2018 جىلعى 25 قاراشادا مينسكتە «ەۆروۆيدەنيەنىڭ» انالوگى - «Junior Eurovision Song Contest» حالىقارالىق ءان بايقاۋى وتەدى, وعان 9 جاستان باستاپ 14 جاسقا دەيىنگى ورىنداۋشىلار قاتىسادى. قازاقستان بايقاۋدىڭ 15 جىلدىڭ تاريحىندا العاش رەت قاتىسقالى وتىر. قازاقستاننىڭ اۋماعىندا بايقاۋدى «حابار» تەلەارناسى كورسەتەدى. «حابار» اگەنتتىگى 2016 جىلعى 1 قاڭتاردان باستاپ ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى بولىپ تابىلادى, وسى مۇشەلىك اتالعان بايقاۋعا قاتىسۋ ءۇشىن ەلدەن ۇمىتكەر ۇسىنۋعا ىقپال ەتتى.
«حابار» اگەنتتىگىنىڭ باسقارما توراعاسى الان اجيباەۆ: «قازاقستاننىڭ قاتىسۋى جونىندەگى كەلىسسوزدەر ۇزاق ۋاقىت جۇرگىزىلىپ كەلدى, «EBU» شەشىمى سوڭعى ساتكە دەيىن بەلگىسىز بولاتىن. «حابار» «EBU» قاۋىمداسقان مۇشەسى بولىپ تابىلاتىندىعىنا قاراماستان, وسى تەكتەس اۋقىمدى حالىقارالىق ءىس-شارالاردى تەحنيكالىق جابدىقتاۋ, تەلەۆيزيالىق تولتىرۋ جانە ترانسلياتسيالاۋ تاجىريبەسى بويىنشا بەلگىلى ءبىر تالاپتارعا سايكەس كەلۋى قاجەت بولدى. وسى اتاقتى بايقاۋعا ەلىمىزدىڭ قاتىسۋ مۇمكىندىگى پايدا بولعانىنا قۋانىشتىمىز. قازىرگى ساتتە ءبىزدىڭ اگەنتتىك پەن قر اقپارات جانە كوممۋنيكاتسيالار مينيسترلىگى ءبىزدىڭ ەلدە ىرىكتەۋ جۇرگىزۋدىڭ بىرنەشە نۇسقاسىن قاراستىرۋدا, ءاربىر تالانتتى بالانىڭ قاتىسۋعا مۇمكىندىگى بولۋى ءۇشىن بارىنشا وڭتايلى نۇسقا ويلاستىرىلۋدا. ءبارى جاقىن ارادا ايتىلاتىن بولادى».
شارت بويىنشا بايقاۋعا قاتىسۋشىلار جاڭا, ەش جەردە جاريالانباعان ءان ورىنداۋى, سونداي-اق ۇزاقتىعى 2 مينۋت 45 سەكۋندتان باستاپ 3 مينۋتقا دەيىنگى ءوز كومپوزيتسياسىن جاندى داۋىسپەن ايتۋى قاجەت. جەڭىمپاز تەلەكورەرمەندەردىڭ جانە قۇرامىنا 5 ادام ء(ۇش ەرەسەك جانە ەكى بالا) كىرەتىن, بارلىق قاتىسۋشى ەلدەردەن قۇرالعان قازىلار القاسىنىڭ داۋىس بەرۋى جولىمەن انىقتالادى. «ەۆروۆيدەنيەدەن» ەرەكشەلىگى – بالالار بايقاۋىندا جەڭىمپاز ەل اۆتوماتتى تۇردە كەلەسى بايقاۋدى ءوز ەلىندە وتكىزۋ قۇقىعىن يەلەنبەيدى, بۇل جاس قاتىسۋشىلارعا قىسىمدى ازايتۋ ءۇشىن جاسالدى. بايقاۋلاردىڭ ۇيىمداستىرۋشىلارىن ەۋروپالىق حابار تاراتۋ وداعى الدىن-الا انىقتايدى. بيىل بايقاۋعا 19 ەل قاتىسادى, بۇل بايقاۋ وتكىزۋدىڭ بۇكىل تاريحىندا رەكوردقا اينالىپ وتىر. 19 ەلدىڭ قاتارىندا البانيا, ارمەنيا, اۆستراليا, ءازىربايجان, بەلارۋس, فرانتسيا, ماكەدونيا, گرۋزيا, يرلانديا, يزرايل, يتاليا, قازاقستان, مالتا, پولشا, پورتۋگاليا, رەسەي, سەربيا, نيدەرلاندى, ۋەلس بار. قازاقستان مەن ۋەلس ءۇشىن بيىلعى قاتىسۋ دەبيۋتتى بولماق.
«Junior Eurovision Song Contest» العاش رەت 2003 جىلى كوپەنگاگەندە (دانيا) 16 ەلدىڭ قاتىسۋشىسى اراسىندا ءوتتى. تەلەكورەرمەندەر مەن قازىلار القاسىنىڭ جەڭىمپازدى بىرلەسىپ انىقتاۋى 2008 جىلدان باستاپ مۇمكىن بولا باستادى. وعان دەيىن كورەرمەندەر ترانسلياتسيا كەزىندە داۋىس بەرەتىن. 2007 جانە 2008 جىلداردىڭ بايقاۋلارىندا تەلەداۋىس بەرۋدەن تۇسكەن پايدا «UNICEF» بەرىلگەن بولاتىن. ءار جىلدارى بەلگيا, رۋمىنيا, نيدەرلاندى, كيپر, ۋكراينا جانە ت.ب. ۇيىمداستىرۋشىلار بولدى. رەسەي, گرۋزيا, بەلارۋس جانە مالتا 2 رەتتەن جەڭدى. 2017 جىلعى «Junior Eurovision Song Contest» تبيليسيدە ءوتتى. وتكەن جىلعى بايقاۋدىڭ جەڭىمپازى – رەسەيدىڭ 15 جاستاعى قاتىسۋشىسى پولينا بوگۋسەۆيچ, ول «Wings» ءانىن ورىندادى.
