ايگىلى سپورتشىنى ەسكە الۋ شارالارى كەشە ەلىمىزدىڭ باسقا قالالارىنداعىداي وسكەمەن مەن سەمەي شاھارلارىندا دا ءوتتى.
وسكەمەندىكتەر كەشە كەشكى ساعات 8-دەن باستاپ, بوريس الەكساندروۆ اتىنداعى سپورت سارايىنىڭ الدىنا جينالىپ, سپورتشى سۋرەتىنىڭ الدىنا شىراق تۇتاتىپ, ەسكە الۋ ءراسىمىن جاسادى. مانەرلەپ سىرعاناۋدىڭ حاس شەبەرىن ەسكە الۋعا جينالعان جۇرتتىڭ اراسىندا اسىرەسە جاستاردىڭ قاراسى مول بولدى.
شىعىس قازاقستانعا جۇمىس ساپارىمەن كەلگەن «جاس وتان» جاستار قاناتىنىڭ اتقارۋشى حاتشىسى داۋلەت كارىبەكتى كوپشىلىك اراسىنان كەزدەستىرىپ, سوزگە تارتقانىمىزدا دەنيس تەنمەن 2015 جىلى رەسپۋبليكالىق جاستار فورۋمىن وتكىزگەن كەزدە تىكەلەي جۇمىس ىستەگەنىن, سول شاراعا دايىندىق كەزىندە سپورتشىنىڭ ادامگەرشىلىگىنە ءتانتى بولعانىن ايتتى. «كوپتەگەن تانىمال جاستارمەن بىرگە ول دا ەلباسى الدىندا ءسوز سويلەگەنى ەستەرىڭىزدە بولار. دايىندىققا كەشىكپەي, ەشكىمدى اۋرەلەمەي-اق كەلىپ ءجۇردى. ەڭبەگىن, ەسىمىن بۇلداۋ دەگەن مۇلدە بولعان جوق. موينىنا العان مىندەتىنە اسقان جاۋاپكەرشىلىكپەن قارايتىنىن كوردىك. وزىنە جەكە بولمە سۇراپ الىپ, ايتاتىن ءسوزىن پىسىقتاپ, داۋسىن شىعارا سويلەپ, دايىندالاتىن. فورۋم تاياعان ساتتە ءسوز سويلەۋى ءتيىس قىزداردىڭ كەيبىرى قاتتى قوبالجىدى. سول كەزدە دەنيس تەن الگى قۇرداستارىنا ءتاتتى بالىشتەر اكەپ بەرىپ, كوڭىلدەرىن اۋلاعان بولاتىن. دالىزدە كەزدەسە قالساق تا, بارىمىزگە پوزيتيۆ سىيلاپ, ماڭايىن جىگەرلەندىرىپ ءجۇردى. سويتكەن ايگىلى زامانداسىمىزدان شاڭقاي تۇستە كوز جازىپ قالعاندا, توبەمىزدەن جاي تۇسكەندەي بولدى. ول بارشا جاستاردىڭ جادىندا جارقىن بولمىسىمەن قالادى» - دەدى ول.
سەمەيدەگى ەسكە الۋ شارالارى ەرتىستىڭ جاعالاۋىندا ءوتتى. جۇزدەگەن سەمەيلىكتەر سپورتشىنىڭ سۋرەتىنىڭ جانىنا شىراق جاعىپ, گۇل شوقتارىن, كەيبىرى دەنيستىڭ ونەر كورسەتكەن سۋرەتتەرىمەن بىرگە ويىنشىقتاردى قويىپ, ەسىل ەردى ۇنسىزدىكپەن ەسكە الدى. «ول ۇلى سپورتشى, تالانتتى باپكەر بولدى. دەنيس كوپتەگەن تالانتتى بالالاردى مانەرلەپ سىرعاناۋعا باۋلىپ ءجۇر ەدى. بىراق سوڭىنا جەتە المادى. سەمەيدىڭ سپورتشى قاۋىمى ونىڭ اتا-اناسىنا, جاقىن-جۋىقتارىنا قايعىرىپ كوڭىل ايتادى», - دەدى سەمەيدە وتكەن ەسكە الۋ اكتسياسىنا قاتىسقان اۋىر اتلەتيكادان جاتتىقتىرۋشى ۆياچەسلاۆ ليۋ-شين.
ازامات قاسىم,
«ەگەمەن قازاقستان»
شىعىس قازاقستان وبلىسى
