بەينەەكران ارقىلى دەنيس تەننىڭ ءومىرىنىڭ جارقىن ساتتەرى كورسەتىلدى. ابزال ۇلمەن قوشتاسۋعا اعىلعان حالىق سۋرەتىنە گۇل قويدى.
- اۋىر قايعى, دەنيس ەندى قايتىپ ورالمايدى. ول از عانا عۇمىرىندا وزىندىك مەكتەبىن قالىپتاستىرىپ ۇلگەردى, جاسىنداي جارقىرادى. قازاقستاننىڭ اتىن الەمگە تانىتتى. دەنيستىڭ اتا-انا, تۋعان-تۋىستارىنىڭ قايعىلارىنا ورتاقپىز, - دەدى وبلىستىق دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى نۇرجاۋعان تولەۋوۆا.
دەنيسپەن قوشتاسۋعا وبلىستىق, قالالىق اكىمدىكتەن, «نۇر وتان» پارتياسى, قازاقستان حالقى اسسامبلەياسىنىڭ وبلىستىق بولىمشەلەرىنەن وكىلدەر كەلدى, قالا تۇرعىندارى دا مۇز سارايىنا بارىپ, قۇرمەت كورسەتتى.
ايتا كەتەيىك, بيىلعى ءساۋىر ايىندا وليمپيادا جۇلدەگەرى دەنيس تەن اتىراۋداعى مۇز سارايىنا ارنايى كەلىپ, جاس مانەرلەپ سىرعاناۋشىلارعا شەبەرلىك ساعاتىن وتكىزگەن ەدى. دەنيس ومىردەن ءوتتى دەگەن حاباردى ەستىگەلى وبلىس ورتالىعىندا عانا ەمەس, اۋدانداردا دا جاستار جينالىپ, جاس ساڭلاقتىڭ رۋحىنا قۇرمەت كورسەتۋ شارالارىن ۇيىمداستىرىپ جاتىر.
قازاقتىڭ تۋىن بيىككە كوتەرىپ, «بولمىسىم-قازاق» دەپ وتكەن جاس قىراننىڭ ەسىمى ۇمىتىلمايدى. سەن ماڭگى جۇرەگىمىزدەسىڭ, دەنيس!
باقىتگۇل باباش,
«ەگەمەن قازاقستان»
اتىراۋ
سۋرەتتى تۇسىرگەن: ءىلياس شايحيەۆ
