مەكەمەنى ارالاۋ بارىسىندا پرەمەر-مينيستر جەتەكشى الەمدىك وندىرۋشىلەردىڭ زاماناۋي مەديتسينالىق جابدىقتارىنىڭ جۇمىسىمەن, سونداي-اق «كەشەندى مەديتسينالىق اقپاراتتىق جۇيە» جاڭا باعدارلامالىق قامسىزداندىرۋمەن جانە زەرتحانالىق اقپاراتتىق جۇيەمەن تانىستى.
ەمحانانىڭ باس دارىگەرى س.ءىلياسوۆ كوكشەتاۋ قالاسى مەن زەرەندى اۋدانىنىڭ جاقىن ماڭىنداعى اۋىلدارىنىڭ ەمدەلۋشىلەرىنە وزدەرىنە ىڭعايلى ۋاقىتتا مەديتسينالىق كومەك الۋعا مۇمكىندىك بەرەتىن ەلەكتروندى انىقتامالىق جانە كەزەك جۇيەسىنىڭ جۇمىسىمەن تانىستىردى.
اقمولا وبلىسىنىڭ دەنساۋلىق ساقتاۋ باسقارماسىنىڭ باسشىسى س.كيسيكوۆا «دەنساۋلىق» مەملەكەتتىك باعدارلاماسىن ىسكە اسىرۋ اياسىندا وڭىردە جالپى دەنساۋلىق ساقتاۋ جۇيەسىن دامىتۋ, سونىمەن قاتار مەديتسينالىق ۇيىمدار جەلىسىنىڭ بىرىڭعاي پەرسپەكتيۆالىق جوسپارى جوباسى تۋرالى باياندادى. وسى جىلدىڭ 5 ايىندا وتكەن جىلدىڭ سايكەس كەزەڭىمەن سالىستىرعاندا اۋرۋلار مەن ءولىم-ءجىتىم كورسەتكىشتەرىنىڭ تومەندەگەنى بايقالادى: نارەستە ءولىمى شامامەن 26%-عا, تۋبەركۋلەزبەن اۋىرۋ — 13,9%-كە, قان اينالىمى اۋرۋلارى — 7,4%-كە تومەندەدى.
اكىمدىكتىڭ مالىمەتتەرىنە سايكەس, اقمولا وبلىسىندا 577 دەنساۋلىق ساقتاۋ نىسانىنىڭ 258-ىندە مەديتسينالىق اقپاراتتىق جۇيەلەر ەنگىزىلگەن. بۇدان وزگە, وسى جىلدىڭ قاڭتار ايىنان باستاپ پيلوتتىق تسيفرلىق جوبا اياسىندا ەلەكتروندىق دەنساۋلىق پاسپورتتارى حالىقتىڭ 99%-نە تولتىرىلدى:
- شامامەن 86% نەمەسە 1,35 ملن كەلىپ-كەتۋشىلەرگە قىزمەت كورسەتىلدى.
- فليۋروتەكالارعا ەلەكتروندىق كەسكىندەردىڭ 37%-ى تىركەلگەن;
- ەلەكتروندى فورماتتا ناۋقاستىق پاراقشانىڭ 67% جازىلدى;
- ەلەكتروندىق رەتسەپتەر بەرۋ بويىنشا جۇمىس باستالدى.
اۋداندىق دەڭگەيگە دەيىنگى مەديتسينالىق ۇيىمدار 100% ينتەرنەتپەن قامتاماسىز ەتىلگەن. بارلىق مەديتسينا قىزمەتكەرلەرى كومپيۋتەرلىك ساۋاتتىلىققا, قر دسم اقپاراتتىق جۇيەلەرىندە جۇمىس ىستەۋگە 100% وقىتىلعان. مەديتسينالىق ۇيىمداردىڭ 80%-تەن استامى ءىشىنارا قاعازسىز فورماتقا اۋىسقان. قاعازسىز مەديتسينالىق قۇجات اينالىمىنا كوشۋدەن كۇتىلەتىن اسەر: دارىگەرگە بارۋدى 2 ەسەگە قىسقارتۋ; كاسىبي تەكسەرۋ جانە سكرينينگتەر كەزىندە اۋرۋلاردى انىقتاۋدى 30%-كە ارتتىرۋ; الدىن-الا جازبا ۇلەسىنىڭ 50%-كە ءوسۋى, جاندى كەزەكتەردى 50%-كە دەيىن تومەندەتۋ.
وبلىستىڭ مەديتسينا قىزمەتكەرلەرىمەن كەزدەسۋدە دەنساۋلىق ساقتاۋ جۇيەسىن دامىتۋمەن تانىسۋ جالعاسىن تاپتى. كەزدەسۋ بارىسىندا حالىققا كورسەتىلەتىن مەديتسينالىق قىزمەتتەردىڭ ساپاسى مەن قولجەتىمدىلىگى جانە ءوڭىردىڭ دەنساۋلىق ساقتاۋ ينفراقۇرىلىمىن ودان ءارى دامىتۋ, دارىگەرلەردى كاسىبي دايارلاۋ جانە ولاردىڭ ءمامس ەنگىزۋگە دايىندىعى ماسەلەلەرى تالقىلاندى.
دەنساۋلىق ساقتاۋ سالاسىنىڭ قىزمەتكەرلەرىمەن كەزدەسۋدى اشا وتىرىپ, ب.ساعىنتاەۆ بۇگىندە دەنساۋلىق ساقتاۋ جۇيەسىن جاڭعىرتۋ بويىنشا كولەمدى جۇمىستار اتقارىلىپ جاتقانىن اتاپ ءوتتى. مەملەكەتتىڭ نەگىزگى باسىمدىعى — قازاقستاندىقتاردىڭ دەنساۋلىعىن قورعاۋ. ۇكىمەت, ءوز كەزەگىندە, قازاقستاننىڭ دەنساۋلىق ساقتاۋ جۇيەسىن رەفورمالاۋ بويىنشا پرەزيدەنتتىڭ العا قويعان بىرقاتار ناقتى مىندەتتەرىن ەرەكشە باقىلاۋدا ۇستاپ وتىر. بۇل ۇسىنىلاتىن مەديتسينالىق قىزمەتتەردى تسيفرلاندىرۋ, «قاعازسىز اۋرۋحانالارعا» كوشۋ, سونداي-اق ءمجا قاعيداسى ارقىلى دەنساۋلىق ساقتاۋ نارىعىن ىرىقتاندىرۋ جانە جەكەمەنشىك مەديتسينالىق ۇيىمدار ءۇشىن كەدەرگىلەردى ازايتۋ ارقىلى سالانىڭ تيىمدىلىگىن ارتتىرۋ.
2017 جىلى جەكەمەنشىك سەكتوردىڭ شەكتەۋلەرى الىنىپ تاستالدى, بىرقاتار سانيتارلىق نورمالار جويىلىپ, قايتا قارالدى. بۇل دەنساۋلىق ساقتاۋ سالاسىنا سالىنعان جەكە ينۆەستيتسيالاردى ەكى ەسەگە 44,2 ملرد تەڭگەگە دەيىن (2016 جىلى 23,3 ملرد تەڭگە) ۇلعايتۋعا جول اشتى.
بۇدان وزگە, وڭىرلىك دەنساۋلىق ساقتاۋ جۇيەسىنىڭ وكىلدەرى بىرقاتار وزەكتى ماسەلەلەر بويىنشا ءسوز سويلەدى. ماسەلەن, وبلىستىق پەريناتالدىق ورتالىقتىڭ باس دارىگەرى ە.مۇحامەديەۆ, «اۆيتسەننا» جشس باس دارىگەرى — ج.تۋعامبەكوۆ, اقمولا بالالار وبلىستىق اۋرۋحاناسىنىڭ باس دارىگەرى — س.اقشالوۆ, «مەديكۋس» جشس باس دارىگەرى — ا.بولاتوۆا, قالالىق ەمحانانىڭ باس دارىگەرى — گ.ساباتاەۆا مەملەكەتتىك دەنساۋلىق ساقتاۋ ۇيىمدارىنىڭ قىزمەتىن جاڭعىرتۋ, ءدارى-دارمەكتەردى ۋاقىتىلى ساتىپ الۋ جانە جەتكىزۋ, سونداي-اق كادرلاردى دايىنداۋ ماسەلەلەرىن كوتەردى.
ءوز كەزەگىندە, قر دەنساۋلىق ساقتاۋ ءمينيسترى ە.ءبىرتانوۆ ارىپتەستەرىنىڭ سويلەگەن سوزدەرىنە پىكىر بىلدىرە وتىرىپ, وڭىردە دەنساۋلىق ساقتاۋ جۇيەسىن جاڭعىرتۋ جونىندەگى جۇمىستار ءتيىستى دەڭگەيدە ىسكە اسىرىلىپ جاتقانىن ايتىپ ءوتتى. اتاپ ايتقاندا, تسيفرلىق تەحنولوگيالاردى ەنگىزۋ كوپتەگەن داۋلى ماسەلەلەردى شەشۋگە ىقپال ەتەدى.
ديالوگتى قورىتىندىلاي كەلە, قر پرەمەر-ءمينيسترى باقىتجان ساعىنتاەۆ مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋگە مۇقيات دايىندىق, ۇسىنىلاتىن قىزمەتتەر مەن ءدارى-دارمەكپەن قامتاماسىز ەتۋدىڭ ساپاسى مەن قاۋىپسىزدىگىنە كەپىلدىك بەرۋ ماسەلەلەرى ەرەكشە باسىمدىقتا بولۋ كەرەكتىگىن اتاپ ءوتتى.
