ءالى كۇنگە دەيىن ەسىمدە. 1995 جىلدىڭ قىركۇيەك ايىنىڭ 15 جۇلدىزىندا ەل پرەزيدەنتىنىڭ «قازاقستان رەسپۋبليكاسىنىڭ استاناسى تۋرالى» جارلىعىمەن مينيسترلەر كابينەتىنە جىل سوڭىنا دەيىن استانانىڭ قونىس اۋدارۋىنىڭ ۋاقىتى مەن سوعان بايلانىستى شىعىس كولەمىن انىقتاۋ تاپسىرىلدى. سونىمەن قاتار جوعارى جانە ورتالىق بيلىك جۇيەلەرىنىڭ كوشىپ-قونۋىن ۇيىمداستىرۋ ماسەلەسىن قامتاماسىز ەتۋ ءۇشىن مەملەكەتتىك كوميسسيا قۇرىلىپ, وعان ورتالىق جانە جەرگىلىكتى بيلىك ۇيىمدارىنىڭ جۇمىستارىن ۇيلەستىرۋ قۇقىعى جۇكتەلدى. ۇكىمەتكە «جاڭا استانا» بيۋدجەتتەن تىس قورىن قۇرىپ, ەلوردانى لايىقتى اباتتاندىرۋ ىسىنە قارجى جيناقتاۋ ءىسى دە تاپسىرىلدى.
1996 جىلدىڭ قازان ايىندا سول كەزدەگى اقمولا قالاسىندا پرەزيدەنت كەڭەيتىلگەن كەڭەس وتكىزىپ, وندا اۋەجاي, تەمىر جول ۆوكزالىن رەتكە كەلتىرۋ, جول جوندەۋ, سالۋ, كوگالداندىرۋ, جارىقتاندىرۋ جايى تالقىلانىپ, باس قالانىڭ ينفراقۇرىلىمىن جاقسارتۋ ءىسى جان-جاقتى ساراپقا سالىندى. اەروپورت, ۆوكزالدار جانە جولدار كولىك جانە كوممۋنيكاتسيا مينيسترلىگىنىڭ قۇزىرىندا بولعاندىقتان, ءبىرىنشى بولىپ كوش باستاۋ وسى مينيسترلىككە جۇكتەلدى. سول ۋاقىتتاردا بۇل سالانى يۋ.ي.لاۆرينەنكو باسقاردى. مەن ءمينيستردىڭ ءبىرىنشى ورىنباسارى بولعاندىقتان, كوشۋگە بايلانىستى جۇمىستاردى ۇيىمداستىرۋ ىسىمەن اينالىستىم.
ارقانىڭ العاشقى قىسى بارىمىزگە ۇلكەن سىناق بولدى. قىزىلشۇناق اياز, الاي-تۇلەي بوران, ۋاقىتشا جاتاقحاناداعى لەكەرلەنگەن پاتەرلەر, جۇپىنى دۇكەن سورەلەرى, تاماقتاناتىن ورىنداردىڭ تاپشىلىعى ءبىراز ادامنىڭ ساعىن سىندىرارداي اسەر ەتىپ, كەيبىرەۋلەر ءتىپتى الماتىعا قايتا ورالىپ جاتتى. الايدا كوپشىلىك ازاماتتار بۇل ماڭىزدى ءىس ەل بولاشاعىنا اسا كەرەك ەكەنىن ءتۇسىنىپ, قانداي قيىندىققا بولسىن قارسى تۇرا ءبىلدى.
1997 جىلدىڭ شىلدە ايىندا مينيسترلىك تولىقتاي كوشىپ, كادرلارمەن قامتاماسىز ەتىلگەننەن كەيىن تامىز ايىنان باستاپ ءوزىنىڭ جۇمىسىنا تولىققاندى كىرىسىپ كەتتى. سول جىلدىڭ وزىندە اتالعان قۇرىلىم زور جۇمىس اتقاردى دەپ ايتۋعا بولادى. قىسقا مەرزىمدە اەروۆوكزال عيماراتىنىڭ كۇردەلى جوندەۋدەن ءوتۋى, ۇشىپ-قونۋ جولاعى زاماناۋي جارىق بەلگى جۇيەسىمەن قامتىلىپ, ونىڭ 3000 مەترى ىسكە قوسىلۋى, جاڭا ۇشۋ جولاقتارى ارالىق بۇرىلىس جولدارىنىڭ سوعىلۋى, VIP زال عيماراتى كولەمىنىڭ ۇلعايتىلۋى سىندى ەلەۋلى جۇمىستار اتقارىلدى. ەڭ باستىسى قالاارالىق جولدىڭ كەڭەيتىلۋ جۇمىستارى اياقتالىپ, العاشقى اينالمالى جول سالىندى.
تىڭ تەمىرجول باسقارماسىنىڭ كۇشىمەن قالالىق تەمىرجول ۆوكزالىنىڭ عيماراتى جوندەلىپ, ۆوكزال اۋماعى كەڭەيتىلدى, كوپتەگەن اكىمشىلىك عيماراتتار جوندەۋدەن ءوتىپ, جاڭا ءار الدى, قىزمەت اۋماقتارى وزگەرتىلدى. تەمىرجولشىلار مادەنيەت سارايى دا جاڭعىرتىلىپ, «كۇلاش بايسەيىتوۆا اتىنداعى وپەرا جانە بالەت تەاترى» (كەيىن جاستار تەاترى اتالدى) قالا تۇرعىندارى مەن قوناقتارىنا رۋحاني ازىق بەرەتىن ىرگەلى مادەنيەت وشاعىنا اينالدى.
وسى جۇمىستاردىڭ جۇيەلى جولعا قويىلۋىنا كوش-كەرۋەننىڭ باسى بولعان كولىك جانە كوممۋنيكاتسيا مينيسترلىگى ۇلكەن ۇلەس قوستى دەپ ايتا الامىز. اسىرەسە الماتىدان كوشىرىلگەن قىرۋار جۇك پەن حالىقتى تاسىمالداۋدا اۆتوكولىكشىلەر مەن تەمىرجولشىلاردىڭ وراسان ەڭبەگىن ايرىقشا اتاي كەتكەن ءجون. العاشقى جىلدارى بايلانىس ماسەلەسى دە ايتارلىقتاي قيىندىق تۋعىزدى. بار اتس-تەردىڭ قۇرال-جابدىقتارى ەسكى بولعاندىقتان, بارلىق اۋداندارمەن تۇراقتى بايلانىستى تولىقتاي قامتاماسىز ەتە المادى, تەلەفون نومىرلەرىنىڭ تاپشىلىعى سەزىلىپ تۇردى. جاڭا قۇرىلعان «قازاقتەلەكوم» مەكەمەسىنىڭ كۇشىمەن كەيىننەن بۇل ماسەلە وڭ شەشىمىن تاپقانىن دا كوزىمىز كوردى.
تالاي قيىندىق ارتتا قالدى. قازاق ەلى تاريح ساحناسىندا بيىك بەلەسكە قايتا شىقتى. حالىق ءوز پرەزيدەنتىن قولداپ, عاسىرلار بويى اڭساعان ءتا-
ۋەلسىزدىگىنىڭ ايعاعىنداي بولعان ارايلى استاناسىن ماقتان ەتەدى. ءبىز كولىك جانە كوممۋنيكاتسيا سالاسىنىڭ ارداگەرلەرى ەرەن ەڭبەكتىڭ ناتيجەلى بولعانىنا شىن جۇرەكتەن قۋانىشتىمىز جانە ەلباسىنىڭ استانامىزدىڭ 20 جىلدىعىن اتاپ ءوتۋ جونىندەگى جارلىعىن قۋانىشپەن قابىلدادىق.
شىن مانىندە تاۋەلسىز ەلىمىزدىڭ تۇڭعىش پرەزيدەنتىنىڭ تاريحي شەشىمى ءومىر اعىمىن كۇرت وزگەرتىپ, جاڭا قۋات اكەلدى, ەلباسىنىڭ ءوز باستاۋىمەن, قاداعالاۋىمەن سوعىلعان جاڭا قالا كونە دالانىڭ كوركىنە, الەمدەگى اسەم شاھارلاردىڭ بىرىنە اينالدى. ايبىندى استانا – بەيبىتشىلىك پەن بەرەكەنىڭ قۇتتى بەسىگى, تاۋەلسىزدىكتىڭ جەمىسى.
سەرىك الىعوجا,
قازاقستان رەسپۋبليكاسى اۆتوكولىكشىلەر وداعىنىڭ باسقارما توراعاسى
