جينالىس بارىسىندا وبلىس اكىمى ساعىندىق لۇقپانوۆقا اتقارعان جۇمىسى ءۇشىن ريزاشىلىق ءبىلدىرىپ, الداعى قىزمەتىنە تابىس تىلەدى. ايماق باسشىسى كانديداتۋراسى قر پرەزيدەنت اكىمشىلىگىمەن كەلىسىلگەن سەرىك شاپكەنوۆتىڭ ۇزاق جىلعى ەڭبەك ءوتىلى بارىن اتاپ ءوتتى.
سەرىك شاپكەنوۆ ەكونوميست-ماتەماتيك ماماندىعى بويىنشا جوعارى ءبىلىمدى. ەڭبەك جولىن 2000 جىلى م.وتەمىسوۆ اتىنداعى بقمۋ وقىتۋشىلىقتان باستاعان. 2001 جىلى مەملەكەتتىك قىزمەتكە اۋىسىپ, قورشاعان ورتانى قورعاۋ قورىنىڭ جەتەكشى مامانى بولدى. 2002 -2012 جىلدارى مەملەكەتتىك قىزمەتتە قارجى باسقارماسىنىڭ جەتەكشى مامانىنان باستاپ باتىس قازاقستان وبلىستىق ەكونوميكا جانە بيۋدجەتتى جوسپارلاۋ ءبولىمىنىڭ باسشىسىنا دەيىنگى لاۋازىمداردى اتقاردى. 2012 جىلدىڭ قاڭتارىندا باتىس قازاقستان وبلىسى اكىمىنىڭ ورىنباسارى, تامىز ايىندا ءبىرىنشى ورىنباسارى بولدى. 2015 جىلدىڭ قاڭتارىنان 2016 جىلدىڭ شىلدەسىنە دەيىن قر پرەزيدەنت اكىمشىلىگىندە مەملەكەتتىك ينسپەكتور لاۋازىمىن اتقاردى. 2016 جىلدىڭ شىلدەسىنەن بۇگىنگە دەيىن اتىراۋ قالاسىنىڭ اكىمى بولدى.
