1929 جىلى سولتۇستىك قازاقستان وبلىسىنىڭ ەسىل اۋدانىندا تۋعان ماقتاي ساعديەۆ جاستايىنان قارا جۇمىسقا ارالاسىپ, كەيىننەن كوپتەگەن باسشىلىق قىزمەتتە بولدى. اتاپ ايتساق, سوكولوۆ جانە جامبىل اۋداندىق پارتيا كوميتەتتەرىنىڭ ءبىرىنشى حاتشىسى, تورعاي وبلىسى اتقارۋ كوميتەتى توراعاسىنىڭ ءبىرىنشى ورىنباسارى, قازاق كسر بالىق شارۋاشىلىق ءمينيسترى, قوستاناي وبلىسى اتقارۋ كوميتەتىنىڭ توراعاسى, كوكشەتاۋ وبلىسى پارتيا كوميتەتىنىڭ ءبىرىنشى حاتشىسى, قازاق كسر-ءى جوعارعى كەڭەسى تورالقاسىنىڭ توراعاسى, قازاق كسر-ءى پرەزيدەنتتىك كەڭەسىنىڭ مۇشەسى جانە قازاق كسر-ءى پرەزيدەنتى جانىنداعى ازاماتتىق جونىندەگى كوميسسيانىڭ توراعاسى قىزمەتتەرىن اتقاردى. 1991 جىلدان قازاقستان رەسپۋبليكاسى ارداگەرلەر ۇيىمى ورتالىق كەڭەسىن باسقاردى. ال 1999-2004 جىلدار ارالىعىندا پارلامەنت ءماجىلىسىنىڭ دەپۋتاتى بولدى.
بەلگىلى مەملەكەت جانە قوعام قايراتكەرى تۇرعان ۇيدە ورناتىلعان مەموريالدىق تاقتانىڭ سالتاناتتى اشىلۋ راسىمىندە پارلامەنت ءماجىلىسى توراعاسىنىڭ ورىنباسارى ۆلاديمير بوجكو مەن الماتى قالاسى اكىمىنىڭ ورىنباسارى ارمان قىرىقباەۆ قاتىستى. ءار جىلدارى بىرگە قويان-قولتىق ەڭبەك ەتكەن مارات نۋريەۆ, سۇلتان جيەنباەۆ, شاڭگەرەي جانىبەكوۆ, ۆەرا سيدوروۆا جانە ەۆگەني ەجيكوۆ-باباحانوۆ سىندى ارىپتەستەرى, ۇزەڭگىلەس دوستارى مەن شاكىرتتەرى ماقتاي ساعديەۆتىڭ ەڭبەك جولى, ازاماتتىق بولمىسى, بىلىكتىلىگى مەن ىسكەرلىگى, وي-ورەسى مەن پاراساتى جايىندا كەڭىنەن بايانداي كەلە, باسقا دا قىزىقتى وقيعالار مەن جايتتار تۋرالى تارتىمدى اڭگىمەلەردىڭ تيەگىن اعىتتى. سونداي-اق وسى راسىمدە ءسوز العان ماقتاي رامازان ۇلىنىڭ قىزى عاليا دا اكەسى جايىندا ەستەلىك ايتتى.
عالىم سۇلەيمەن,
«ەگەمەن قازاقستان»
الماتى
