جيىنعا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ولجاس بەكتەنوۆ, ارنايى مونيتورينگ توبىنىڭ ءتورايىمى ايگۇل سولوۆەۆا, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قوعاممەن بايلانىس دەپارتامەنتىنىڭ ديرەكتورى ارمان بەردالين, «حالىقتىق سىبايلاس جەمقورلىققا قارسى كوميتەتى» قق پرەزيدەنتى مۇساعالي دۋامبەكوۆ قاتىسىپ, اتقارىلعان جۇمىس جونىندە اقپارات بەردى.
«قازاقستاندا تۇبەگەيلى رەفورمالاردىڭ ارقاسىندا سىبايلاس جەمقورلىققا قارسى زاڭنامانىڭ جاڭا مودەلى قالىپتاسىپ, الەمدىك ستاندارتتارعا سايكەس ينستيتۋتتار مەن مەحانيزمدەر قولدانىسقا ەندى. باستى ماقسات – سىبايلاس جەمقورلىقتىڭ سالدارىمەن كۇرەسۋ ەمەس, ولاردىڭ سەبەپتەرىن انىقتاپ, تۇبەگەيلى جويۋ. سوندىقتان قوعامدى قاتىستىرۋ ارقىلى جەمقورلىققا قارسى مادەنيەتتى قالىپتاستىرۋ قاجەت. ازاماتتاردىڭ قوعامدىق باقىلاۋدى جۇزەگە اسىرۋىنا جانە مەملەكەتتىك ورگانداردىڭ قىزمەتىن باقىلاۋىنا مۇمكىندىك بەرەتىن مەملەكەتتىڭ اشىقتىعى مەن ەسەپ بەرۋشىلىگىن قامتاماسىز ەتۋ قاجەت», دەدى ولجاس بەكتەنوۆ.
سونىمەن قاتار ارمان بەردالين اگەنتتىكتىڭ جانىنان قۇرىلعان مونيتورينگتىك توپتىڭ ماڭىزدىلىعىنا توقتالدى.
«بۇل, ەڭ الدىمەن, جاسالىپ جاتقان مەملەكەتتىك قىزمەتتىڭ كەمشىلىگىن انىقتاۋعا, جەمقورلىقتى قايتىپ جەڭەمىز دەگەن سۇراققا قوعامنىڭ كوزىمەن جاۋاپ ىزدەۋگە مۇمكىندىك بەرەدى. وسى ورايدا ءبىز قازاقستاننىڭ بارلىق وبلىستارىن ارالاپ شىققان بولاتىنبىز. ايتا كەتۋ كەرەك, تەك قانا وبلىس ورتالىقتارىن عانا ەمەس, سونىمەن بىرگە, شالعاي جاتقان اۋىل-اۋداندارعا دا سوقتىق. ول جەردەگى حالىقتىڭ وي-پىكىرىن تىڭداپ, حال-احۋالىن كورىپ, كورسەتىلىپ جاتقان مەملەكەتتىك قىزمەت دەر كەزىندە جانە ۋاقتىندا ساپالى جەتىپ جاتىر ما دەگەن سۇراقتار توڭىرەگىندە ساراپتاما جۇرگىزدىك. قازىرگى ۋاقىتتا مەملەكەتتىك قىزمەتتىڭ 746 ءتۇرى كورسەتىلەدى. سولاردىڭ 70 پايىزدان استامى ەلەكتروندى تۇردە قولجەتىمدى بولىپ وتىر. ءبىز ءوزىمىزدىڭ ساپارىمىز بارىسىندا كەيبىر ەلدى مەكەندەردە ينتەرنەت جەلىسى قوسىلماعانىن كوردىك. بۇرىندارى ءبىر جاپىراق قاعاز الۋ ءۇشىن اۋدان, ودان قالدى وبلىسقا بارۋعا تۋرا كەلەتىن. قازىرگى تاڭدا بۇل جۇمىستى ۇيدەن شىقپاي-اق ورىنداۋعا مۇمكىندىك تۋدى. دەگەنمەن, حالىق سونى تولىقتاي يگەردى مە, جوق پا, وسىنى انىقتاۋ ءبىزدىڭ باستى مىندەتىمىز», دەدى ول.
راۋان قايدار,
«ەگەمەن قازاقستان»
