جالپى بولاشاقتا استانا اۋدانى دەپ اتاۋعا لايىق ۋسولكا شاعىن اۋدانى وبلىس ورتالىعىنىڭ وڭتۇستىك بولىگىندە, ەرتىس وزەنىنىڭ جاعالاۋىنا قونىس تەپكەن. اۋداندا 80-ءشى جىلداردان باستاپ تۇرعىن ۇيلەر قۇرىلىسى بوي كوتەرىپ, دۇكەندەر, مەكتەپتەر سالىنا باستادى. شەتكەرى اۋدان بولعاندىقتان قالاارالىق ترامۆاي جولىنا قوسىلعان, شاھارداعى باعىتتاعى شاعىن اۆتوبۋستار دا تىنىمسىز.
قازىر بۇل شاعىن اۋدانعا ءتىپتى جاقسى كوڭىل بولىنۋدە. ەلىمىزدە قابىلدانعان مەملەكەتتىك تۇرعىن ءۇي باعدارلاماسىنا وراي جيىرماعا جۋىق تۇرعىن ءۇي سالىندى. قۇرىلىس ءالى دە جالعاسۋدا. اۋداندا جارقىرعان جاڭا مەكتەپ, بالاباقشا, ەمحانا پايدالانۋعا بەرىلدى. كارديوحيرۋرگيالىق ورتالىق, نازارباەۆ زياتكەرلىك مەكتەبى, بىرنەشە سپورتتىق ورتالىقتار, باسسەين, مادەني ورىندار, ساۋدا دۇكەندەرى, اۋلا كلۋبتارى جۇمىس ىستەۋدە. وبلىس ورتالىعىنىڭ جاڭا كەلبەتىندەي جارقىراپ وركەندەپ, ءوسىپ كەلەدى.
ال ەندى كەلەسى جىلدىڭ سوڭىنا قاراي پايدالانۋعا بەرىلەتىن «اقىلدى ءۇي» شاعىن اۋداننىڭ ءتىپتى ءسانىن دە, ءمانىن دە كەلتىرمەك. جاڭا زاماننىڭ وركەنيەتتى تۇرعىن ءۇيى تۇرعىنداردى تاڭعالدىرماق.
كاسىپورىننىڭ باس ديرەكتورى ولەگ پەرفيلوۆتىڭ ايتۋىنشا, ءبىرىنشى كەزەكتە, «اقىلدى ءۇيدىڭ» ءار پاتەرىنە ىستىق, سۋىق سۋ مەن جىلۋدى ەسەپتەيتىن قۇرىلعىلار ورناتىلادى. جىلۋ باتارەيالارىندا ارنايى رەتتەگىشتەر جانە سۋدى سالقىنداتاتىن كليمات جۇيەسى جاسالۋدا. كۇن ىستىق كەزدە جۇيە بويىنشا وتەتىن سالقىن سۋ بولمەنىڭ اۋاسىن سالقىنداتادى. ياعني, ءۇي ءوزىن-ءوزى سالقىنداتا الادى. قاجەتتى قوندىرعىلار ورناتىلادى.
«اقىلدى ءۇي» – ءومىر سۇرۋگە اسا قولايلى, ۇنەمدى, جايلى, قاۋىپسىز سانالادى. ەلىمىزگە كەلەتىن ينۆەستورلار دا قالانى ەمەس, ءومىر سۇرۋگە, جۇمىس ىستەۋگە قولايلى مەكەندى تاڭدايدى ەكەن. بيىلعى جولداۋدا دا «اقىلدى قالالار» «اقىلدى ۇلت» ءۇشىن, «اقىلدى قالالار» وڭىرلىك دامۋدىڭ, يننوۆاتسيانى تاراتۋدىڭ جانە ەلىمىزدىڭ بارلىق اۋماعىندا تۇرمىس ساپاسىن ارتتىرۋدىڭ لوكوموتيۆتەرىنە اينالادى» دەگەن جولدار بار.
س. تورايعىروۆ اتىنداعى ۋنيۆەرسيتەتى فيزيكا, ماتەماتيكا جانە اقپاراتتىق تەحنولوگيالار فاكۋلتەتىنىڭ ستۋدەنتتەر كومانداسى دا «اقىلدى ءۇي» جوباسىن جاسادى. كوماندا جەتەكشىسى دارحان جاقسىباەۆتىڭ ايتۋىنشا, بولاشاقتا جۇزەگە اسسا, «اقىلدى ءۇي» جوباسىنىڭ كوپتەگەن قىزمەتى بار. ۇيگە كىرۋ ءۇشىن ءۇي يەسىنىڭ ساۋساق تاڭبالارى كەرەك. باسپاناعا كىرەردە قوزعالىس داتچيگى ىسكە قوسىلىپ, جارىق اۆتوماتتى تۇردە جانادى. جارىقتاندىرۋ دەڭگەيىن رەتتەۋ جۇيەسى دە اۆتوماتتى تۇردە قوسىلادى. سونىمەن بىرگە اۋا رايى وزگەرىستەرىن باقىلاۋ, پەردەلەردى اشىپ-جابۋ جۇيەلەرىنىڭ اۆتوماتتى جۇمىسى, تۇنگى ۋاقىتتا باسپالداق ارقىلى قاۋىپسىز قوزعالۋ ءۇشىن ارنايى جارىق قوسىلماقشى.
ستۋدەنتتەر دەمەكشى, بىلتىر «ورتالىق-ازيا وتىن-ەنەرگەتيكالىق كومپانياسى» اق «پاۆلودارەنەرگو» اق ەنشىلەس كومپانياسىنىڭ قولداۋىمەن وبلىس اكىمدىگى اراسىنداعى الەۋمەتتىك جوبالاردى بىرىگىپ اتقارۋ مەموراندۋمىن جۇزەگە اسىرۋ شەڭبەرىندە وبلىس ورتالىعىنداعى پوليتەحنيكالىق مونتاجداۋ كوللەدجىنە 200 ورىندىق جاتاقحانا دا سالىپ بەردى. بولاشاق ەنەرگەتيكتەرگە كاسىپورىنعا جۇمىسقا بارۋ ءۇشىن بۇل ۇلكەن سەنىمدى دەمەۋ.
جالپى, وڭىردە وبلىس ورتالىعىندا, اقسۋ مەن ەكىباستۇزدا «اقىلدى ءۇي» ءموبيلدى قوسىمشاسى تانىستىرىلۋدا. بۇل جوبالار قالا تۇرعىندارى مەن پاتەر يەلەرى كووپەراتيۆتەرىن تۇرعىن ءۇيدىڭ جاعدايى تۋرالى حاباردار ەتۋگە باعىتتالعان. قىزمەت كورسەتەتىن مەكەمەلەر بولسا وزدەرىنە قاراستى ۇيلەردىڭ كارتاسىن كورىپ باقىلاي الادى. جوبانىڭ اۆتورى – «BF Group» جشس ديرەكتورى سەرگەي گولىشەۆ.
وبلىس ورتالىعىنداعى وسىنداي «اقىلدى ۇيلەر» جوباسىنىڭ ءبىرىن جاساۋدى قولعا العان «پاۆلودارەنەرگو» اق كومپانياسى تۇرعىن ءۇيدىڭ قۇرىلىسىنا 1,5 ملرد تەڭگە بولسە, 200 ميلليون تەڭگەسىنە جەر استى پاركينگكە قاجەتتى قۇرىلعىلار العان. پاتەردىڭ ءبىر شارشى مەترى 167 مىڭ تەڭگە شاماسىندا. ال كاسىپورىننىڭ جۇمىسشى, قىزمەتكەرلەرىنە 25 پايىزدىق جەڭىلدىك بەرىلمەك. «اقىلدى ءۇيدىڭ» اۋدانى 52,4 جانە 63,9 شارشى مەتردى قۇرايتىن 96 پاتەردەن تۇرادى.
پاتەر الاتىن كومپانيا جۇمىسشى, قىزمەتكەرىنىڭ جاسى 45-تەن اسپاۋى كەرەك. كاسىپورىندا ون جىل ەڭبەك ەتىپ, وسى ۋاقىت ارالىعىندا پاتەردى ساتپاۋى كەرەك دەگەن شارتتارى دا بار. قازىردىڭ وزىندە «اقىلدى ۇيدەن» پاتەر الۋعا اسىققان 400-دەن استام ءوتىنىش تۇسكەن كورىنەدى.
فاريدا بىقاي,
«ەگەمەن قازاقستان»
پاۆلودار
