ءىس-شاراعا سىرتقى ىستەر مينيسترلىگى, ۇلتتىق قاۋىپسىزدىك كوميتەتى جانە ىشكى ىستەر مينيسترلىگى وكىلدەرىنەن قۇرالعان ەلىمىزدىڭ دەلەگاتسياسىن سىرتقى ىستەر ءمينيسترىنىڭ ورىنباسارى رومان ۆاسيلەنكو باستاپ باردى. سونداي-اق بۇل جيىنعا تۇرىكمەنستان, قىرعىزستان, تاجىكستان, وزبەكستان جانە اۋعانستاننان كەلگەن سىرتقى ىستەر مينيسترلەرىنىڭ ورىنباسارلارى مەن ساراپشىلارى قاتىستى.
ال ەۋروپالىق تاراپتان ەۋروپالىق سىرتقى ءىس-قيمىلدار قىزمەتىنىڭ باس حاتشىسىنىڭ ورىنباسارى جان-كريستوف بەيار, ەۋروپالىق وداقتىڭ ورتالىق ازيا بويىنشا ارنايى وكىلى پيتەر بۋريان بولدى.
ديالوگ اياسىندا ەۋروپالىق وداقتىڭ ورتالىق ازيا بويىنشا جاڭا ستراتەگياسىن جانە ازيا ەلدەرىمەن ەكونوميكالىق جۇپتاسۋى جونىندەگى جاڭا ستراتەگياسىن ازىرلەۋ, قورشاعان ورتانى قورعاۋ, سۋ رەسۋرستارىن ۇنەمدى پايدالانۋ, سونداي-اق اۋعانستاننىڭ الەۋمەتتىك-ەكونوميكالىق الەۋەتىن قايتا قالپىنا كەلتىرۋ بويىنشا بىرلەسكەن تاسىلدەر ىزدەۋ سەكىلدى وڭىرارالىق ىنتىماقتاستىق ماسەلەلەرى قارالدى.
ر. ۆاسيلەنكو كەزدەسۋ كەزىندە سويلەگەن سوزىندە ءبىلىم بەرۋ, تەرروريزم مەن راديكاليزمگە قارسى كۇرەس, شەكارانى نىعايتۋ, ەسىرتكىنىڭ زاڭسىز اينالىمىنا قارسى تۇرۋ, سونداي-اق اۋعانستانداعى جاعدايدى تۇراقتاندىرۋ سالالارىنداعى ءتۇرلى باعدارلامالاردى ىسكە اسىرۋ ارقىلى ايماقتىڭ جان-جاقتى دامۋىنا باعىتتالعان ورتالىق ازيا مەن ەۋروپالىق وداق اراسىنداعى قالىپتاسقان سىندارلى وڭىرارالىق ىنتىماقتاستىقتىڭ جوعارى دەڭگەيىن اتاپ ءوتتى.
ر.ۆاسيلەنكو ءوز سوزىندە «قازاقستان كەلەشەك ستراتەگيانىڭ ايماق ەلدەرىنىڭ ەۋروپالىق وداقپەن ستراتەگيالىق ارەكەتتەستىگىنىڭ جاڭا باستاۋىنا اينالاتىنىنا سەنىمدى», دەپ مالىمدەدى. وسى ورايدا ەۋروپالىق وداقپەن بولاشاق ىنتىماقتاستىق باعدارلامالارىن ءتيىمدى جۇزەگە اسىرۋعا باعىتتالعان قازاقستاندىق بىرقاتار باستامالار اتاپ ءوتىلدى. سونىڭ ىشىندە بيزنەس جانە الەۋمەتتىك جوبالاردى ىلگەرىلەتۋگە ارنالعان ىنتىماقتاستىقتىڭ ءتۇرلى پلاتفورمالارىن «ۆيرتۋالدىق ينستيتۋتتاندىرۋعا» مۇمكىندىك بەرەتىن بىرىڭعاي كوپفۋنكتسيونالدى ونلاين پورتالىن ىسكە قوسۋ ۇسىنىلدى.
باسقوسۋ اياسىندا بىرقاتار دەلەگاتسيالار استانادا 15 ناۋرىزدا وتكەن ورتالىق ازيا مەملەكەتتەرى باسشىلارىنىڭ كونسۋلتاتيۆتىك ءبىرىنشى جۇمىس كەزدەسۋىن ەرەكشە اتاپ ءوتتى. قاتىسۋشىلار وزبەكستان پرەزيدەنتى شاۆكات ميرزيوەۆ ۇسىنعان جانە قازاقستان پرەزيدەنتى نۇرسۇلتان نازارباەۆتىڭ باستاماسىمەن ۇيىمداستىرىلعان استانادا وتكەن كەزدەسۋ وڭىرلىك ىنتىماقتاستىق ۇدەرىسىنىڭ دامۋىنا ماڭىزدى ىقپال جاسادى دەگەن ورتاق پىكىرگە كەلدى.
سەرىك ابدىبەك,
«ەگەمەن قازاقستان»
