بەينەكونفەرەنتسيا فورماتىندا وتكەن كەڭەسكە اۋىل شارۋاشىلىعى مينيسترلىگىنىڭ, ءبىلىم جانە عىلىم, ينۆەستيتسيالار جانە دامۋ, قارجى, ۇلتتىق ەكونوميكا, ەنەرگەتيكا مينيسترلىكتەرىنىڭ, ۇلتتىق بانكتىڭ, سونداي-اق وبلىس اكىمدىكتەرىنىڭ جانە وڭىرلەردەگى تەكسەرۋ كوميسسيالارىنىڭ وكىلدەرى قاتىستى. جيىن بارىسىندا مەملەكەت باسشىسىنىڭ الەۋمەتتىك باستامالارىن ىسكە اسىرۋعا بولىنگەن قاراجاتتى ءتيىمدى پايدالانۋ, ءتيىستى جوبالاردى قارجىلاندىرۋ, جوسپارلانعان ءىس-شارالاردىڭ ورىندالۋىنا مونيتورينگ جۇرگىزۋ ماسەلەلەرى, سونداي-اق نورماتيۆتىك جانە ۇيىمداستىرۋشىلىق سيپاتتاعى پروبلەمالار تالقىلاندى.
جاۋاپتى مەملەكەتتىك ورگانداردىڭ وكىلدەرى حالىقتىڭ تۇرعىن ءۇي ساتىپ الۋى ءۇشىن جاڭا مۇمكىندىكتەردى قامتاماسىز ەتۋ, ەڭبەكاقىسى تومەن ازاماتتار ءۇشىن سالىقتىق جۇكتەمەنى تومەندەتۋ, جوعارى ءبىلىمنىڭ قولجەتىمدىلىگىن, ساپاسىن ارتتىرۋ جانە ستۋدەنتتەردىڭ ءومىر ءسۇرۋ جاعدايلارىن جاقسارتۋ, ميكروكرەديت بەرۋدى كەڭەيتۋ, ەلدى ودان ءارى گازداندىرۋ ماقساتىندا قابىلدانىپ جاتقان شارالار تۋرالى باياندادى. پرەزيدەنت تاپسىرمالارىنىڭ جۇزەگە اسىرىلۋى ەسەپ كوميتەتىنىڭ جانە تەكسەرۋ كوميسسيالارىنىڭ مەملەكەتتىك اۋديتىمەن سۇيەمەلدەنەتىنى اتاپ ءوتىلدى.
كەڭەس قورىتىندىسى بويىنشا مەملەكەت باسشىسى قويعان مىندەتتەردى بۇلجىتپاي جانە ۋاقتىلى ورىنداۋ ماقساتىندا, ورىنداۋشىلاردىڭ بيۋدجەت قاراجاتىن يگەرۋ كولەمىن كورسەتە وتىرىپ, ەسەپ كوميتەتىنە توقسان سايىن اقپارات ۇسىناتىنى تۋرالى شەشىم قابىلداندى.
وسى جيىندا ايتىلعانداي, ەسەپ كوميتەتى مەن تەكسەرۋ كوميسسيالارى اۋديت وبەكتىلەرىنىڭ الداعى كەزەڭگە ارنالعان تىزبەسىن قالىپتاستىرعان كەزدە ورىندالۋى مىندەتتى تۇردە باقىلاۋ جۇرگىزۋدى تالاپ ەتەتىن اۋقىمدى الەۋمەتتىك جوبالارعا باسا نازار اۋدارماق.
ارنۇر اسقار,
«ەگەمەن قازاقستان»
