلارى بۇل جيىننىڭ تاياۋداعى تامىز كەڭەسى قارساڭىندا ويعا-وي قوسىپ, الداعى ىستەرىنە تىڭ سەرپىن بەرەتىنىن ايتتى.
بۇل جيىننىڭ اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ قاپشاعاي تەڭىزى جاعاسىنداعى «ۇستاز» دەمالىس ايماعىندا وتكىزىلۋى تامىزدىڭ مي قايناتقان اپتاپ ىستىعىندا وعان قاتىسۋشىلار مەن قوناقتاردىڭ ءارى دەمالىپ, ءارى سەرگەك جۇمىس ىستەۋىنە مۇمكىندىك بەردى.
مىرزاحان احمەتوۆ,
اباي اتىنداعى قازاق ۇلتتىق پەداگوگيكالىق
ۋنيۆەرسيتەتى قوعاممەن بايلانىس جونىندەگى ءبولىمىنىڭ باسشىسى
