بۇل ۇجىمنىڭ ماقساتى اگرارلىق سالاعا زاماناۋي جاڭالىقتاردى ەنگىزىپ, ءونىم الۋدىڭ ءتيىمدى جولدارىن سىناقتان وتكىزۋ بولىپ وتىر. عالىمدار مەن تەحنيكا عىلىمىنىڭ وزاتتارى قىزمەت اتقاراتىن سەرىكتەستىكتىڭ جۇمىسى اۋىلشارۋاشىلىعىنىڭ بىرنەشە سالاسىن قامتيدى. جاقىندا سەرىكتەستىك بازاسىندا «قاسكەلەڭ» اگروپاركى دەگەن اتاۋمەن پيلوتتىق جوبا جۇزەگە اسا باستادى.
«قاسكەلەڭ» اگروپاركى – ناقتى ەگىن شارۋاشىلىعى ءۇشىن يننوۆاتسيالىق ادىستەردى ەنگىزۋگە ارنالعان جوبا. قازىر جۇگەرى, سويا, جازدىق بيداي, ارپا جانە باسقا دا ونىمدىلىگى جوعارى داقىلداردى ءوسىرۋ مەن جيىن-تەرىن كەزىندەگى شىعىندى ازايتۋ, سول ارقىلى جۇمىستى مەيلىنشە تسيفرلى تەحنولوگياعا نەگىزدەۋ باعىتىندا ناتيجەلى جۇمىس جاسالۋدا.
كۇنى كەشە قاسكەلەڭگە ەلىمىزدىڭ تۇكپىر-تۇكپىرىنەن جينالعان فەرمەرلەر مەن شەتەلدىك عالىمدار اگروپارك اۋماعىندا اتقارىلعان شارالارعا كۋا بولىپ, سوڭعى جەتىستىكتەردىڭ ءىس جۇزىنە اسقاندىعىنا كوز جەتكىزدى.
– عىلىمي-وندىرىستىك اگروپاركتەرىنىڭ دامۋى – اگروونەركاسىپتىك كەشەندەگى ەڭبەك ونىمدىلىگىن ارتتىرۋ جانە وڭدەلگەن اۋىل شارۋاشىلىعى ونىمدەرىن ەكسپورتتاۋدى كەمىندە 2,5 ەسەگە ارتتىرۋ جونىندەگى ەلباسىنىڭ تاپسىرماسىن ورىنداۋعا مۇمكىندىك بەرەدى. «قاسكەلەڭ» اگروپاركىندە وتكەن ءىس-شارا ەگىن جيناۋداعى جاڭا تەحنولوگيالاردى تانىستىرىپ, اۋىل شارۋاشىلىعى ونىمدەرىن وندىرۋشىلەرگە ۇزدىك سۇرىپتاردىڭ ونىمدىلىگىن ارتتىرۋ ءۇشىن ازىرلەنگەن جاڭا تەحنولوگيالاردى ەنگىزۋ ناتيجەلەرىن كورسەتتى. ولاردىڭ ىشىندە «اقىلدى» كومباين مەن No till – سۋارىلمايتىن جەرلەردە قارقىندى وسىمدىكتەردى ەگىپ ءوسىرۋ تەحنولوگياسىن ەرەكشە اتاپ وتۋگە بولادى, – دەدى قاسكەلەڭگە جينالعان ەكى جۇزگە تارتا فەرمەرلەردىڭ باس قوسۋىندا اۋىل شارۋاشىلىعى ءمينيسترىنىڭ ءبىرىنشى ورىنباسارى ارمان ەۆنيەۆ.
سەميناردا «قاسكەلەڭ» اگروپاركى جەر-جەردەن جينالعان ديقاندار مەن مامانداردىڭ نازارىنا ادامنىڭ قاتىسۋىنسىز ەگىن وراتىن كومبايننىڭ جۇمىسىن ۇسىندى. بۇل قازاقستان ءۇشىن بىرەگەي تسيفرلى جوبا ەكەن. سەرىكتەستىك ماماندارى John Deere S760 كومباينىن اۆتوماتتى باسقارۋدى ويلاپ تاپقان. تولىقتاي كومپيۋتەرمەن باسقارىلاتىن كومباين «اۆتوپيلوت» رەجيمىندە جۇمىس ىستەپ, ارنايى باعدارلاما ارقىلى القاپتاعى ءداندى داقىلدى ءوزى ورىپ, جيناي الادى. ول ءۇشىن ەگىستىك القابىنىڭ ەلەكترودى كارتاسى جاسالىپ, تاناپتاعى قارىس سۇيەم جەر ولشەنىپ الىنادى دا, ول كومبايننىڭ «جاساندى ينتەلەكتىنە» جولدانادى, ارى قارايعى جۇمىستى اقىلدى كومباين ءوزى رەتتەپ, كەرەك تەتىكتى ىسكە قوسىپ وتىرادى.
جوعارىدا «قاسكەلەڭ تاجىريبەلىك شارۋاشىلىعى» جاۋاپكەرشىلىگى شەكتەۋلى سەرىكتەستىگىنىڭ جۇمىسى سان-سالالى ەكەنىن ايتتىق. ونىڭ ىشىندە سەرىكتەستىكتىڭ اگروونەركاسىپتىك كەشەندى تسيفرلى جۇيەگە كوشىرۋ اياسىندا باستاعان ءىسى قولداۋعا تۇرارلىق. ماسەلەن, ەگىن القاپتارىن سۋارۋدى ەلەكتروندى باسقارۋ, درونداردىڭ كومەگىمەن جەردى قاشىقتىقتان الدىن الا تەكسەرۋ, روبوتتاندىرىلعان استىق جيناۋ جانە سپۋتنيك بايلانىسى ارقىلى مەتەوستانتسيامەن جالعانىپ, تىڭايتقىشتاردى اۆتوماتتى تۇردە ەنگىزۋ سياقتى ناقتى ۇسىنىستارى وتاندىق اۋىل شارۋاشىلىعىن دامىتۋدا كەڭىنەن قولدانىلسا, بۇل باعىتتاعى جۇمىس ناتيجەلى بولارى ءسوزسىز.
قالماحانبەت مۇقامەتقالي,
«ەگەمەن قازاقستان».
الماتى وبلىسى
