«نۇر وتان» پارتياسىنىڭ جاڭا جوبالارىنىڭ نەگىزگى باعىتتارىنىڭ ءبىرى «تسيفرلى قازاقستان» باعدارلاماسىن ىسكە اسىرۋمەن بايلانىستى ەكەنى بەلگىلى. وسىعان وراي پارتيا ەلباسىنىڭ تسيفرلاندىرۋ مەن ەكونوميكالىق جاعىنان ءبىلىمدى مامانداردى دايىنداۋ جونىندەگى باستاماسىنا قولداۋ ءبىلدىرۋدى كوزدەيدى.
جەزقازعانعا ساپارى كەزىندە پارتيا توراعاسىنىڭ ءبىرىنشى ورىنباسارى الدىمەن « ۇلىتاۋ نان» نان زاۋىتىنا باردى. مۇندا بارلىق جۇمىس پروتسەسى اۆتوماتتاندىرىلعان. جاڭا كاسىپورىن تاۋلىگىنە 35 تونناعا دەيىن نان ءونىمىن شىعارادى. دايىن ءونىم جەزقازعان مەن ساتباەۆ قالالارىنا جانە قاراجال مەن ۇلىتاۋ اۋداندارىنا جەتكىزىلەدى. زاۋىت ەلباسى ايقىنداپ بەرگەن تسيفر-
لاندىرۋ جونىندەگى بارلىق تالاپتارعا تولىق ساي كەلەتىنىن دە ەرەكشە اتاپ وتكەن ءجون.
كاسىپورىن قىزمەتكەرلەرىمەن كەزدەسۋدە ماۋلەن اشىمباەۆ مۇنداي زاماناۋي ءوندىرىس وشاعىنىڭ اشىلۋى جانە الدىڭعى قاتارلى يننوۆاتسيالىق تەحنولوگيالاردىڭ ەنگىزىلۋى جەرگىلىكتى حالىقتىڭ جۇمىسپەن قامتىلۋىنا مۇمكىندىك بەرىپ, ءوڭىردىڭ ەكونوميكالىق احۋالىن جاقسارتا تۇسەتىنىن اتاپ ءوتتى.
جەزقازعاندا باعدارلامالاۋ نەگىزدەرىن ۇيرەتەتىن IT-ورتالىق «UTARI KZ» وندىرىستىك يننوۆاتسيالىق كومپانياسىنىڭ بازاسىندا اشىلدى. ول جەردە بالالارعا ارنالعان تەگىن IT-سىنىپتار جۇمىس ىستەيدى. ماۋلەن اشىمباەۆ اتالعان ورىندارعا دا ارنايى بارىپ, كومپانيانىڭ جۇمىسىمەن تانىستى. بۇل جەردە حيميا, مۇناي-گاز, مەتاللۋرگيا, تاماق, ءدارى-دارمەك, اۆتوموبيل ءوندىرىسى, كوممۋنالدىق شارۋاشىلىق, ترانسپورت پەن قۇرىلىس سالاسىنىڭ جۇمىسشىلارى ءۇشىن ارنايى كيىمدەر شىعارىلىپ, كۇندەلىكتى ءومىر مەن دەمالۋعا ارنالعان كيىمدەر تىگىلەدى. كاسىپورىن كومپيۋتەرلىك باعدارلامامەن باسقارىلاتىن ارنايى قوندىرعىمەن جابدىقتالعان.
تىگىن تسەحىنىڭ جۇمىسشىلارىمەن كەزدەسكەن ماۋلەن اشىمباەۆ سوڭعى ايلاردا «نۇر وتان» پارتياسى الەۋمەتتىك ماسەلەلەرگە ءجىتى كوڭىل ءبولىپ, اۋقىمدى جۇمىستار اتقارىپ جاتقانىن تىلگە تيەك ەتتى.
– پارتيا ساياسي كەڭەسىنىڭ وتىرىسىندا ەلباسى وسى باعىتتاعى بىرقاتار جاڭا جوبالارىمىزدى بەكىتىپ, ناقتى تاپسىرمالار بەردى. ولاردىڭ قاتارىندا ەلىمىزدىڭ بولاشاعى سانالاتىن وسكەلەڭ ۇرپاقتىڭ دەنى ساۋ, ءبىلىمدى, باسەكەگە قابىلەتتى بولىپ قالىپتاسۋى ءۇشىن جاعداي جاساۋ ءىسى دە بار. سوعان وراي پارتيا ەلىمىز بويىنشا ءىت-سىنىپتار اشۋدى قولعا الدى. وسى رەتتە اتالعان سىنىپتاردى استانا, الماتى سياقتى ءىرى شاھارلاردا عانا ەمەس, جەزقازعان سياقتى مونوقالالار مەن اۋدانداردا اشىپ, ورتالىقتان شالعايدا جاتقان ەلدى مەكەندەردەگى بالالاردىڭ تسيفرلى ساۋاتتىلىعىن ارتتىرۋعا, باسەكەگە قابىلەتتى بولۋىنا, بولاشاقتىڭ ماماندىقتارىن يگەرۋگە جاعداي جاساۋىمىز كەرەك. وسى تۇرعىدان كەلگەندە قاراعاندى وبلىسىندا اتقارىلىپ جاتقان جۇمىستار كوڭىل قۋانتادى. وبلىس بويىنشا قازىردىڭ وزىندە بىرنەشە ءىت-سىنىپتار اشىلىپ, جەرگىلىكتى جاستار زاماناۋي ءبىلىم الۋدا, – دەدى «نۇر وتان» پارتياسى توراعاسىنىڭ ءبىرىنشى ورىنباسارى.
وسى رەتتە «نۇر وتان» پارتياسى قازاقستاندىق IT-كومپانيالار مەن وڭىرلىك جوعارى وقۋ ورىندارىنىڭ بازاسىندا 20 IT-ورتالىق جانە تەگىن 1000 ءىت-سىنىپ اشۋدى قولعا الىپ, ءتيىستى جۇمىستاردى باستاپ كەتكەنىن اتاپ وتكەن ءجون. ماۋلەن اشىمباەۆتىڭ ايتۋىنشا, پارتيا ءىت-سىنىپتاردى اشۋ ارقىلى جاستارعا باعدارلامالاۋ نەگىزدەرىن ۇيرەتىپ قانا قويماي, روبوت تەحنيكالارى مەن 3D مودەلدەۋدى دە مەڭگەرۋگە جاعداي جاسايدى.
جەزقازعاندا «رۋحاني جاڭعىرۋ» باعدارلاماسىنىڭ «تۋعان جەر» جوباسى بويىنشا دا جۇمىستار قارقىندى جۇرگىزىلۋدە. سونىڭ اياسىندا الەۋمەتتىك از قامتىلعان ازاماتتارعا ارنالعان جاتاقحانا قايتا جاڭعىرتىلىپ, جەرگىلىكتى كومپانيالاردىڭ جاس ماماندارىنا بەرىلگەن. بۇل جاتاقحانانىڭ وزگەلەردەن باستى ايىرماشىلىعى رەتىندە وندا بىرقاتار پارتيالىق جوبالاردىڭ جۇزەگە اسىرىلۋىن ايتۋعا بولادى. ياعني نۇروتاندىق كاسىپكەرلەر بۇل جەردە جاڭا پارتيالىق باستامالارمەن ۇندەسەتىن بىرنەشە قىزىقتى ءبىلىم بەرۋ جوبالارىن ىسكە قوسقان. ايتالىق, عيماراتتىڭ ءبىرىنشى قاباتىندا «Open space library» ايماعى – اشىق ەلەكتروندىق كىتاپحاناسى ورنالاسقان, ال جانىندا ء«ۇش تۇعىرلى ءتىل» باعدارلاماسى بويىنشا اشىلعان – «Qazaq kluby» مەن «English club» جۇمىس ىستەيدى. جاتاقحانادا دەربەس «Co-working ورتالىعى», «ياركيە ۋمى» ءبىلىم مەن دامۋ ورتالىعى, «ليدەرلەر مەكتەبى», «Business mentoring» جانە «Magic kitchen» ورتالىقتارى, شاحمات پەن توعىزقۇمالاق ويىنىنىڭ ستۋدياسى بار. «نۇر وتان» پارتياسىنىڭ بالالارعا ارنالعان تەگىن IT-سىنىپتار جوباسى بويىنشا «IT TECHNOLOGY FOR YOU» ورتالىعىنىڭ بازاسىندا قازىرگى زامانعى IT-سىنىپتار اشىلعان.
بۇل جەردە باعدارلامالاۋ مەن روبوت تەحنيكاسى سالاسى الەمدىك ستاندارتقا ساي وقىتىلادى. جىلدىڭ سوڭىنا دەيىن «اتامەكەن» ۇلتتىق كاسىپكەرلەر پالاتاسى جانە وڭىردەگى بيزنەس وكىلدەرىمەن بىرگە 2500-دەن استام ادامدى قامتي-تىن بالالارعا ارنالعان تاپ وسىنداي 40 IT-سىنىپ اشۋ جوسپارلانعان.
«رۋحاني جاڭعىرۋ» باعدارلاماسىن ىسكە اسىرۋ شەڭبەرىندە نۇروتاندىقتار ەلىمىزدەگى كىتاپحانالاردى زاماناۋي ءبىلىم ورتالىقتارىنا اينالدىرۋ باستاماسىن قولعا العانى بەلگىلى. ماۋلەن اشىمباەۆ ساتباەۆ قالاسىنداعى وسىنداي جاڭا ءبىلىم بەرۋ ورتالىعىنا ارنايى باردى. مۇندا «سو-working ورتالىعى» جەرگىلىكتى كىتاپحانا بازاسىندا اشىلعان. وندا جاستاردىڭ جۇمىس ىستەۋى جانە دەم-
الۋى ءۇشىن بارلىق جاعداي جاسالعان. اتاپ ايتقاندا, توپ بولىپ جانە جەكە جۇمىس ىستەۋگە ارنالعان ايماقتار, تەگىن Wi-Fi, قاجەتتى تەحنيكا جانە تاعى باسقا مۇمكىندىكتەر قاراستىرىلعان. جاستارمەن كەزدەسۋىندە پارتيا توراعاسىنىڭ ءبىرىنشى ورىنباسارى, وسى جىلدىڭ سوڭىنا دەيىن «نۇر وتاننىڭ» قولداۋىمەن قاراعاندى وبلىسىندا تاعى دا بىرقاتار ءبىلىم ورتالىعىنىڭ اشىلاتىنىن ايتتى.
پارتيا توراعاسىنىڭ تاپسىرماسى بويىنشا نۇروتاندىقتار اعا ۇرپاقتى قولداۋعا باعىتتالعان تاعى ءبىر ماڭىزدى «ارداگەرلەردى ارداقتايىق» جوباسىن ىسكە اسىرۋدا. ودان بولەك, جەڭىس كۇنى قارساڭىندا پارتيانىڭ باستاماسى بويىنشا «ەرلىك ەشقاشان ۇمىتىلمايدى» ءىس-شاراسى دا قاتار جۇرگىزىلىپ كەلەدى. جەزقازعانعا ساپارى بارىسىندا ماۋلەن اشىمباەۆ 95 جاسقا تولعان ۇلى وتان سوعىسىنىڭ ارداگەرى نينا ستەپانوۆنا ۆينوگرادوۆامەن كەزدەسىپ, مايدانگەردى مەرەيتويىمەن قۇتتىقتادى.
* * *
قاراعاندى وبلىسىنا جۇمىس ساپارى اياسىندا «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ قاسيەتتى ۇلىتاۋ جەرىندە وتكەن «جەزكيىك» حالىقارالىق مۋزىكا فەستيۆالىنىڭ اشىلۋ سالتاناتىنا قاتىستى. «رۋحاني جاڭعىرۋ» باعدارلاماسى اياسىندا وتكەن ءىس-شارادا رەسەي, فرانتسيا, پولشا, تۇركيا, شوتلانديا, جاپونيا, تاجىكستان جانە سوناۋ مەكسيكا مەن پەرۋ ەلىنەن كەلگەن ەتنو-فولكلورلىق انسامبلدەر ونەر كورسەتتى.
فەستيۆالدىڭ شىمىلدىعى «ارقا سازى» فولكلورلىق ءانسامبلى مەن «اققۋ» ءانسامبلىنىڭ تەاترلاندىرىلعان قويىلىمىمەن ءتۇرىلدى. العاش بولىپ ءسوز العان مادەنيەت جانە سپورت ءمينيسترى ارىستانبەك مۇحامەدي ۇلى ەلباسىنىڭ بارشا قاتىسۋشىلارعا ارنالعان قۇتتىقتاۋ حاتىن وقىپ بەردى.
قازاق ەلىنىڭ رۋحاني ورتالىقتارىنىڭ ءبىرى سانالاتىن قاسيەتتى ۇلىتاۋ جەرىندە, «رۋحاني جاڭعىرۋ» باعداراماسى اياسىندا وتەتىن بۇل ونەر مەرەكەسى ەلىمىزدىڭ مادەني ومىرىندەگى ايتۋلى وقيعا بولادى دەپ سەنەمىن. ءتول تاريحى مەن ونەرىن قاستەرلەگەن ۇلت قانا بيىك ماقساتتارعا قول جەتكىزە الادى. مۋزىكا ونەرى – حالىقتىڭ تاريحىن, اسقاق رۋحىن, جان دۇنيە سۇلۋلىعىن پاش ەتەتىن رۋحاني قۇندىلىقتاردىڭ ءبىرى. سونداي-اق بۇل فەستيۆال حالقىمىزدىڭ مادەني مۇراسىن جاڭعىرتىپ, فولكلورلىق ونەرىمىزدىڭ باعا جەتپەس بايلىعىن الەمگە تانىتۋعا دا وڭ ىقپالىن تيگىزەدى دەپ ويلايمىن», – دەلىنگەن ەلباسىنىڭ قۇتتىقتاۋىندا.
بۇدان سوڭ, «نۇر وتان» پارتياسى توراعاسىنىڭ ءبىرىنشى ورىنباسارى م.اشىمباەۆ قاتىسۋشىلار مەن بارشا حالىقتى وسىنداي كەرەمەت ونەر كەشىمەن قۇتتىقتاپ, بۇل شارانىڭ قازاق مادەنيەتىنىڭ ءورىسىن كەڭەيتەتىن تىڭ باستاما ەكەنىن ايتتى.
– بۇل فەستيۆال ەلباسىمىزدىڭ «رۋحاني جاڭعىرۋ» باعدارلاماسىنىڭ جەمىسى ەكەنى ءسوزسىز. ءبىز وسىنداي يگى باستامالار ارقىلى حالقىمىزدىڭ رۋحاني جانە مادەني قۇندىلىقتارىن ساقتاپ, ولاردى بۇكىل الەمگە دارىپتەپ, تانىمالدىلىعىن ارتتىرامىز. سونداي-اق الەم مادەنيەتىنىڭ وزىق تۇستارىنان ۇلگى الىپ, ۇلتتىق قۇندىلىقتارىمىزدىڭ اياسىن كەڭەيتەمىز. سوندىقتان «رۋحاني جاڭعىرۋ» باعدارلاماسى اياسىندا ءوتىپ وتىرعان بۇگىنگى «جەزكيىك» حالىقارالىق فەستيۆالى الدىمىزدا تۇرعان وسىنداي ماقساتتاردىڭ ءساتتى جۇزەگە اسىرىلۋىنا وڭ اسەرىن تيگىزەدى دەپ سەنەمىز, – دەدى ماۋلەن اشىمباەۆ.
ۆەنەرا تۇگەلباي,
«ەگەمەن قازاقستان»
