ارنايى قۇرىلعان كوميسسيا 152 ءۇيدىڭ 13-ءىن تۇرۋعا جارامسىز دەپ تانىعان بولاتىن. قازىرگى ۋاقىتتا اۋداندا تۇرۋعا جارامدى 134 ۇيگە جوندەۋ جۇمىستارى جۇرگىزىلىپ جاتىر. ال باسپاناسى جارامسىز دەپ تانىلعان ءۇي يەلەرىنە وبلىس باسشىلىعى جاڭادان ءۇي ساتىپ الىپ بەرەمىز دەپ ۋادە بەرگەن ەدى. جاقىندا «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى انۋاربەك مۇحتارحانوۆ شەمونايحا اۋدانىنا ارنايى بارىپ, 12 وتباسىنا باسپانا كىلتىن تاپسىردى.
«25 ناۋرىز كۇنگى جاعداي ءالى ەسىمدە. مەنىڭ ءۇيىم سۋعا باتىپ كەتتى. ىرگەتاسى ءۇش جەردەن جارىلدى. سول كەزدەگى جاعدايىمدى كورسەڭىزدەر عوي. بۇرىن تەك تەلەديداردان كورەتىن جاعدايدىڭ باسىما كەلەتىنىن ويلاماعان دا ەدىم. قيىن ساتتە بىزبەن بىرگە بولعان حالىققا, اسىرەسە ەلباسىنا, وبلىس باسشىلىعىنا راحمەت ايتامىز. اپات بولعان العاشقى كۇننەن ءار تۇرعىننىڭ جاعدايىن جەكە-جەكە ءبىلىپ, ءۇيدى-ءۇيدى ارالاپ, گۋمانيتارلىق كومەك جەتكىزگەن «نۇر وتان» پارتياسىنا العىسىمىز شەكسىز», دەدى بۇرىنعى تۇرعان ۇيىنەن الدەقايدا جاقسى, قولايلى, 4 بولمەلى باسپاناعا قول جەتكىزگەن ليۋدميلا دەگتيارەۆا.
پارتيا فيليالىنىڭ ءباسپاسوز قىزمەتىنىڭ حابارلاۋىنشا, بۇل كۇنى شەمونايحا تۇرعىندارىنا تەك پاتەر كىلتىن عانا ەمەس, استانادان ارنايى كەلگەن «مەملەكەتتىك قىزمەت كورسەتۋ سالاسىنداعى قىزمەتكەرلەردىڭ جەرگىلىكتى كاسىپتىك وداعى» قوعامدىق بىرلەستىگىنىڭ توراعاسى بىرنەشە تۇرمىستىق تەحنيكالاردى تارتۋ ەتتى. ولار وزدەرىمەن بىرگە 18 توڭازىتقىش, 7 كىر جۋاتىن ماشينا, 8 تەلەديدار الىپ كەلدى. «اۋداندا جوندەۋ جۇمىستارى قىزۋ ءجۇرىپ جاتىر. تامىزدىڭ اياعىنا دەيىن 126 ۇيدەگى جوندەۋ تولىق اياقتالادى. جۇمىس بارىسى تولىق باقىلاۋدا. اۋداندىق اكىمدىكتىڭ الدىنا قويىلعان مىندەت بار. سوندىقتان تاسقىننان زارداپ شەككەن حالىقتى قالىپتى تىرشىلىگىنە ورالتۋ كۇن تارتىبىندەگى باستى ماسەلە», دەيدى «نۇر وتان» پارتياسىنىڭ وبلىستىق فيليالى توراعاسىنىڭ ءبىرىنشى ورىنباسارى انۋاربەك مۇحتارحانوۆ.
ازامات قاسىم,
«ەگەمەن قازاقستان»
شىعىس قازاقستان وبلىسى,
شەمونايحا اۋدانى
