1. ءتىزىمنىڭ كوش باسىندا تانىمال پسيحولوگ ميحايل لابكوۆسكيدىڭ «حوچۋ ي بۋدۋ» اتتى كىتابى تۇر. اۆتور كەز كەلگەن ادام بالاسىنىڭ باقىتتى بولۋعا ءارى قالاعان ىسىمەن اينالىسۋعا قۇقىلى ەكەنىنە كامىل سەنەدى. اتالعان ەڭبەكتە ءوزىڭدى ءتۇسىنۋ, قۋانا ءبىلۋ, اينالاداعىلارمەن جاراسىمدى ءومىر ءسۇرۋ جايى ايتىلادى. سونىمەن بىرگە بىزگە ءمالىم دە بەيمالىم ۋايىم مەن ۇنەمى ۇرەيلەنۋ, ادامي قارىم-قاتىناستىڭ نەگىزگى سەبەپتەرىن ىزدەيدى. اۆتوردىڭ ويىنشا, ىزدەنىس پەن ىنتا ارقىلى ادامنىڭ ءوزىن, ماقساتى بۇلدىر ءومىرىن تۇبەگەيلى وزگەرتۋگە بولادى. ادامنىڭ ءوز ءومىر جولىن, ماقساتتارىن, قۇندىلىقتارىن, ادەپ نورمالارىن, بولاشاق ماماندىعى مەن تۇرمىستىق ءومىر جاعدايلارىن دۇرىس قالىپتاستىرۋداعى تۇلعالىق دامۋدىڭ ناقتى قىرلارىن كورسەتىپ بەرەدى. 35 جىلدىق تاجىريبەسى بار ميحايل لابكوۆسكي يەرۋساليمدە ءتارتىبى قيىن بالالارمەن جۇمىس ىستەگەن.
2. پوپ-پسيحولوگيا باعىتىندا جازىلعان كوپتەگەن بەستسەللەردىڭ اۆتورى – لۋيزا حەيدىڭ «21 كۇندە باقىتتى بولۋدىڭ تولىق كۋرسى» اتتى ەڭبەگى قازاقستاندىق قىز-كەلىنشەكتەر نازارىنان قالاي تىس قالسىن؟! ء«ومىر ءسۇرۋ وتە قاراپايىم دۇنيە», دەپ سانايتىن اۆتور باقىتتى ساتتەردى باعالاي بىلۋگە ۇندەيدى. اۆتوردىڭ دايىندىق كىتابىنداعى تاپسىرمالاردىڭ دەنى اينا الدىنداعى جاتتىعۋلاردان تۇرادى. 21 كۇن ىشىندە ىشكى قاجىر-قايراتتى نىقتاۋ, شىعارماشىلىق الەۋەتتى ارتتىرۋ, ءوزىن-ءوزى باعالاي ءبىلۋ, جاقسى كورۋ مەن راقىمدى بولۋ, وتكەن شاقتاعى ەسكى رەنىشتەردى ۇمىتىپ, العا بەت الۋدى ۇيرەنەسىز. اتالعان ەڭبەكتىڭ نەگىزگى كونتسەپتسياسى ونىڭ 1976 جىلى شىققان ء«تانىڭدى ساۋىقتىر» اتتى كىتابىنان الىنعان. بۇل كىتاپ بۇگىندە 33 ەلگە تارالىپ, الەمنىڭ 25 تىلىنە اۋدارىلعان. ءدال وسى لۋيزا قۇرعان ادىستەمە ميلليونداعان وقىرماننىڭ ءۇمىت وتىن قايتا جاقتى.
3. زاماناۋي قوعام تابىستى بولۋ كۋلتىن ناسيحاتتايدى. ەكىنىڭ بىرىنە اقىلدى بول, باي بول, تابىستى, قىسقاسى بارىنەن ارتىق بول دەگەن ۇرانعا ۇندەيتىنى راس. ال تابىستى بولۋ مەن جاقسى ومىرگە تاۋەلدىلىك ورىندالماعان ارماندار مەن جەتىستىكتەردى ۇنەمى ەسكە سالىپ تۇرادى. شىنىمەن قالاي باقىتتى ءومىر سۇرۋگە بولادى؟ تانىمال بلوگەر مارك مەنسون «پوفيگيزم ونەرى. باقىتتى بولۋدىڭ پارادوكس تاسىلدەرى» اتتى كىتابىندا بۇل سۇراقتىڭ سونى جاۋابىن كورسەتىپ بەرەدى. ءازىل-شىنى ارالاس جازىلعان ەڭبەك قاراپايىمدىلىق پەن شىنايىلىققا, ءار ادامنىڭ تۇلعالىق ەرەكشەلىگىنە ءمان بەرۋگە قۇرىلعان. ومىردە باقىتتى بولعىڭىز كەلسە, بار بولعانى قولدى ءبىر سىلتەۋدى ۇيرەنسەڭىز بولعانى, دەيدى اۆتور.
ايا ءومىرتاي,
«ەگەمەن قازاقستان»
