دومبىرا – قازاقتىڭ جانى, مۇڭشىسى, سىرلاسى, قيماسى. اينىمايتىن سەرىگى, جاڭىلمايتىن ءسوزى, قاراڭعىنى جارىپ شىققان ساۋلەلى ويى. قازاق پەن دومبىرا – ەگىز. دومبىراسىز قازاقتى ەلەستەتۋ قيىن. وندا قازاق جەتىم بولار ەدى. حالىقتىڭ ارمان-مۇراتى, بولمىس-ءبىتىمى, تاعدىر-تالايى دومبىرادا كۇمبىرلەپ تۇر. وعان قوبىزدى قوسساق بولادى. قايسى بۇرىن تۋعانىن تاپ باسۋ ايتۋ قيىن. قازاقپەن ماڭگى بىرگە جاساسىپ كەلە جاتقان اسىلدارىمىز. كەشەگى كەڭەس زامانى دەيتىن كەزەڭدى باستان كەشكەن ۋاقىتتا «دومبىرا – ەسكىلىكتىڭ قالدىعى» دەيتىن ءسوزدى دە ەستىدىك. وعان بىرەۋ سەنەر, بىرەۋ سەنبەس.
بۇرىنعى اقىندارىمىز دومبىراسىز ولەڭ ايتپاعان, دومبىراسىز ەل ارالاماعان. كەنەن: «دومبىرانى تاستامايمىن قايدا بارسام, جانىما جۇرە المايمىن بايلاماسام» دەيتىن. قازاقتىڭ ساناسىن سەرگىتىپ, شارشاعانىن باساتىن بولىنبەس ءبۇتىنىمىزدىڭ ۇلتتىق مەرەكە كۇنىنە ارقاۋ بولعانى ەل بولىپ قۋانارلىق جاعداي. كوكتەگى اسقاقتاعان رۋحىمىز, جەردەگى تىرەگىمىز. «ناعىز قازاق – دومبىرا» دەگەن قادىردىڭ ءسوزى, راس. دومبىرا – ءبىزدىڭ جۇرەگىمىز.
ەلباسىنىڭ «بولاشاققا باعدار: رۋحاني جاڭعىرۋ» ماقالاسى جاريالانعاننان بەرى قازاقتىڭ كوكتەن ىزدەگەنى جەردەن تابىلىپ, ارمانىنا قول جەتىپ, شىن مانىندە رۋحاني جاڭعىرىپ جاتىر. ەلباسىنا راحمەت! ءتاڭىر جارىلقاسىن!
سونشاما عاسىر قازاققا قىزمەت ەتكەن, ومىرلىك فيلوسوفياسى بولعان دومبىرا قانشا رەت شەتتەتىلىپ جەر باۋىرلاپ قالدى. مەن بۇل تۋرالى ءبىرتالاي جىلدان بەرى ايتىپ تا, جازىپ تا ءجۇرمىن. بىلتىر سەكسەنگە تولعانىمدا ءبىر كەش قوبىزعا, ءبىر كەش دومبىراعا ارناپ وتكىزدىم. سەبەبى قازاق جانىنىڭ ايناسى – وسى ەكى قاستەرلى اسپاپ.
قانشاما عاسىر قازاققا قىزمەت ەتكەن, استاناسى بولعان تۇركىستاننىڭ ءبىر اۋداننىڭ ورتالىعى سياقتى بولىپ تۇرعانى كەز كەلگەن تۇركىمىن دەيتىن ازاماتتىڭ قابىرعاسىنا باتاتىن-اق دۇنيە بولاتىن. ەندى تۇركىستان ءبىر وبلىستىڭ ورتالىعى بولدى. ۇلتتىق دومبىرا كۇنى جاريالاندى. ەلباسىنىڭ وسى ەكى شەشىمىنە شىن جۇرەكتەن ريزامىن. ۇلتقا كەرەك دۇنيە وسى. قازىر ءبىز بۇرىنعى دومبىرا تارتۋ داستۇرىنەن اجىراپ قالدىق. بۇرىن كۇيدى اڭىزىمەن ايتىپ تارتاتىن. قازىر ساحناعا شىعىپ, سابالاي جونەلەدى. ساكەن سەيفۋلليننىڭ ۇيىنە سىيلاس كۇيشى زامانداسى كەلىپ, كۇيدى بابىمەن, اڭىزىمەن ايتىپ تارتقاندا, اقىن: «ق ۇلىندى بيە جەتەكتەتكەندەي بولدىڭ عوي» دەپتى. قازىر وسىنداي ساتتەر سيرەك. كۇيدىڭ تەرەڭىنە بويلاپ تارتۋ كۇيشىگە ەڭ كەرەك قاسيەت.
ءبىز كۇيشىلەردى دە زەرتتەۋدى سيرەتتىك. مەنىڭ تۇسىنىگىمدە, قازانعاپقا تەڭەسەتىن كۇيشى جوق. قازاقتىڭ ايتا الماعان, ايتامىن-اۋ دەپ كەتكەن سوزدەرىن قازانعاپ كۇيمەن جەتكىزگەن. ءبىز وعان ءالى بويلاي قويعان جوقپىز. كۇيدىڭ, دومبىرانىڭ توڭىرەگىندە ايىلاتىن اڭگىمە ءالى كوپ.
كۇي حالىقتىڭ – كوڭىل تولقىنى. ءاربىر جەكە تۇلعانىڭ, ازاماتتىڭ اڭسارى, ماحابباتى, شەرى مەن شەمەنى. ءبىر حالىقتىڭ تاۋ قوپارار الاپات كۇشى مەن ايبارى! ىقىلىم زاماننىڭ قامىرىقتى سازى, وسى زاماننىڭ قۋانىشتى ءسوزى. بۇل اسىل ونەر بۇگىن عانا تورگە وزعان جوق. بۇرىننان تورىمىزدە ەدى. ەندى توبەمىزگە كوتەرىپ وتىرمىز. توبەمىزگە قۇت, تورىمىزگە ىرىس بولعاي!
اتاسىنىڭ مۇراسىن تاستاماي جۇرگەن جاستار امان بولسىن. ۇرپاقتىڭ يگىلىگى ءۇشىن باستاۋ العان يگى ءىس باياندى بولسىن!
مىرزاتاي جولداسبەكوۆ,
مەملەكەت جانە قوعام قايراتكەرى
