2018 جىلى ۇبت بويىنشا ءبىر تۇلەك قانا ەڭ جوعارى بالل العان. دەگەنمەن, 130-139 ۇپاي جيناعان 1 405 تۇلەك بار, بۇل وتكەن جىلمەن سالىستىرعاندا ەكى ەسە ارتىق.
"ۇبت تاپسىرۋعا 102,447 ءوتىنىش جازىلدى, ونىڭ 77 224 (75 پايىزى) قازاق تىلىندە, 25 مىڭ ءوتىنىش ورىس جانە 46 ءوتىنىم اعىلشىن تىلىندە كەلىپ ءتۇستى, ازىرگە اعىلشىن تىلىندە 28 وقۋشى ۇبت تاپسىردى, ورتاشا بالل 85, ال قازاقستان بويىنشا 83 بالل. ءبىزدىڭ ويىمىزشا, بۇل اعىلشىن تىلىندەگى تەست سۇراقتارى ساپالى جانە مازمۇندى ەكەنىن دالەلدەيدى. بيىلعى جىلى ۇبت-عا 986998 ادام قاتىستى", - دەپ حابارلادى ءبىلىم جانە عىلىم مينيسترلىگىنىڭ ۇلتتىق تەستىلەۋ ورتالىعىنىڭ ديرەكتورى رامازان الىمقۇل وكق-داعى بريفينگتە.
ونىڭ ايتۋىنشا, اعىمداعى جىلى توعىز وقۋشىنىڭ قورىتىندىلارى قابىلدانبادى.
"بارلىعى 84 065 ءبىتىرۋشىنى قويىلعان مەجەدەن ءوتتى, بۇل كورسەتكىشتىڭ 85 پايىزى, وكىنىشكە قاراي 14 633 تالاپكەر ۇبت تابالدىرىعىن ەڭسەرە المادى, بۇل كورسەتكىشتىڭ 14 پايىزى. وتكەن جىلى بۇل كورسەتكىش 15 پايىز بولعان", - دەدى ول.
رامازان الىمقۇلوۆتىڭ ايتۋىنشا قاناعاتتانارلىق ناتيجە كورسەتە الماعان تۇلەكتەردىڭ تامىزدا ۇبت-نى قايتا تاپسىرۋعا مۇمكىندىگى بار.
"وتكەن جىلدان باستاپ تامىز ايىندا ۇبت-نى قايتا تاپسىرۋعا مۇمكىندىك بار. تامىزدا دا قويىلعان مەجەدەن اسا الماسا, تۇلەك شارتتى تۇردە قازاقستانداعى جوعارى وقۋ ورنىنا تۇسە الادى, سودان كەيىن ءبىرىنشى سەمەستردىڭ سوڭىندا ۇبت-نى ءۇشىنشى رەت قاڭتار ايىندا تاپسىرۋعا بولادى. بۇل جاعدايدا تۇلەك ءبىلىم بەرۋ گرانتىنا ۇمىتكەر بولا المايدى", - دەدى ول.
