ءۆلاديميردىڭ ايتۋىنشا, ولار بۇعان دەيىن پاتەر جالداپ كەلگەن. ەندى مەملەكەتتىك باعدارلامانىڭ ارقاسىندا جاڭا قۇرىلىستان كولەمى 72,5 شارشى مەتر بولاتىن جەكەمەنشىك پاتەرگە يە بولدى.
– ءبىز جەكەمەنشىك پاتەر الۋ ءۇشىن قارجى جينادىق, الايدا جاس وتباسى ءۇشىن قاجەتتى سومانى جيناۋدىڭ قانداي قيىن ەكەنىن وزدەرىڭىز دە بىلەسىزدەر عوي. مەن قازاقستاندا بار يپوتەكالىق نەسيەلەندىرۋ باعدارلامالارىنىڭ ءبارىن دە قاراستىردىم. بىراق ولاردىڭ ءبىر دە ءبىرى العاشقى تولەمى كوپ بولعاندىقتان بىزگە قولايلى بولمادى. ءتىپتى كەيبىر بانكتەردە باستاپقى تولەم 30 ميلليون تەڭگەگە دەيىن جەتىپ جاتتى. «7–20–25» باعدارلاماسى بويىنشا ءبىزدىڭ پاتەردىڭ باعاسى 15 ميلليون تەڭگە بولدى, ارتىعىمەن تولەۋ 16 ميلليون تەڭگەنىڭ شاماسىندا. اي سايىن ءبىز 85 مىڭ تەڭگەدەن تولەپ وتىرامىز. جالعا الاتىن پاتەرگە اي سايىن 100 مىڭ تەڭگەدەن تولەگەننەن بۇل بىزگە الدەقايدا جاقسى بولدى, – دەيدى ۆلاديمير.
وتباسى ءۇشىن قاجەتتى قۇجاتتاردى جيناستىرۋعا بەس جۇمىس كۇنى كەتكەن ەكەن. بۇگىندە بانك مەملەكەتتىك باعدارلاما بويىنشا باسپانا الۋعا تىلەك بىلدىرگەن تاعى دا التى ءوتىنىمدى قاراستىرىپ جاتىر.
– بانكتە باعدارلاما 4 شىلدەدەن باستاۋ الدى. وتكەن اپتادا قازاقستاننىڭ التى قالاسىندا يپوتەكالىق قارىز بويىنشا نەسيە بەرىلدى. ءبىزدىڭ وڭىردە بۇل باعدارلاما قاتىسۋشىسىنا بەرىلگەن العاشقى نەسيە. بۇل ۇزاق مەرزىمدىلىگى ەسەبىنەن وتە قولايلى, نەسيەنى 25 جىل تولەۋگە بولادى. باستاپقى تولەم بار-جوعى 20%, ياعني باعدارلاما بويىنشا ءبىزدىڭ وڭىردەگى پاتەردىڭ باعاسى 15 ميلليون تەڭگە بولسا, باستاپقى جارنا 3 ميلليون تەڭگەنى قۇرايدى. پايىزدىق تولەم دە وتە تومەن, ەلىمىز بويىنشا – 7%. قۇجاتتار تولىق جينالعان كەزدە ءبىز ءوتىنىمدى ءۇش جۇمىس كۇنى ىشىندە قارايمىز, – دەپ ءتۇسىندىردى «بانكتسەنتركرەديت» قاراعاندى وبلىستىق فيليالىنىڭ ديرەكتورى روزا سىزدىقوۆا.
يپوتەكالىق قارىزعا ءوتىنىم راسىمدەۋگە قاجەتتى قۇجاتتار تىزىمىنە تابىس تۋرالى انىقتاما نەمەسە سالىق دەكلاراتسياسى جانە جەكەمەنشىك باسپاناسى جوقتىعى تۋرالى جەرگىلىكتى اتقارۋشى ورگاننان انىقتاما كىرەدى. بۇل تالاپقا جاتاقحاناداعى بولمەلەر مەن اپاتتى جاعدايداعى باسپانا جاتپايدى. قالعان قۇجاتتىڭ ءبارىن قارىز الۋشى كرەديتور بانكتىڭ تالابى بويىنشا ۇسىنۋى كەرەك.
مەملەكەتتىك باعدارلاما بويىنشا يپوتەكالىق نەسيەنى 25 جىلعا الۋ مىندەتتى ەمەس. قارىزدى قايتارۋ مەرزىمىن جەتكىلىكتى تابىس كوزى بولسا قىسقارتۋعا دا بولادى. سونداي-اق باعدارلامادا ايىپپۇل سانكتسياسىنسىز قارىزدى مەرزىمىنەن بۇرىن تولەپ تاستاۋ دا قاراستىرىلعان.
قايرات ءابىلدا,
«ەگەمەن قازاقستان»
قاراعاندى
