«نۇر وتاننىڭ» پارتيا قىزمەتىن جاڭعىرتۋ جۇمىستارىنىڭ اياسىندا بىرقاتار الەۋمەتتىك ماڭىزدى جوبالار قارقىندى جۇرگىزىلىپ, سونىڭ ىشىندە مۇمكىندىگى شەكتەۋلى جاندارعا قولايلى ورتا قالىپتاستىرۋعا ارنالعان ءىس-شارالار دا تۇراقتى قولعا الىنۋدا. دەسەك تە, ءالى قامتىلماي جاتقان ماسەلەلەر دە جەتكىلىكتى. «نۇر وتان» پارتياسىنىڭ باستاماسىمەن وسى ماسەلەمەن اينالىساتىن ۇكىمەتتىك ەمەس ۇيىم وكىلدەرى استانا قالاسىنىڭ اكىمدىگىندە باس قوسىپ, ناقتى ۇسىنىستارى مەن تىلەكتەرىن جەتكىزدى.
«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ الەۋمەتتىك ماسەلەلەردى وڭتايلى شەشۋ ەلباسى ەل الدىنا قويعان دامىعان 30 ەلدىڭ قاتارىنا ەنۋ مىندەتىندەگى نەگىزگى تالاپتاردىڭ ءبىرى ەكەنىن جەتكىزدى. «بۇگىندە مۇگەدەك جانداردى قوعامدىق ۇيىمدار, ۇكىمەتتىك ەمەس ۇيىمدار مەن قوعام بەلسەندىلەرى تاراپىنان قولداۋ جاقسى ۇردىسكە اينالدى. وسى ورايدا «نۇر وتان» پارتياسى قىزمەتىن جاڭعىرتۋ اياسىندا مۇمكىندىگى شەكتەۋلى جانداردىڭ ءومىر ءسۇرۋ ساپاسىن جاقسارتۋعا باعىتتالعان «كەدەرگىسىز كەلەشەك» پارتيالىق جوباسىن ودان ءارى جانداندىرىپ, تيىمدىلىگىن ارتتىرۋدى قولعا الدىق. سول ارقىلى ەرەكشە كۇتىمدى قاجەت ەتەتىن ازاماتتارعا ناقتى كومەك بەرۋگە باسىمدىق بەرىپ وتىرمىز. جوبانىڭ نەگىزگى مىندەتى – مۇمكىندىگى شەكتەۋلى قازاقستاندىقتاردىڭ ءومىر ساپاسىن جاقسارتۋ. ءبىز قازىرگى ۋاقىتتا جوبانى قاجەت ەتەتىن, ۇكىمەت, پارتيا جانە قوعام تاراپىنان كومەك كۇتەتىن جاندارعا شىن مانىندە كومەگىن تيگىزۋى ءۇشىن قايتادان قاراستىرىپ جاتىرمىز. بولاشاقتا جوبانى كۇشەيتىپ, ماڭىزىن ارتتىرا تۇسپەكپىز», دەي كەلە, پارتيا توراعاسىنىڭ ءبىرىنشى ورىنباسارى جوبانىڭ كەلەسى كەزەڭدەرىندەگى ءتورت باسىمدىقتى اتاپ كورسەتتى. ونىڭ العاشقىسى, مۇمكىندىگى شەكتەۋلى جاندارعا كەدەرگىسىز ورتا جاساقتاۋ بولسا, ەكىنشىسى, بالالاردىڭ ينكليۋزيۆتى ءبىلىم الۋىنا كومەكتەسۋ بولماق. ۇشىنشىدەن, ولاردىڭ جۇمىسقا ورنالاسۋىنا جاعداي جاساپ, جاعدايىن جاقسارتۋعا مۇمكىندىك بەرۋ كەرەك. سوڭعى باسىمدىق وسى سالا بويىنشا ەل زاڭناماسىن جەتىلدىرۋگە بەرىلەدى.
ءوز كەزەگىندە قالا اكىمى ءا.يسەكەشەۆ بۇل باعىتتا اتقارىلىپ جاتقان جۇمىستاردى بايانداپ ءوتتى. ونىڭ ايتۋىنشا, بۇگىنگى تاڭدا استانا قالاسىندا 23 مىڭنان استام مۇمكىندىگى شەكتەۋلى ادام تىركەلگەن ەكەن. ولاردىڭ ءجۇرىپ-تۇرۋىنا, عيماراتتارعا كىرىپ-شىعۋعا ىڭعايلى جاعداي جاساۋ ماقساتىندا كوپتەگەن ساۋدا جانە الەۋمەتتىك نىساندار پاسپورتتاۋدان وتكەن. «2012-2016 جىلدار ارالىعىندا 400 نىسان, ال 2017 جىلى تاعى 705 نىسان پاسپورتتاۋدان ءوتتى. وسىلايشا, بۇگىندە قالاداعى مىڭنان استام عيماراتتىڭ 70 پايىزى مۇمكىندىگى شەكتەۋلى ازاماتتار ءۇشىن تولىعىمەن قايتا جاساقتالدى.
جينالىستا ءسوز العان «ەLAMAN» الەۋمەتتىك-يننوۆاتسيالىق جوبالار قورىنىڭ توراعاسى الماز ەرجان مۇگەدەكتەرگە جاعداي جاساۋدىڭ كەمشىن تۇستارىن اتادى. ونىڭ ايتۋىنشا, ەلوردادا جاڭا نىساندار سالىنۋ بارىسىندا مۇگەدەكتەر ماسەلەسى بىردەن ەسكەرىلمەيدى. كەيىن قارجى شىعىندالىپ, وزگەرتىلەدى. الدىن الىپ, قۇرىلىستىڭ جوباسى تالقىلانعاندا مۇمكىندىگى شەكتەۋلى جاندار شاقىرىلمايدى, كەڭەسى الىنبايدى. ء«تىپتى مەملەكەتتىك مەكەمەلەردە مۇگەدەكتەرگە ارنالعان دارەتحانا, عيماراتقا ءمىنىپ-تۇسۋگە ارنالعان پاندۋستار جوقتىڭ قاسى. بۇل ءبىزدىڭ قۇقىعىمىزدىڭ تاپتالۋى. مەملەكەت باسشىسى ۇنەمى قايتالايتىن رۋحاني جاڭعىرۋ يدەياسىنىڭ ءوزى ەڭ الدىمەن ازاماتتاردىڭ ونى تۇسىنۋىنەن باستالادى», – دەدى ا.ەرجان.
وسى باعىتتا جۇرگىزىلىپ جاتقان جۇمىستار كەلەشەكتە مۇگەدەكتەر تاراپىنان تۇسكەن ۇسىنىستارمەن تولىقتىرىلىپ, پارتيا جانە اكىمدىك تاراپىنان قاداعالاۋعا الىناتىن بولدى. شارا قورىتىندىسى بويىنشا بىرقاتار ۇسىنىستار ءتۇسىپ, وسى ماسەلە بويىنشا جۇمىستاردى باقىلاۋ «نۇر وتان» پارتياسىنىڭ حاتشىسى تامارا دۇيسەنوۆاعا جۇكتەلدى.
ۆەنەرا تۇگەلباي,
«ەگەمەن قازاقستان»
