بۇل كەزەڭدە دە «استانانىڭ» ۆەلوشاباندوزى ماگنۋس كورت مارە سىزىعىن ءبىرىنشى بولىپ كەسىپ, ەلوردا كومانداسىنىڭ سپورتشىلارى قاتارىنان ەكىنشى كۇن ايتۋلى دودانىڭ كەزەڭ جەڭىمپازى اتانىپ وتىر. ەكىنشى ورىندى «Bahrain-Merida» كومانداسىنىڭ وكىلى يون يساگيررە, ءۇشىنشى ورىندى «Trek-Segafredo» كومانداسىنىڭ ۆەلوشاباندوزى باۋكە موللەما يەلەندى.
ەسكە سالايىق, سەن-پول-ترۋا-شاتو – ماند ارالىعىندا وتكەن 14-كەزەڭدە «استانا» ۆەلوكومانداسىنىڭ تاعى ءبىر وكىلى يسپانيالىق ومار فرايلە جەڭىسكە جەتكەن بولاتىن. ءبىر ايتا كەتەرلىگى, سول كۇنى «استانا» ۆەلوشاباندوزدارى كوپكۇندىكتىڭ اتالمىش كەزەڭىنە قارا لەنتا بايلاپ, 19 شىلدە كۇنى الماتى قالاسىندا ۇرىلاردىڭ قولىنان قازا تاپقان مانەرلەپ سىرعاناۋشى دەنيس تەننىڭ رۋحىنا قۇرمەت بىلدىرگەن ەدى.
«تۋر دە فرانس» جارىسىنىڭ 15-كەزەڭىنەن كەيىن جالپى ەسەپتە «Sky» ۆەلوكومانداسىنىڭ وكىلى گەراينت توماس كوش باستاپ تۇر. ال «استانا» ساپىنان ياكوب فۋلسانگ 9-ورىندا كەلەدى. ول كوشباسشىسى توماستان 6 مينۋت 14 سەكۋندقا ارتا قالىپ قويعان.
ءالي بيتورە,
«ەگەمەن قازاقستان»
