تەاتر كيىم ىلگىشتەن باستالسا, كەز كەلگەن قۇرىلىس ەڭ الدىمەن جوبالاۋ-سمەتالىق قۇجاتتاردى ازىرلەۋدەن باستاۋ الماق. ايتالىق, قازىرگى كەزدە بيۋدجەتتەن قارجىلاندىرىلاتىن الەۋمەتتىك جانە ينفراقۇرىلىمدىق نىسانداردىڭ قۇرىلىسى بويىنشا جوبالاۋ-سمەتالىق قۇجاتتاردىڭ ۋاقىتىن سوزباي, مەرزىمىندە ازىرلەۋدىڭ ءرولى مەن جاۋاپكەرشىلىگى جوعارى.
ويتكەنى بۇلاي بولماعان جاعدايدا الەۋمەتتىك نىسانداردىڭ جۇزەگە اسۋ مەرزىمى كەشەۋىلدەۋى نەمەسە مۇلدەم تۇرعىزىلماي قالۋى ابدەن مۇمكىن. سوندىقتان دا وڭىردەگى وبلىستىق باسقارمالاردىڭ باسشىلارى جانە بيۋدجەتتىك باعدارلامالاردىڭ اكىمشىلەرى, سونداي-اق جوبالاۋ ۇيىمدارى مەن قۇرىلىس يندۋسترياسى كاسىپورىندارى باسشىلارىنىڭ مۇنداي سىلبىر ءىس-ارەكەتكە جول بەرمەۋىنىڭ پايداسى مەن تيىمدىلىگى وتە مول.
ايتسە دە وبلىستا جوبالاۋ-سمەتالىق قۇجاتتاردى ازىرلەۋ مەرزىمى ساقتالماي وتىر. بۇل جونىندە اقتوبە وبلىسى اكىمىنىڭ ءباسپاسوز قىزمەتى حابارلادى. ياعني, 2017 جىلدىڭ جەلتوقسان ايىندا 2018 جىلى بيۋدجەتتەن 281 الەۋمەتتىك جانە ينجەنەرلىك ينفراقۇرىلىمدار نىسانىنا جسق جاساۋعا قاجەتتى قاراجات بولىنگەن. ايتسە دە بۇگىندە ەكىنشى جارتىجىلدىق كەزەڭى باستالىپ كەتكەنىنە قاراماستان تابانى كۇرەكتەي 115 جوبانىڭ جوبالاۋ سمەتالىق قۇجاتتارى ءازىر بولماي وتىر. بۇل جونىندە اقتوبە وبلىسىنىڭ اكىمى بەردىبەك ساپارباەۆتىڭ توراعالىعىمەن وتكەن جيىندا وبلىستىق قارجى باسقارماسىنىڭ باسشىسى گۇلقاسيما سۇيىنتاەۆا مالىمدەمە جاسادى. بۇعان دەيىنگى جۇرگىزىلگەن تالداۋلار مەن ساراپتامالار ورىن العان جاعدايلاردىڭ باستى سەبەپتەرى – كونكۋرستىق ۇدەرىستەر وتكىزۋ ءتارتىبىنىڭ كەش حابارلانۋى, ءارى ۇزاققا سوزىلۋى. بۇعان قوسا باستاپقى دەرەكتەر مەن تەحنيكالىق جاعدايلارعا قاتىستى جاي-كۇيدى ۇسىنۋدىڭ مەرزىمدەرى دە كەشىكتىرىلگەن.
مۇنىڭ ءوزى اتالعان ءىستىڭ باسى-قاسىندا جۇرگەندەردىڭ قولىندا ناقتى جوبالىق-سمەتالىق قۇجاتتار جوق دەگەن ۇعىم-تۇسىنىكتى بەرمەي مە؟ مۇنداي كورىنىس الەۋمەتتىك نىساندار قۇرىلىسىن جۇرگىزۋ ءىسىن جەرگىلىكتى جانە رەسپۋبليكالىق بيۋدجەتتەن قارجى تارتۋعا ءوز كەدەرگىسىن تيگىزبەي تۇرا المايدى. ءارى اتالعان دەرەكتىڭ ءوزى جوبالاۋ-سمەتالىق قۇجاتتاردى ازىرلەۋگە جاۋاپتى زاڭدى تۇلعالاردىڭ جاۋاپكەرشىلىگى تومەن, اتقارىپ جۇرگەن ىستەرى سىلبىر ەكەنىن ايعاقتاسا كەرەك-ءتى.
ايتالىق جسق-نى جاساقتاۋ بارىسىندا باعانى نەگىزسىز كوتەرۋدى بولدىرماۋدى ۇدايى نازاردا ۇستاۋ ءىسىنىڭ دە ورنى ايرىقشا. بۇل ءوز كەزەگىندە جوبالاردىڭ سمەتالىق قۇنىن تىڭعىلىقتى ءارى جان-جاقتى زەرتتەۋدى قاجەت ەتەدى. بيۋدجەتتىك باعدارلامالاردىڭ اكىمشىلەرى ماسەلەنىڭ وسى جاعىنا دا جەتكىلىكتى تۇردە كوڭىل اۋدارماعانى اڭعارىلادى. سىلبىرلىق قاشاندا ءىستىڭ ناتيجەلى اياقتالۋىنا كەدەرگى كەلتىرەدى.
تەمىر قۇسايىن,
«ەگەمەن قازاقستان»
