قارتتارعا قامقورلىق دەپ وسىنى ايت

شەمونايحا اۋدانىن كەسىپ وتەتىن ۋبا وزەنىنىڭ جاعاسىندا ۆىدەريحا دەگەن اۋىل بار. بۇل اۋىلدىڭ اتى زامانىندا سۋ تىشقانى تەكتەس ۆىدەرا دەگەن اڭنىڭ قۇرمەتىنە قويىلعان كورىنەدى. تەرىسى باعالى بۇل اڭ بۇگىندە, وكىنىشكە قاراي, قۇرىپ بىتۋگە جاقىنداپ قالىپتى. مىنە, وسى اۋىل ىشىندە بۇدان 35 جىلدان استام ۋاقىت بۇرىن وبلىس كولحوزدارىنىڭ كووپەراتسيالىق قارجىسى ەسەبىنەن «ۋبا» دەپ اتالاتىن ساناتوري سالىنعان ەكەن. سودان بۇل ەمدەۋ ورنى شيرەك عاسىر بويى دۇركىرەپ جۇمىس ىستەپ تۇرعان. الايدا, كەزىندە مىزعىماستاي كورىنگەن سول الىپ يمپەريا ىدىراپ تىنىپ, بالاپان باسىنا, تۇرىمتاي تۇسىنا دەيتىن قىسىلشاڭ كەزدە الگى ءساناتوريىمىز جابىلىپ قالعان. ايتەۋىر, دەس بەرگەندە وسىدان ون جىل بۇرىن ەلباسىمىزدىڭ سوعىس جانە تىل ارداگەرلەرىنە, جالپى مۇگەدەك جاندارعا, زەينەتكەرلەرگە قامقورلىقتى كۇشەيتۋ جونىندەگى جارلىعىنا وراي ارنايى باعدارلاما جاسالادى. سوعان وراي «ۋبا» ءساناتوريى 2003 جىلدان باستاپ جوعارىدا اتالعان جاندارعا ارنال­عان مەملەكەتتىك مەكەمە بولىپ قايتادان اشىلىپتى. قازىردە مۇندا ءبىر ماۋسىمدا ءجۇز كىسى ەمدەلىپ, تىنىعاتىن بولسا, جىل ىشىندەگى ەمدەلۋشىلەردىڭ جالپى سانى ەكى مىڭعا جۋىق كورىنەدى. بۇل ساناتوريدە قايتادان اشىلعاننان بەرگى جەردە 13 مىڭعا جۋىق ادام ءوز دەنساۋلىعىن تۇزەپ ەمدەلگەنىن ەستىپ بىلدىك. مىنە, تىنىعۋشىلارعا جەتپىستەن استام ادام ءمىنسىز قىزمەت كورسە­تە­تىن ءساناتوريدىڭ ديرەكتورى مۇراتبەك ايىلباەۆپەن اڭگىمەلەسىپ وتىرمىز. مۇراتبەك دانەل ۇلى كەزىندە اۋعان سوعىسى­نا قاتىسىپ, ۇلكەن ءومىر جولىنان وتكەن ازامات ەكەن. – قازىر ەلىمىزدەگى سانا­توري­لەردىڭ ءبارى اقىلى بولسا, بىزدە ءبارى تەگىن دەدى ول. بۇل مەملەكەت تاراپىنان قارتتارعا جاسالىپ وتىرعان ۇلكەن قامقور­لىق. بۇ­يىرسا, سول قامقورلىق الدا دا ءوز جالعاسىن تابايىن دەپ وتىر. ياعني, بيىلعى جىلى قوسىمشا تاعى دا ءجۇز ورىندىق ءتورت قاباتتى عيمارات قۇرىلىسىنا كىرىسپەكپىز. ونىڭ قۇرىلىسىنا دەپ وبلىس­تىق بيۋدجەتتەن 370 ميلليون تەڭگە قارجى ءبولىنىپ وتىر. بۇل عي­ما­راتتى الداعى ەكى جىل ىشىندە قاتارعا قوسساق دەيمىز. ءسويتىپ, ەكى جىلدان سوڭ ءبىر ماۋسىمدا ەكى ءجۇز ادامعا قىزمەت كورسەتەتىن بولامىز. ءبىز «ۋبا» ءساناتوريىنىڭ تىزگىنىن قولىنا العانىنا ەكىنشى جىلعا ەندى عانا قادام باسقان ىسكەر باسشىنىڭ ماقساتى ايقىن, باعىتى ءتۇزۋ ەكەندىگىنە سۇيسىندىك. داۋلەت سەيسەن ۇلى. شىعىس قازاقستان وبلىسى.