اتاۋلى مەرەكەدە تاتار حالقىنىڭ ءان-جىرلارى شىرقالىپ, ۇلتتىق ويىندارىنان سايىس ءوتتى. تاتارستاننىڭ ەڭبەك سىڭىرگەن مادەنيەت قىزمەتكەرى, داڭقتى سپورتشى روم يلماتوۆتىڭ ايتۋىنشا, «تاتارچا كۋراس» وينىنا قاتىسۋشىلاردىڭ سانىندا شەك بولمادى.
بەسقاراعاي اۋدانىنان ارنايى كەلگەن باشكولدىك تاتار اعايىندار ۇلتتىق تاعامدارىنان ءدام ۇسىندى. بارلىعى جينالىپ, تاتار حالقىنىڭ تالانتتى ۇلى عابدوللا توقاي ەسكەرتكىشىنىڭ باسىنا گۇل شوقتارىن قويدى. ەلدى بەرەكەلى تىرلىككە باستايتىن شارا تاتار حالقىنىڭ ءداستۇرى بويىنشا يمامنىڭ تىلەك ايتۋىمەن باستالدى.
شاراعا سەمەي قالاسىنىڭ اكىمى ەرماك ءسالىموۆ, وبلىستىق ىشكى ساياسات باسقارماسىنىڭ باسشىسى نەللي كراسنوباەۆا, بەسقاراعاي اۋدانىنىڭ اكىمى داۋلەت باتىرباەۆ قاتىستى.
– قۇرمەتتى سەمەيلىكتەر جانە قالا قوناقتارى! ىنتىماق-بىرلىگى جاراسقان, اباي, مۇحتار, شاكارىمدەر تۋعان قاستەرلى ولكەدە ءبىز باۋىرلاس تاتار حالقىنىڭ «سابانتوي» مەرەكەسىن بەسقاراعايلىق باۋىرلارىمىزبەن بىرگە تويلاۋدامىز, – دەدى سەمەي قالاسىنىڭ اكىمى ەرماك ءسالىموۆ. – بەيبىتشىلىككە, بەرەكە-بىرلىككە شاقىراتىن بۇل مەرەكە بىزدەر ءۇشىن اسا قىمبات. سوندىقتان بارشاڭىزعا مىقتى دەنساۋلىق, وتباسىلارىڭىزعا اماندىق تىلەيمىن, مەرەكە قۇتتى بولسىن!
وبلىستىق ىشكى ساياسات باسقارماسىنىڭ باسشىسى نەللي كراسنوباەۆا وبلىس اكىمى دانيال احمەتوۆتىڭ اتىنان جينالعان قاۋىمدى قۇتتىقتاپ, ارنايى ماراپاتتارىن تابىس ەتتى. بەسقاراعاي اۋدانىندا دوستىق ءۇيىنىڭ جۇمىسىن جانداندىرعانى ءۇشىن اۋدان اكىمى داۋلەت باتىرباەۆ العىس حاتپەن ماراپاتتالدى.
ەڭبەك ارداگەرى راشيدا حاسانوۆانىڭ ايتۋىنشا, «سابانتوي» – تاتار تىلىندە «جەر وڭدەۋ تويى» دەگەن ماعىنانى بىلدىرەدى ەكەن. ياعني سابانتوي تاتار حالقىنىڭ جەردى وڭدەپ, ەگىن سالاتىن كوكتەم كەزەڭىنىڭ مەرەكەسى. ونىڭ وزەگىنە ەگىن بىتىك شىقسىن, جيىن-تەرىم مول بولسىن, ەل توق بولسىن دەگەن ارمان-تىلەكتەر جيناقتالعان. مەرەكەدە تاتار حالقىنىڭ ۇلتتىق ويىندارى – تاتار كۇرەسى, ارقان تارتۋ جانە تاعى دا باسقا كوپتەگەن سپورتتىق ويىندار وينالدى. سابانتويعا كەلگەندەر تاتار ەلىنىڭ ۇلتتىق تاعامدارىنان ءدام تاتىپ, كونتسەرتتىك باعدارلامانى تاماشالادى.
راۋشان نۇعمانبەك,
جۋرناليست
سەمەي
