«قازاقستان تاۋەلسىزدىك العان العاشقى جىلداردان باستاپ شەتەلدىك ينۆەستورلار ءۇشىن قولايلى جاعداي جاساۋ ناتيجەسىندە ەكونوميكالىق وسىمگە قول جەتكىزدى. جاپونيا – قازاقستاننىڭ ءىرى ينۆەستورلارىنىڭ ءبىرى. 2005-2017 جىلدار ارالىعىندا جاپونيادان قازاقستانعا قۇيىلعان تىكەلەي ينۆەستيتسيانىڭ كولەمى 5 ملرد اقش دوللارىنان استى», دەدى ا.قابىكەنوۆ.
ال 2017 جىلدىڭ ناتيجەسى بويىنشا قازاقستاننان جاپونياعا 886 ملن اقش دوللارىنىڭ تاۋارى ەكسپورتتالىپتى. 2018 جىلدىڭ 1 مامىرىنداعى جاعداي بويىنشا قازاقستاندا جاپون تاراپىنىڭ قاتىسۋىمەن 77 زاڭدى تۇلعا, فيليالدار مەن وكىلدىكتەر تىركەلگەن.
جاپونيانىڭ ەكونوميكا, ساۋدا جانە ونەركاسىپ مينيسترلىگىنىڭ حالىقارالىق ىستەر جونىندەگى ۆيتسە-ءمينيسترى تاداو ياناسە جاپوندىق كومپانيالاردىڭ قازاقستانعا ينۆەستيتسيا سالۋعا قىزىعۋشىلىق تانىتىپ وتىرعانىن اتاپ ءوتتى. وسى ماسەلە بويىنشا ءسوز العان قازاقستان-جاپونيا ەكونوميكالىق كوميسسياسى توراعاسىنىڭ ورىنباسارى, «يتوتيۋ» كورپوراتسياسىنىڭ كەڭەسشىسى توسيۋكي كوسۋگي: «قازىر ءبىز ەكى ەل اراسىنداعى دامۋ ستراتەگياسىنىڭ جاڭا باستامالارىن جۇزەگە اسىرۋدى قولعا الىپ وتىرمىز. وتكەن جىلى قازاقستان ۇكىمەتى «تسيفرلى قازاقستان» باعدارلاماسىن قابىلدادى. وسى باعىت بويىنشا ءارى قاراي دا كوپتەگەن ءتيىمدى جۇمىستاردى جۇزەگە اسىرا الار ەدىك», دەدى ءوزىنىڭ سوزىندە.
سونىمەن, قازاقستان-جاپونيا ەكىجاقتى ىنتىماقتاستىق فورۋمى اياسىندا بىرنەشە مەموراندۋمعا قول قويىلدى. سولاردىڭ قاتارىندا جىلۋمەن, سۋمەن جابدىقتاۋ, يادرولىق ەنەرگەتيكا جانە الماتى قالاسىندا قالالىق كولىكتى دامىتۋ بويىنشا ماڭىزدى جوبالار بار. اتاپ ايتقاندا, «Kazakh Invest» باسقارماسىنىڭ توراعاسى ساپاربەك تۇياقباەۆ پەن «مارۋبەني كورپورەيشن» كومپانياسىنىڭ ۆيتسە-توراعاسى يامادزوە سيگەرۋ الماتى قالاسىندا قالالىق كولىكتى دامىتۋ بويىنشا ءوزارا تۇسىنىستىك تۋرالى مەموراندۋمعا قول قويدى.
«كازتسەنتر جكح» اق, «Mitsui & Co LTD» جانە «Japansystem Planing LTD» اراسىندا جىلۋ جانە سۋمەن جابدىقتاۋ جۇيەلەرىندە قاناتقاقتى جوبانى جۇزەگە اسىرۋ بويىنشا ءوزارا تۇسىنىستىك پەن ىنتىماقتاستىق تۋرالى مەموراندۋمعا, «Kazakhstan Nuclear Power Plants» پەن «The Japan Atomic Power Company», «Marubeni Utility Services Ltd» اراسىندا يادرولىق ەنەرگەتيكا سالاسىنداعى ىنتىماقتاستىق تۋرالى مەموراندۋمعا قول قويىلدى.
سۇڭعات ءالىپباي,
«ەگەمەن قازاقستان»
