حالىقارالىق ارميا ويىندارى حالىقارالىق دارەجەدەگى تەڭدەسسىز شارا. جىل سايىن ۇيىمداستىرىلاتىن اتالمىش شارا اسكەري قىزمەتشىلەردىڭ تاجىريبە الماسىپ, بىلىكتىلىكتەرىن جەتىلدىرىپ قانا قويماي, حالىقارالىق دەڭگەيدەگى اسكەري ىنتىماقتاستىقتى دا نىعايتا تۇسەدى.
بيىلعى جىلى ارميا ويىندارى 7 مەملەكەتتىڭ اۋماعىندا وتەدى. قازاقستاندىق اسكەري قىزمەتشىلەر ويىن اياسىنداعى 28 كونكۋرستىڭ 14-نە قاتىسادى. اتالمىش شارا اياسىندا قورعانىس ءمينيسترى قازاقستان قارۋلى كۇشتەرىنىڭ قۇراما كومانداسىنىڭ مۇشەلەرىمەن كەزدەستى. مينيستر جارىسقا قاتىسۋشىلارعا جەڭىس تىلەپ, ولاردىڭ لايىقتى ونەر كورسەتىپ, تاباندىلىق تانىتاتىندارىنا سەنىم ءبىلدىردى.
ايتا كەتەيىك, بۇل جارىستا «استانا», «وڭتۇستىك», «باتىس» «شىعىس» وڭىرلىك قولباسشىلىعىنىڭ اسكەري قىزمەتشىلەرى ونەر كورسەتۋگە لايىقتى دەپ تابىلدى. ەسكەرتە كەتەتىن ماسەلە, 2017 جىلعى ارميا ويىندارىنىڭ قورىتىندىسى بويىنشا, قازاقستان رەسپۋبليكاسى قارۋلى كۇشتەرىنىڭ قۇراما كومانداسى الەمنىڭ 28 ەلىنەن كەلگەن 150 كوماندانىڭ ىشىندە جالپىكوماندالىق ەسەپ بويىنشا ءۇشىنشى ورىنعا تۇراقتادى. ۇيىمداستىرۋشىلار قازاقستان كومانداسىن قاتىسۋشىلارى ەڭ كوپ ءارى بەلسەندى ۇجىم رەتىندە باعالادى. ال حالىقارالىق ويىنداردىڭ تورەشىلەر القاسى قازاقستاندىق جاۋىنگەرلەردىڭ جوعارى دايىندىعى مەن كاسىبيلىگىن جانە بىلىكتىلىگىن ەرەكشە اتاپ ءوتتى.
