ىندەتىپ ىزدەگەنگە ءبارى ايقىن. 97 مىڭ 538 ادام تولىققاندى جۇمىسپەن قامتىلماعان, بىلاي ايتقاندا جۇمىسسىز دەسەڭىز بولادى. «ە, وسىنشاما جۇمىسسىز ادام بار ەكەن. ەكى قولىنا كۇرەك تابا الماسا ءوز وبالى وزىنە» دەۋگە بولار ما ەدى؟ كەيبىر اكىمدەر «امالىم جوق» دەر مە ەدى؟ قىزىلوردا وبلىسىنىڭ اكىمى ولاي ويلامايدى ەكەن.
شاعىن جانە ورتا بيزنەستى ورىستەتۋگە 32 ملرد تەڭگەنىڭ ەسەبىن شىعاردى. قالتانى ۇرمايتىن, اي, جىل سايىنعى ينفلياتسيامەن-اق ايىرماسىن جەپ قوياتىن جەڭىل نەسيە, ۇزدىك جوبالارعا قايتارىمسىز گرانت.
ءار اۋدان, اۋىل اكىمدەرىنە ناقتى تاپسىرمالار بەرىلگەن. اۋىل اكىمدەرىنىڭ جۇمىسىنا سەپتەسۋ ءۇشىن قاسىنا باسقارما, جەتەكشى مەكەمەلەردەن ارناۋلى وكىل ءبولدى. سودان سوڭ اۋدان, قالا ارالاعان وبلىس باسشىسى جۇمىس ساپارىنىڭ سوڭىندا كاسىپكەرلىكتى قولداۋعا بايلانىستى قورىتىندى جيىن وتكىزدى.
الدا بەرەكەسى اقتارىلعان قوڭىر كۇز كەلە جاتىر. كاسىپكەرلىكتى دامىتۋ ماسەلەسىنىڭ قورىتىندى شەشىمى شىعادى. وسىعان بايلانىستى وبلىستىق كاسىپكەرلەر پالاتاسىنىڭ ديرەكتورى عالىمبەك جاقسىلىقوۆ جاقسى جاڭالىعىمەن ءبولىستى.
وبلىس اكىمى قىرىمبەك كوشەرباەۆ وبلىستىڭ ءار اۋدانى جانە قىزىلوردا قالاسى بويىنشا ۇزدىك كاسىپكەرلەردى, وبلىس بويىنشا ءبىر ۇزدىك اۋىل اكىمىن جانە ءبىر جاۋاپتى بەكىتىلگەن تۇلعانى, سونداي-اق پالاتانىڭ اۋدانداعى ءبىر فيليالىن 1 ملن تەڭگەدەن قارجىلاي سىياقىمەن ماراپاتتاۋ تۋرالى شەشىم قابىلداپتى. وعان كىمدەردىڭ لايىقتى بولاتىندىعى جىل سوڭىندا انىقتالادى.
باقتيار تايجان,
«ەگەمەن قازاقستان»
قىزىلوردا وبلىسى
