اتالعان بايقاۋ بيىل توعىزىنشى رەت ۇيىمداستىرىلىپ وتىر. جىل وتكەن سايىن ونىڭ اياسى كەڭەيىپ, بەدەلى دە ارتىپ كەلەدى. بيىل بايقاۋعا ەلىمىز بويىنشا 200-گە جۋىق قاتىسۋشىدان 800-دەن استام جۇمىس كەلىپ ءتۇستى. ونىڭ 85 پايىزعا جۋىعى مەملەكەتتىك تىلدە ەكەنىن دە ەرەكشە اتاپ وتكەن ءجون.
بيىلعى بايقاۋدىڭ تاعى ءبىر ەرەكشەلىگى رەتىندە بۇرىنعىداي تەك پارتيانىڭ قىزمەتىن ناسيحاتتاعان جۋرناليستەرگە عانا ەمەس, ەلىمىزدەگى ەكونوميكالىق, ساياسي, الەۋمەتتىك جانە رۋحاني جاڭعىرۋدى, ەلوردامىزدىڭ 20 جىلدىق مەرەيتويىن جانە «پرەزيدەنتتىڭ بەس الەۋمەتتىك باستاماسىن» ناسيحاتتاۋعا بەلسەندى قاتىسقان تىلشىلەر قاۋىمىنىڭ دا ماراپاتتالعانىن ايتا كەتكەن ءجون.
سالتاناتتى جيىندى اشقان ماۋلەن اشىمباەۆ «نۇر سۇڭقار» بايقاۋدىڭ جۋرناليستەر اراسىنداعى باسەكەلەستىكتىڭ كۇشەيۋىنە جانە وتاندىق جۋرناليستيكانىڭ جان-جاقتى دامۋىنا تيگىزگەن وڭ اسەرىن اتاپ ءوتتى. سونداي-اق پارتيا توراعاسىنىڭ ءبىرىنشى ورىنباسارى جۋرناليستەردىڭ قوعامداعى ورنى ەرەكشە ەكەنىنە دە نازار اۋداردى.
– قازىرگى كەزدە كەز كەلگەن قوعام ءۇشىن اقپاراتتىڭ الار ورنى ەرەكشە. ويتكەنى اقپاراتتىڭ دامۋعا, زامان كوشىنە ىلەسۋگە تيگىزەر اسەرى زور. سول سەبەپتى دە بۇگىندە جۋرناليستەر قاۋىمىنا جۇكتەلىپ وتىرعان مىندەتتىڭ ءمانى مەن ماڭىزى ارتىپ, سالماعى دا اۋىرلاي ءتۇستى. ەلىمىزدىڭ كەز كەلگەن جەتىستىگى مەن باعىندىرعان بيىكتەرىن حالىققا العاش بولىپ تاراتاتىن دا سىزدەرسىزدەر. كەلەشەكتە بۇدان دا بيىك بەلەستەردى باعىندىرىپ, ويعا العان ماقسات-مۇراتتارىڭىزعا جەتۋلەرىڭىزگە تىلەكتەسپىن. سول جولدا مىقتى دەنساۋلىق, قاجىماس قايرات جانە سارقىلماس شابىت تىلەيمىن, – دەدى ماۋلەن اشىمباەۆ.
سونىمەن قاتار پارتيا توراعاسىنىڭ ءبىرىنشى ورىنباسارى الداعى ۋاقىتتا دا پارتيا مەن بۇقارالىق اقپارات قۇرالدارى اراسىنداعى بايلانىس ودان ءارى نىعايىپ, ەكى تاراپتىڭ ەل مۇددەسى جولىندا بىرلەسىپ جۇمىس ىستەيتىنىنە سەنىم ءبىلدىردى.
بيىل قاتىسۋشىلاردان ەلدىڭ ساياسي, ەكونوميكالىق, رۋحاني جانە الەۋمەتتىك جاڭعىرۋى, پرەزيدەنتتىڭ بەس الەۋمەتتىك باستاماسى, ەلباسى – «نۇر وتان» پارتياسىنىڭ توراعاسى نۇرسۇلتان نازارباەۆ بەلگىلەپ بەرگەن وزەكتى ماسەلەلەردىڭ ىسكە اسىرىلۋ بارىسىن ناسيحاتتايتىن ەڭبەكتەر قابىلداندى. سونداي-اق پارتيا قىزمەتىن جاڭعىرتۋ, ماجىلىستەگى جانە بارلىق دەڭگەيدەگى ماسليحاتتاعى پارتيا فراكتسيالارىنىڭ جۇمىسى مەن جاڭا پارتيالىق جوبالاردى دارىپتەپ, «نۇر وتان» پارتياسىنىڭ جاستار ساياساتىن جانداندىرۋ ماقساتىندا اتقارعان ىستەرىن حالىققا جەتكىزۋدە بەلسەندىلىك تانىتقان جۋرناليستەر قاتىستى.
ناتيجەسىندە ەلىمىزگە تانىمال قوعام قايراتكەرلەرى مەن وتاندىق جۋرناليستيكانى ورگە سۇيرەگەن بەلگىلى تۇلعالاردان قۇرالعان بايقاۋ كوميسسياسى «كوزقاراس» (ەڭ ۇزدىك تەلەۆيزيالىق جۋرناليست), «حالىق داۋىسى» (ەڭ ۇزدىك تەلەۆيزيالىق جۋرناليست), ء«سوز شەبەرى» (گازەتتىڭ ۇزدىك ءجۋرناليسى), ء«سوز زەرگەرى» (گازەتتىڭ ەڭ ۇزدىك ءجۋرناليسى), «مەديا-پروفي» (ينتەرنەت باسىلىمنىڭ ەڭ ۇزدىك ءجۋرناليسى), «پارتيالىق جاڭعىرۋ» (جاڭا پارتيالىق جوبالار تۋرالى ۇزدىك ماتەريال), «استاناعا 20 جىل» (ەلوردانىڭ 20 جىلدىعىنا ارنالعان ۇزدىك ماتەريال), «رۋحاني جاڭعىرۋ» (قوعامدىق سانانى جاڭعىرتۋ باعدارلاماسىن ىلگەرىلەتۋگە قوسقان ۇلەسى ءۇشىن), «5 باستاما» (مەملەكەت باسشىسىنىڭ الەۋمەتتىك باستامالارىن ناسيحاتتاۋدا بەلسەندىلىك تانىتقانى ءۇشىن) جانە «مايتالمان» (وتاندىق جۋرناليستيكانى دامىتۋعا قوسقان ۇلەسى ءۇشىن) اتالىمدارى بويىنشا جەڭىمپازداردى انىقتادى. وسى رەتتە «پارتيالىق جاڭعىرۋ», «استاناعا 20 جىل», «رۋحاني جاڭعىرۋ», «5 باستاما» جانە «مايتالمان» اتالىمدارى بويىنشا سىيلىقتار بيىل العاش رەت بەرىلىپ وتىرعانىن اتاپ وتكەن ءجون.
«نۇر سۇڭقار – 2018» بايقاۋىنىڭ جەڭىمپازدارى:
تيمۋر قازاعۇلوۆ, «اكتسەنت» قوستاناي وبلىسى ليساكوۆ قالالىق تەلەارناسىنىڭ باس رەداكتورى, ەڭ ۇزدىك تەلەۆيزيالىق جۋرناليست – «كوزقاراس» اتالىمى;
ينديرا اسانوۆا, «قازاقستان» ۇلتتىق تەلەارناسىنىڭ اناليتيك-رەداكتورى, ەڭ ۇزدىك تەلەۆيزيالىق جۋرناليست – «حالىق داۋىسى» اتالىمى;
سەيفوللا شايىنعازى, «ەگەمەن قازاقستان» گازەتى باس رەداكتورىنىڭ ورىنباسارى, ۇزدىك گازەت ءجۋرناليسى – ء«سوز زەرگەرى» اتالىمى;
ايجان شاۋقۇلوۆا, «اكتيۋبينسكي ۆەستنيك» اقتوبە وبلىستىق قوعامدىق-ساياسي گازەتىنىڭ كوررەسپوندەنتى, ۇزدىك گازەت ءجۋرناليسى – ء«سوز شەبەرى» اتالىمى;
نيكولاي ەنەلانە, Informburo.kz اقپاراتتىق-تالدامالىق پورتالىنىڭ ارنايى كوررەسپوندەنتى, ينتەرنەت باسىلىمنىڭ ەڭ ۇزدىك ءجۋرناليسى – «مەديا-پروفي» اتالىمى;
شالقار قوجاەۆ, «حابار 24» تەلەارناسىنىڭ شەف-رەداكتورى, مەملەكەت باسشىسىنىڭ الەۋمەتتىك باستامالارىن ناسيحاتتاۋدا بەلسەندىلىك تانىتقانى ءۇشىن – «5 باستاما» اتالىمى;
ەكاتەرينا بەسكورسايا, «كازاحستانسكايا پراۆدا» گازەتىنىڭ پاۆلودار وبلىسىنداعى مەنشىكتى ءتىلشىسى, جاڭا پارتيالىق جوبالار تۋرالى ۇزدىك ماتەريال – «پارتيالىق جاڭعىرۋ» اتالىمى;
«استانا اقشامى» گازەتىنىڭ رەداكتسياسى, ەلوردانىڭ 20 جىلدىعىنا ارنالعان ۇزدىك ماتەريال – «استاناعا 20 جىل» اتالىمى;
دارحان قىدىءرالى, «حابار» تەلەارناسىنىڭ «بولاشاققا باعدار» باعدارلاماسىنىڭ جۇرگىزۋشىسى جانە باعدارلامانىڭ شىعارماشىلىق ۇجىمى, قوعامدىق سانانى جاڭعىرتۋ باعدارلاماسىن ىلگەرىلەتۋگە قوسقان ۇلەسى ءۇشىن – «رۋحاني جاڭعىرۋ» اتالىمى;
سۇلتان ورازالى, جۋرناليست, جازۋشى, تەلەدراماتۋرگ, حالىقارالىق تەلەۆيزيا جانە راديو اكادەمياسىنىڭ اكادەميگى, وتاندىق جۋرناليستيكانى دامىتۋعا قوسقان ۇلەسى ءۇشىن – «مايتالمان» اتالىمى.
ءمادينا جالەلقىزى,
«ەگەمەن قازاقستان»
