شارا ماقساتى – جاڭا تۋريستىك باعىتتاردى جاساۋ ءۇشىن تابيعي, تاريحي, كيەلى مەكەندەرى زەرتتەۋ, ىشكى تۋريزم مەن ينفراقۇرىلىمدى دامىتۋ, سونىمەن قاتار تۋعان ەلدى زەرتتەۋ.
ەكسپەديتسيا 2018 جىلعى 18 شىلدە مەن 29 قىركۇيەك ارالىعىندا 6 باعىت بويىنشا 6 تۋريستىك كلاستەردى قامتي وتىرىپ, ماڭىزدى تابيعي نىساندارعا بارۋ ارقىلى وتكىزىلەدى.
باعىتتار ءتۋريزمدى دامىتۋ ءۇشىن قىزىقتى دەپ تابىلاتىن بارىنشا كوپ تابيعي جانە كيەلى مەكەندەردى قامتي وتىرىپ جوسپارلانعان:
- «تيان-شان مارجانى» - الماتى وبلىسى;
- «التاي – وركەنيەت بەسىگى» - شىعىس قازاقستان وبلىسى;
- «جوڭعار الاتاۋى» - الماتى وبلىسى;
- «سارىارقا» - اقمولا, پاۆلودار, قاراعاندى, قوستاناي وبلىستارى;
- «تەڭىزدەن تەڭىزگە دەيىن» - قىزىلوردا, اقتوبە, ماڭعىستاۋ وبلىستارى;
- «جاڭا جىبەك جولى» - تۇركىستان, جامبىل, الماتى وبلىستارى.
ء«بىز قازاقستاندىقتاردىڭ ءوزىمىزدىڭ تۋعان جەردى, اتا-بابامىز مۇراسىن تانۋعا قىزىعۋشىلىعى ارتىپ كەلە جاتقانىن بايقاپ ءجۇرمىز. ەلىمىزدىڭ تابيعاتى ەرەكشە – مۇندا تاۋ دا, جازىق تا, كول دە, وزەن دە بار! سوندىقتان ءبىز التايدان جىبەك جولىنا دەيىنگى ارالىقتى قامتيتىن ەكسپەديتسيانى ۇيىمداسىتىرىپ جاتقانىمىزدى ماقتانىش ەتەمىز. 3 اي ىشىندە كاسىبي مامانداردان قۇرالعان توپ ەلىمىزدىڭ ەڭ قىزىقتى جەرلەرىن ارالاپ, ولار تۋرالى قازاقستاندىق جانە شەتەلدىك تۋريستەرگە باياندايتىن بولادى. ەكسپەديتسيا سونىمەن قاتار سول جەرلەردەگى ءتۋريزمدى ارى قاراي دامىتۋ ءۇشىن قاجەتتى ينفراقۇرىلىمدىق شەشىمدەردى تابۋعا مۇمكىندىك بەرەدى», - دەپ اتاپ ءوتتى «Kazakh Tourism» ۇك» اق باسقارما توراعاسى راشيد كۇزەمباەۆ.
ەكسپەديتسياعا 140-قا جۋىق ادام قاتىسادى دەپ كۇتىلۋدە, ولاردىڭ قاتارىنا كاسىبي گيدتەر مەن تاجىريبەلى ساياحاتشىلار, جۋرناليستەر, ترەۆەل-بلوگەرلەر, سونداي-اق دەپۋتتار مەن مەديا تۇلعالار كىرەدى. «جاڭا جىبەك جولى» باعىتى بويىنشا National Geographic رەسەي توبى قاتىسادى.
ء«بىز قازاقستاندى زەرتتەۋ ماقساتىندا ۇيىمداستىرىلعان وسىنداي ۇلكەن دە ماڭىزدى جوبانىڭ بولشەگى بولاتىنىمىزعا وتە قۋانىشتىمىز. ەكسپەديتسيا وسى سارسەنبىدە باستالادى, اركىمنىڭ وسى جولدان دامەسى بارىنا سەنىمدىمىن. باستى مىندەت – الدىمىزدا 6 ايماقتى تۋريستەرگە جاڭا قىرىنان تانىستىرۋ. ءبىز جاڭا اسەرگە بولەنىپ, جاڭالىقتاردى اشۋ ءۇشىن شەتەلگە شىعۋدىڭ قاجەتى جوق ەكەنىن كورسەتكىمىز كەلەدى, سەبەبى ەلىمىزدىڭ تاريحىنا قاتىستى ەڭ ماڭىزدى دا قىزىقتى جەرلەر بارلىعى ءوز ەلىمىزدە ورنالاسقان», - دەيدى Kazakh TV تەلەارناسىنىڭ ديرەكتورى ساندۋعاش راحىمجانوۆا.
ەكسپەديتسيا ناتيجەسىندە ەلىمىزدىڭ تابيعي نىساندارى تۋرالى جاڭا تۋريستىك باعىتتار, ساپالى فوتو- جانە ۆيدەوبانكتەر قۇرىلادى, ولاردىڭ قازىرگى كۇيى تۋرالى وزەكتى اقپارات الىنادى. سونىمەن قاتار ەكسپەديتسيا بارىسىندا قامتىلعان تابيعي نىساندار بويىنشا يلليۋستراتسيالانعان جولنۇسقا جاسالاتىن بولادى. ەكسپەديتسيا بارىسى باق بەتتەرى مەن الەۋمەتتىك جەلىلەردە كەڭىنەن كورسەتىلىپ وتىرادى. ەكسپەديتسيا قۇرامىنا تۋريستىك نىساندارعا بارۋ ناتيجەسى بويىنشا ارنايى تەلەۆيزيالىق باعدارلاما جاساۋدى جوسپارلاپ وتىرعان «Kazakh TV» تەلەارناسىنىڭ ءتۇسىرىلىم توبى كىردى. ەكسەپديتسيانىڭ كەيبىر باعىتتارىنا «حابار-24» ارناسىنداعى «جەرۇيىق» باعدارلاماسىنىڭ ءتۇسىرىلىم توبى قوسىلاتىن بولادى.
ەكسپەديتسيانىڭ رەسمي مەديا-سەرىكتەستىگى «حابار» اگەنتتىگى بولىپ تابىلادى
