قازاقستان رەسپۋبليكاسى پرەزيدەنتىنىڭ كومەكشىسى - قاۋىپسىزدىك كەڭەسىنىڭ حاتشىسى نۇرلان ەرمەكباەۆتىڭ جانە وزبەكستان رەسپۋبليكاسىنىڭ پرەزيدەنتى جانىنداعى قاۋىپسىزدىك كەڭەسىنىڭ حاتشىسى ۆيكتور ماحمۋدوۆتىڭ توراعالىعىمەن وتكەن كەلىسسوزدەر بارىسىندا وڭىرلىك قاۋىپسىزدىك پەن ەكى جاقتى ىنتىماقتاستىقتىڭ وزەكتى ماسەلەلەرى قاراستىرىلدى.
جيىنعا ورتالىق مەملەكەتتىك ورگاندار باسشىلارى دا قاتىستى. اۋعانستانداعى جاعدايدى ەسكەرە وتىرىپ, ورتالىق ازياداعى قازىرگى احۋال مەن ونىڭ دامۋ پەرسپەكتيۆالارى, سونداي-اق اسكەري-تەحنيكالىق جانە اسكەري سالالارداعى ءوزارا ءىس-قيمىلدى ودان ءارى جانداندىرۋ جانە كەڭەيتۋ ماسەلەلەرى تالقىلاندى.
زاڭسىز كوشى-قونعا قارسى ءىس-قيمىل, كەدەندىك باقىلاۋ, ازاماتتىق اۆياتسياداعى قاۋىپسىزدىكتى جەتىلدىرۋ اياسىنداعى ىنتىماقتاستىق ماسەلەلەرى دە كۇن تارتىبىنە شىعارىلدى.
كەزدەسۋ بارىسىندا تاراپتار وتكىزۋ بەكەتتەرىن, اۆتوموبيل جولدارىن قايتا قالپىنا كەلتىرۋ جانە جاڭعىرتۋ, سونداي-اق قازاقستان-وزبەكستان مەملەكەتتىك شەكاراسىنداعى ىرگەلەس اۋماقتى رەتتەۋگە باعىتتالعان جول كارتاسىنداعى تارماقتاردىڭ ورىندالۋىنىڭ الدىن الا شىعارىلعان قورىتىندىلارىن قاراستىردى.
جۇمىس قورىتىندىسى بويىنشا ەكى ەلدىڭ ءتيىستى مەملەكەتتىك ورگاندارىنا ناقتى تاپسىرمالار بەرىلدى. قاۋىپسىزدىك كەڭەستەرىنىڭ اپپاراتتارى اراسىنداعى كونسۋلتاتسيالار قازاقستان مەن وزبەكستان باسشىلارىنىڭ تاپسىرمالارىنا سايكەس تۇراقتى تۇردە وتكىزىلەدى.
