جاستىقتىڭ جالىنىن لاۋلاتىپ

بەيبىتشىلىك جانە كەلىسىم ساراي­ىندا «سەنىڭ ارمانداعان ورداڭ» اتتى ميۋزيكل قويىلدى. نەگىزگى وزەگى ماڭگىلىك تاقىرىپ – ماحابباتقا ار­نالعان بۇل ميۋزيكلدى قازاق ۇلتتىق ونەر ۋنيۆەرسيتەتى ۇيىمداستىرىپ, تاۋەلسىزدىك مەرەكەسىنە وراي استا­نالىقتار نازارىنا ۇسىندى. شارا باستالماس بۇرىن ساحنا سىرتىنداعى قاربالاستا ميۋزيكل رەجيسسەرلەرىنىڭ ءبىرى, قازاق ۇلتتىق ونەر ۋنيۆەرسيتەتىنىڭ تەاتر-كينو ءجا­نە تەلەديدار فاكۋلتەتىنىڭ دە­كا­نى بەكبولات قۇرمانعوجاەۆتان بۇل ساح­نالىق قويىلىم تۋرالى ايتىپ بەرۋىن سۇراعانبىز. رەجيسسەر ەل ءتاۋ­ەلسىزدىگىنىڭ 20 جىلدىعىنا ارناپ ۇيىمداستىرعان سپەكتاكلگە ۋنيۆەرسيتەت ستۋدەنتتەرى قاتىسىپ جات­قاندىعىن, قازاق, ورىس, اعىل­شىن تىلدەرىندە جۇرەتىن ميۋزيكل 1962 جىلعى حەلسينكيدە وتكەن ءدۇ­نيەجۇزىلىك جاستار فەستيۆالىنەن باس­تاۋ الا­تىنىن ايتتى. ەندى ءسوز ورايىندا, يدەيا اۆتورى, ۋنيۆەرسيتەت رەكتورى ايمان مۇ­سا­قوجاەۆا, ال اۆتورى گۇلبانۋ ۇكە­تايقىزى, كومپوزيتورى سەرىك ەركىنبەك ەكەنىن ايتا وتىرىپ, سانكت-پەتەربۋرگتەن كەلگەن اتاقتى تەاتر سۋرەتشىسى ۆياچەسلاۆ وكۋنەۆتىڭ, قو­يىلىم رەجيسسەرلەرى نۇرقانات جا­قىپباي جانە بەكبولات قۇرمانعو­جا­ەۆتىڭ سپەكتاكلدى ساحناعا شى­عارۋ بارىسىندا كوپ تەر توككەنىن دە ايتا كەتسەك دەيمىز. ءيا, ميۋزيكل بويىندا جاستىق­تىڭ جالىندى لەبى تۇنىپ تۇر. سپەكتاكلگە قاتىسقان جاستاردىڭ ءبارى دە ساحنا كوركىنە اينالدى دەسە دە بولادى. سودان دا بولار, بەيبىتشىلىك جانە كەلىسىم سارايىن لىق تولتىرعان جاستار بۇل قويىلىمدى ءبىر دەممەن سۇيسىنە كورىپ شىقتى. ال قويىلىم سوڭىنان كەيىن ۋنيۆەرسيتەت رەكتورى, ميۋزيكل اۆتورى ايمان قوجابەكقىزى قويىلىمنىڭ كوڭىلدەگىدەي شىعۋىنا قاتىسقان بارشا ادامدارعا العىس ايتتى. ۆەنەرا تۇگەلباي.